Read Zeme Naga 1 SAMUEL 14 Bible Online

1 SAMUEL 14 - Zeme Naga bible

1 SAMUEL 14

¹Mai kat â Saulbe na Jonathanbe ne rehang’mpeu pe gu hereimerua teipeu dage rang ze, “Kei lei, Philistinme gu sieki katlam ’mbe tat kei lei,” kacheu de lei. Kane pa ne pe peu dage salia mak lei.

²Saulbe â Gibea kerie’mbang Migron ge turiechibang kangge bam bam lei; ziemmename pe dage bamme ’mpeumi haî seruk gum lei,

³Shilo ge Tingwang gu tingkupeu Elibe na Phinehabe na Ikabodbe kinapeu, Ahitubbe na Ahijabe tingkupuâ kaipeu bam lei, zai ziemmena ramme ne Jonathanbe â tat ti de lei be chî mak lei.

⁴Jonathanbe Philistinme gu sieki ’mbe tat ra kahekabe ’mpuichak ge kat lam’mbia benai kêda ’mbia ge tingchu terungheube bam lei; zai chipau tingchu terungbâm kat ji ze Bozez lei, zai kêdabe ji ze â Sene lei.

⁵Tingchu terungbâm kat ze Mikmas suage tingpeî ’mbia sapchu lei, zai kêdabe ze tingpî ’mbia Giba suage bam lei.

⁶Zai Jonathanbe ne pe gu hereimerua teipeu rehang’mpeu je rang ze, “Kei lei, anai du rumgetenmakme gu sieki ’mbe tat kei lei; Tingwang ne anai hang tâtew gai leu gu lei; ziemmena gekieme dagene benai gechamme dagene tew’nringgairabe ze Tingwang je mâ ne de namchi lak daseu,” ze kacheu de lei.

⁷Zai pe gu hereimerua teipeu ne pechu rang ze, “Nang neibe leine tew zu lau, pie le lau, ning dage I lamui lei, nang ka’nningbe ze I ka’nningbe de lei,” kacheu de lei.

⁸Chidadege Jonathanbe ne, “Pie le lau, ziemmename bambe bâm ’mbe tatkapat kei lei, chidezai penui dage anai saplia ra hang,

⁹penui ne anai je rang ze, ‘Anui wang mak tâne kuâlêu lau,’ acheu zaine â, anai bâm ge anai â, bam gai ra rei de lei, zai anai â penui tailam hang mak ra de lei.

¹⁰Kane penui ne, ‘Anui tailam hang lau,’ acheu zai â, anai hang ra de lei; Tingwang ne penui je anai ba ge pei gai ’ndi daseu. Zai aize anai hangge ’nchetrabe chang ra de lei,” kacheu de lei.

¹¹Dadege penai hangna Philistinme gu sieki ge penai runne saplia gai de lei; zai Philistinme ne sa ze, “Pie gai ni lau, Hebraime penui ka’mbaibeki ramme gene zuapat mui de lei,” kacheu de lei.

¹²Zai sieki ge bamme ne Jonathanbe benai pe gu hereimerua teipeu je rechâ gai ze, “Anui dage hang lau, dezai anui ne ningnai je merua teilia gu lei,” kacheu de lei. Zai Jonathanbe ne pe gu hereimerua teipeu je, “A chai suihang lau, Tingwang ne penui je Israelme ba ge pei gai ’ndi daseu,” ze kacheu de lei.

¹³Dadege Jonathanbe pe ba benai pe pî ne ’nzakhang de lei, zai pe gu hereimerua teipeu pe chai hang de lei. Zai Jonathanbe suage penui kau gai de lei, zai pe gu hereimerua teipeu ne pe chai-chai ge penui je tewchat-hang de lei.

¹⁴Zai Jonathanbe benai pe gu hereimerua teipeu ne tewchatraîlangbe ge kedei akar kat ze bepi lungge ziemmena ’ngkai gumbe riâ ze tewchat ’ndi de lei.

¹⁵Zai sieki ge hening kâm ge, ziemmename leine ruage ’nchuanua bam di de lei; sieki ge benai chige ’nggirame ze du kelip kam di de lei, kedei-kaketei de lei, zai chige kehingbe kedibe wangchang di de lei.

¹⁶Zai Saulbe gu hekêtkaime Benjaminram Gibea ge pie bam de lei; zai pie le lau, baudime ailia-chilia luapat-luagut bam de lei.

¹⁷Dege Saulbe ne pe dage bamme ziemmename dage rang ze, “Anui dagene châu tat ti mei be sei gai zai pie gai ni lau,” kacheu lei. Zai penui sei gai dege, pie le lau, Jonathanbe benai pe gu hereimerua teipeu chige gabe chî di de lei.

¹⁸Zai Saulbe ne Ahijabe je, “Ailia ’mbe Hera gu hingdebung teiwang lau,” ze kacheu de lei. Chipau ting ge â Hera gu hingdebung Israelme dage tat bam dadegeu.

