Read Zeme Naga 1 SAMUEL 10 Bible Online

1 SAMUEL 10 - Zeme Naga bible

1 SAMUEL 10

¹Dadege Samuelbe ne taudui bung tei lu pe peî ge ruî gai de lei, zai pechu keput ze acheu sa ze, “Tingwang ne ningchu Israelme peireige heguang hangge ’nnuk kai mak mei? Zai nang ne Tingwang gu ziemmename peireige heguang gu, zai nang ne penui teureime tuaguâ bamme ba gene penui je tew’nringpat kai gu lei, zai Tingwang ne ningchu peume peireige heguang ra ’nnukkaibe ning hangge aize ’nchetrabe de lei:

²Nemai ge nang a dagene rimna dezai Benjaminram Zelza ge Rakelle raw gene ziemmena hangna je nang hedau gu lei, zai penai ne ningchu, ‘Hekunmerângne ramme nang peu ra tatbe ze â ngau lu de lei, zai chuna â ning peu â hekunmerângne hang â ’nningtenang ta di ze ning hangge ’nninghereu ze, “A na deu ge ’ndaikau I tew ra lau?” acheu ze la de lei,’ ze acheu gu lei.

³Dezaine nang chigene tat’nduâ ze Tabor gu ’mpubang ’mbe wangchang gu lei, chige ’mpuimi hangchum Bethel ge Hera dage hangme je hedau gu lei, hangkat ne kemeipoine kechum tei lu, hangkat ne tingkukuak kechum tei lu, zai kêdapeu ne wain hemeigeibung tei lu zeu.

⁴Zai penui ne ningchu rechâ gai gu, zai tingkukuak kena pei gu lei, nang penui ba gene chize lu ra lei.

⁵Chipau châng dezai Philistinme gu hereikangme bambe bâm Gibeath-elohim ’mbe nang wang ra lei; zai chige namdi ’mbe nang gutbe ge pebâm kehube gene wangkeume kemeume kiangna, ’nrabung, ’ntoî, metiam zai ba kat gu ’nrabung penui suage kai lu kemeume sam pau ze nang hedau gu lei.

⁶Dezai Tingwang gu herui ning peireige rezie chi-desang ze wang gai gu, zai nang penui benai kemeu sam sa gu, zai ziemmena gechâmbe kau chang du lei.

⁷Chuna aipau ’nchetrabe ramme nang hedau dezai ning hangge dau-daube tâ ze nang tew lau, Hera ning dage bam la daseu.

⁸Zai a sua ’mbe Gilgal ’mbe nang wangkeu ra lei; zai pie le lau, ning dage rûkambe-râtewbe peipat ra, zai desieyibe-râtewbe peipat ra I wang gu lei. Ning dage I hang ze ’ndaikau nang tew ra mei be ningchu I teilia mak tâne hezie sena nang kua ra lei,” ze kacheu de lei.

⁹Samuelbe je sâu gai ra pa ’nnuktat ti dege, Hera ne helung kêdabe pechu pei gai bei de lei; zai chipau mai ge aipau dak ramme leine wangchang de lei.

¹⁰Gilgal ge penui wangchang dege, pie le lau, kemeume kiangna pechu kahedau de lei; zai Hera gu herui pe peireige rezie chigesang ze wangkeu gai ze, pa penui ruage kemeu sam sa bam de lei.

¹¹Zai besua’ngka ne pechu chime pa kemeume ruage sam sa bambe ngau lu dege, baudime kat-kat karai ge sa ze, “Kisbe na peireige ’ndaikau wangchang lau? Saulbe du kemeume ruage bam semei?” ze kacheu de lei.

¹²Zai chipau bâm ge ziemmena hangkat ne kak ze, “Zaine penui peu ze châu lau?” ze ka’nneu lei. Chidadege chize samrekum chang di de lei, “Saulbe du kemeume ruage la mei?” kacheube zeu.

¹³Pa kemeu sam sa kam lu dege, pebâm kehu ’mbe pa wang di de lei.

