Read Zeme Naga 1 SAMUEL 11 Bible Online

1 SAMUEL 11 - Zeme Naga bible

1 SAMUEL 11

¹Dadege Ammon’mpeu Nahasbe hang lu, Jabesh-Gilead tuagua de lei; zai Jabes gu ziemmena leine ne Nahasbe je, “Anui dage samria tew gai lau, dezai ningnui guâ anui ’nggua gu lei,” ze kacheu de lei.

²Kane Ammon’mpeu Nahasbe ne penui je rang ze, “Ningnui gu hezat’mbia mik leine kuipat lu ze Israelme leine peireige tewhelêugaibe I ne kai ra chang bei zai â ningnui dage I samria tew gai de lei,” ze kacheu de lei.

³Jabes gu gechîngme leine ne pechu rang ze, “Anui hangge hezie sena kuâ ra peirî lau, dezai Israelme gu heram leine ge sampaume anui lang gai ra hangge zeu. Dezai, anui je tew’nring gai ra mî de ga zai â, anui runne ning dage peipat kai gu lei,” ze kacheu de lei.

⁴Sampaume Saulbe gu Gibea ge wangchang dege, penui ne sam ze baudime keseube ge paulîa gai de lei; zai ziemmena leine hapka’nrung de lei.

⁵Chunage Saulbe â getumsei kena chai-chai hening lu gene wang de lei; zai Saulbe ne sa ze, “’Ndaikau ne ziemmename je tew’nteu bei lau, penui hap bambe zeu?” ze kacheu de lei. Dadege penui ne Jabeshme gu hepâusam ze pechu salia bei de lei.

⁶Zai aipau sam ramme pa seu lu dege, Saulbe peireige Hera gu herui rezie chi-desang ze wang gai de lei, zai pe lumpumbe ze tauben bam di de lei.

⁷Pa ne getumsei kena tei lu dângtapperiu gai lu, hepâusampaume ba gene chiramme ze Israelme gu heram leine ge ’mput kai de lei, acheu sa ze, “Saulbe benai Samuelbe chaige tatpatmakme leine je â pe gu getumsei ramme peireige chigum ze tew gai gu lei!” ze kacheu de lei. Dadege ziemmename peireige Tingwang gu kehingbe kêu gai bei ze, penui zuapringpat ti de lei.

⁸Bezek ge pa ne penui je kûwang’nduigaibe ge Israelme ’mpeumi ziemmena chang haî chum lei, zai Judame chang himreu lei.

⁹Zai penui ne hepâusam pauwangme je, “Jabesh-gilead ’mpeumime je ningnui acheu salia ra lei: ‘’Nchuamai tingnaichiê lumbe lua ’nripatbe ningnui ngau gu lei,’ acheu zeu,” ze kacheu de lei. Hepâusampaume ne wang lu Jabeshme je salia bei dege â penui suiyi di de lei.

¹⁰Chidadege Jabeshme ne rang ze, “’Nchuamai dezai anui runne anui je ningnui dage peipat kai gu de lei, zai ningnui dage ’ndaikau yi mei be anui peireige ningnui tew dui lei,” ze kacheu de lei.

¹¹Zai bechai mai ge, Saulbe ne baudime je bau chum kai de lei; zai hechua hî ge penui sieki ge gut te lei, zai Ammonme je tîngnarî chang mak tâne bi ze bihiam ’ndi de lei; zai ringpatme â paktimra kam di de lei, dadege mî de penui pamtew ze bam ta di de lei.

¹²Dadege Baudime ne Samuelbe dage sa ze, “Saulbe ne anui peireige heguang ra semei, acheu sabe ze châu lau? chime je teiwang lau, penui je anui ne tewchat ne ra hang,” ze kacheu de lei.

¹³Kane Saulbe ne kak ze, “Nemai tingnaimikpui ge mige de tewchat ra mak lei, nemai ge Tingwang ne Israel ge ’nripatbe tâ tew gai bei daseu,” ze kacheu de lei.

¹⁴Dadege Samuelbe ne baudime je, “Wang lau, Gilgal ’mbe anui tat kei lei, zai chige heguangram tewrechi gai ra hang,” ze kacheu de lei.

¹⁵Dadege ziemmename leine Gilgal ’mbe tat ti de lei, zai chige Gilgal ge Tingwang suage Saulbe je penui heguang hang sum gai de lei; zai chige Tingwang suage desieyibe-râ tew gai de lei, zai chige Saulbe benai Israelme haimena penui suiyi’nta-kadesang de lei.