¹⁹Zai tingkupeu je Saulbe ’mpau lage, Philistinme gu sieki ge kakeleube patbi-bi di de lei; Zai Saulbe ne tingkupeu je rang gai ze, “Ning ba kagetuabe sau de lau,” kacheu de lei.

²⁰Dadege Saulbe benai pe dage bamme leine wangherua lu, herei ’mbe tat ti de lei, zai Pie le lau, Philistinme penui karai hiazutkie ne kat kat je bigetie bam de lei. Chidadege â penui ’nnâheu bam di de lei.

²¹Chunage Hebraime besua’ngka ne Philistinme dage bamdime penui ruage sieki ’mbe hangme du Saulbe benai Jonathanbe dage bamme Israelme dage helatwang kam di de lei.

²²Chigum ze Israelme ’mpeumi leine Ephraimram peloaram ge penui runne ’mbai ze bamme Philistinme â pak la de lei be seu lu dege, penui du chime chaige kahereibe ge gua’nchutat te lei.

²³Chigum ze chipau mai ge Tingwang ne Israelme je ’nripat kai bei de lei; zai kahereibe ze Beth-aben ’nzûtat ti de lei.

²⁴Zai chipau mai ge â Israelme lunghereu di de lei; Saulbe ne baudime peireige deseutew ze, “Hegî chang makge, zai I a kûm tew makge mige takteube kau je â deset kai gu lei,” kacheu lei. Chidadege mige du tak teu mak te lei.

²⁵Zai ziemmename leine hênam ge wang gai de de lei; zai chige kedei ge ’ngkuidui bam lei.

²⁶Zai ziemmename hênamkang ’mbe gut dege, pie le lau, ’ngkuidui zâu bam de lei, kane mî de teu mak lei, deseugaibe ze penui hingbe ziegeneu.

²⁷Kane Jonathanbe â baudime dagene pe peu ne deseugaibe seu mak lei; dege pe ba ge hetui bambe tûn getuapat ze, ’ngkuichîap ge sûm gai lu pe ba pe mui ge kai de lei; zai pe mik babak pat ti de lei.

²⁸Dadege baudime ruage hangkat ne, “Ning peu ne baudime dage die sing gai ze deseu gai ze, ‘Nemai tingnaimikpui ge mâ-teupeu je deset kai ’nde lei,’ kacheu de lei,” ze kacheu de lei. Zai ziemmename penui jiesia kam di de lei.

²⁹Dege Jonathanbe ne sa ze, “A peu ne heram ze tewkahereu de lei; ’ndaizeuge a mik rebabak ti mei be pie gai ni lau, I ne aipau ’ngkuidui ze kecheîne ’ndâugaibeibe ziegeneu.

³⁰Nemai ge ziemmename leine ne penui teureime gu hereichâ penui ngaulube ze ’ndâu kam lu laîzai ’ndaizeuge yi’nteu ra lau; chunage Philistinme ruage tewchatbe ze mâgum du di’mpia mak rei daseu,” ze kacheu de lei.

³¹Chipau mai ge Mikmas gene Aijalon riâ Philistinme je penui ne tewchat te lei. Zai ziemmename penui jiesia-desang di de lei;

³²ziemmename chi hereichâ ramme peireige gua’nsa ze, meli zai getumsei ramme, getumpoine ramme nîm lu ze, kedei ge tewchat kai de lei; zai ziemmena ramme chiramme ge hejai ze teu de lei.

³³Dege penui ne Saulbe dage salia de lei, “Pie le lau, ziemmena ramme hejai teube gene Tingwang dage hemui gai la de lei,” ze acheu zeu. Zai pa ne acheu sa ze, “Ningnui â kechoabe tâ tew de lei; a dage tingchu kedibe kelatwang gai lau,” kacheu de lei.

³⁴Zai Saulbe ne sa ze, “Ningnui runne ziemmename ruagene tatrarip patchu lau, zai penui je acheu be lau, ‘Peize haimena pe gu getumsei mei zai pe gu meli mei teiwang lu aigene tewchat lu peize teu lau; zai hejai teube ne Tingwang dage hemui gai se lau,’ acheu zeu” ze kacheu de lei. Dadege ziemmena ramme haimena chipau mai tingmuî ge pe dage pe gu-gu getumsei teiwang lu chige tewchat kai de lei.

³⁵Zai Saulbe ne Tingwang dage herâtewbe-kaira tew gai de lei; chize Tingwang dage herâtewbe bâmra pa tewgairaîlangbe de lei.

³⁶Dege Saulbe ne sa ze, “Anui nemai tingmuî ge Philistinme je gua’nchukeu ze penui je hechua bapatbe riâ chang mak tâne tew’ngga ne kei lei, penui hangkat je de anui â sâu gai mak kei lei,” kacheu de lei. Zai penui ne sa ze, “Ning dage keyibe tew zu lau,” kacheu de lei. Kane tingkupeu ne sa ze, “Aige anui Hera dage wang’nna gai kei lei,” kacheu de lei.