¹⁴Saulbe peu kahenapeu ne pa benai pe guâ ka’ngguapeu je, “Ning nai ’ndai’ngge tat kai di lau?” ze kacheu de lei. Zai pa ne kak ze, “Hekunmerângne peu ra lei; zai penui je ngaulak te lei be chî lu dege, anai â Samuelbe tailam tat ti de lei,” ze acheu bei de lei.

¹⁵Zai Saulbe peu kahenapeu ne rang ze, “’Ndaikau Samuelbe ne rang mei be achu salia lau,” kacheu de lei.

¹⁶Zai Saulbe ne pe peu peudâpeu je, “Hekunmerângne â ngau lu de lei, ze pa ne salia ’nchichiak kai de lei,” ze kacheu de lei. Kane heguangram tedeu ge Samuelbe ne saliabe ze â pechu mâ de ranglia mak tai de lei.

¹⁷Chunage Tingwang dage Mizpa ge Samuelbe baudime je kûwang’ndui gai de lei;

¹⁸zai Israel baudime je pa ne rang gai ze, “Aigum ze Tingwang Israelme Rapeu ne rang lei, ‘Ijip gene Israelme je I ne nguapat kai lei, zai ningnui je Ijipme ba gene benai heguangram ramme chi ningnui je I ne tewsame leine ba gene ningnui je meupat kai de lei,’ zeu.

¹⁹Kane nemai ningnui Rapeu, ningnui lung kahereube benai ningnui duânggabe leine gene ningnui je tewka’nringpeu je ningnui â tuâpat ’ndi de lei. Zai ningnui ne sa ze, ‘Mak lei! kane heguang anui peireige kai lau,’ acheu zeu. Chidaze chunage ningnui runne Tingwang suage ningnui zat ramme benai ningnui gu changsenângme je peipat kai zu lau,” ze kacheu de lei.

²⁰Dege Samuelbe ne Israelme zatme je teiwang’nna gai de lei, zai Benjamin zat je â hedachakbe ne lupat kai lei.

²¹Pa ne Benjamin kiria je â pe kiduîme taige teiwang’nna gai lei, zai Matri kiduîme je â heda ne chakpie lei; nâlangbe ge pa Matri kiduîme je â ’mpeumi kat-kat ze teiwang’nna gai lei, zai Kisbe na Saulbe je â hedachakbe ne lupat kai lei, kane penui pechu peu gai dege pechu ngau mak tai lei.

²²Dadege Tingwang je penui ’mmêt kadai de lei, “Chipaupeu ze aige wang gai mei?” acheu zeu, dadege Tingwang ne rang ze, “Pie le lau, pa â perunne heput ramme ruage ’mbai de lei,” kacheu de lei.

²³Dege penui paktat lu chigene pechu nguawang de lei, zai ziemmena kêdame â pe keîtoa riâ du chang mak lei.

²⁴Zai Samuelbe ne ziemmena leine je, “Tingwang ne kelânggaipeu je ningnui ngau mei? Ziemmena leine ruage pa gumbe kau mî de ga lei,” ze kacheu de lei. Zai baudime ne ’nrung ze, “Heguang ringtie lau!” ze kacheu de lei.

²⁵Dadege Samuelbe ne baudime je kaheguangbe rezie benai pa tatew ramme salia de lei; zai pa ne chiramme leisikuak ge raw gai lu Tingwang suage kai de lei. Dege Samuelbe ne baudime je pe ki ki lam’mbe lang gai kam ’ndi de lei.

²⁶Saulbe du Gilead ge pe ki lam’mbe tat ti de lei; zai pe dage gekuume pe lung Hera ne deîtaubeime du tat ti de lei.

²⁷Kane hanggesame ziemmena peruânggame ne sa ze, “’Ndaigum ze aipaupeu ne anui je tew’nringchi ra lau?” kacheu de lei. Zai penui ne pechu ngau’nna, zai pechu kela teiwang mak lei. Kane pa â pe lung hegeigâk bam lei.