³⁷Zai Saulbe ne Hera dage ka’mmêt te lei, “Philistinme chai I wangkeu ra de mei? Penui je Israelme ba ge nang pei gai ra de mei?” ze kacheu de lei. Kane pa ne chipau mai ge pechu kak mak tai lei.

³⁸Zai Saulbe ne sa ze, “Ailia wang lau, ningnui ziemmename gu kanguame besuitewme leine gau; zai chize nemai ge ’ndaizeuge aipau hemui ze pat ti de mei be ngau le lau.

³⁹Tingwang Israelme je tewka’nringpeu ringbe ziegene, peize a na Jonathanbe lêuzai du chai sing gu lei,” ze kacheu de lei. Kane ziemmename ruage mî de pechu samkakme ga tai de lei.

⁴⁰Dege pa ne Israelme leine je rang ze, “Ningnui katlam ’mbia bam ra, zai I benai a na Jonathanbe kêda ’mbia bam ra lei,” ze kacheu de lei. Dadege ziemmename ne, “Ning dage yira-rabe tew zu lau,” kacheu de lei.

⁴¹Chidadege Saulbe ne rang ze, “Hei Tingwang Israelme Rapeu gau, ’ndaitew ze ning guâ ka’ngguapeu je nemai nang samkak mak lau? Aipau kemaube ze a dage mei nune a na Jonathanbe dage mei bam zai â, Hei Tingwang Israelme Rapeu gau, Urim ze pei lau; kane kemaube ze Israelme peireige zai â Thummim ze pei lau;” ze kacheu de lei. Zai Jonathanbe benai Saulbe peireige keu gai di de lei, zai baudime â ’nreipat ti de lei.

⁴²Dadege Saulbe ne rang ze, “I benai a na Jonathanbe kakge hedachak le lau,” kacheu de lei. Zai Jonathanbe peireige kêu gai de lei.

⁴³Dadege Saulbe ne Jonathanbe dage rang gai ze, “Nang ne ’ndaikau tew gai ’ndi mei be achu ranglia lau,” kacheu de lei. Zai Jonathanbe ne pechu rang ze, “I ne a ba ge bambe hetuitûn ne ’ngkuidui kecheîne ’ndâu gai ’ndi de lei; aige I lamui lei, I chai ra de lei,” kacheu de lei.

⁴⁴Zai Saulbe ne sa ze, “Hera ne achu aigum ze tew gai de lei, zai chigum tewsuâ gu rei lei, nang chai sing gu de lei, Jonathanbe gau,” ze kacheu de lei.

⁴⁵Dege ziemmename ne Saulbe je rang ze, “Jonathanbe Israel ge kengambe kedibe tewgaipeu chai ra mei? Mâdau de ra mak lei! Tingwang ringbe ziegene pe peî ge hetamkie katte kedei ge keu gai ra mak lei; nemai ge Hera dage pa nguatatew gai de lei,” kacheu lei. Dadege ziemmename ne Jonathanbe je ’nripat kai de lei, dadege pa chai mak tai de lei.

⁴⁶Dadege Saulbe Philistinme je guaka’nchube gene hang de lei, zai Philistinme â penui bâm ’mbe tat ti de lei.

⁴⁷Saulbe ne Israelme peireige kaheguangbe tei gai dege, pe teureime je pe mik ’nsangne ge pa ka’nggi de lei, Moabme je ’nggi, Ammonme je ’nggi, Edomme je ’nggi, Zoba gu heguangme je ’nggi, zai Philistinme je ’nggi zeu; pa ne tatkaibe bâm leine ge penui je duîtat bam de lei.

⁴⁸Zai kuugiereu ze Amalekme je duî lu de lei, zai Israelme je ’nchi-chine penui je tewkahereume ba gene pa ne ’nripat kai de lei.

⁴⁹Chuna Saulbe name â Jonathanbe, Ishbibe, zai Malkishuabe lei; zai pe na ’mpuimi kena ji â aize lei: Meraipui ji Merable lei, zai henabipui ji ze Mikalle lei.

⁵⁰Zai Saulbe nâu ji â Ahino-amle, Ahimazbe na lei. Zai pe gu hereikangme gu pemuiteipeu ji â Abnerbe, Nerbe na Saulbe peu, peudâpeu na de lei.

⁵¹Kisbe ze Saulbe peu lei, zai Abnerbe peu â Nerbe, Abielbe na lei.

⁵²Saulbe ting leine ge Philistinme dage herei kechibe ’nggi bam lei; zai Saulbe ne ziemmena peranchibe kau, zai gekuube kau ngaudau dege â chigumbe kau je â pe hang tei gai lei. -