Read Zeme Naga 1 SAMUEL 16 Bible Online

1 SAMUEL 16 - Zeme Naga bible

1 SAMUEL 16

¹Tingwang ne Samuelbe je, “’Ndaitie ge Saulbe peireige nang desui ra lau, Israelme peireige heguang changbe gene pechu I tuâpat’ndibe ngau lu zeu? Ning gu mâkie ge taudui kaipui gai lu ze tatchu lau; Bethlehemme zat Jessibe dage ningchu I lang gai gu lei, pe name ruagene a hangge heguang I pei gai ’ndaseu,” ze kacheu de lei.

²Zai Samuelbe ne, “’Ndaigum ze I tatchi ra lau? Saulbe seu zai â pa achu tewchat ku lei,” ze kacheu de lei. Zai Tingwang ne, “Getum meleupoine ning dage tei lu ze, acheu lau, ‘Tingwang dage herâtew ra I wang de lei,’ zeu.

³Zai Jessibe je herâtewbe ge ’nnâ gai be lau, zai nang ’ndaikau tew ra mei be ningchu I teilia gu lei; zai I ne ning dage pe ji kûgaipeu je pechu a hangge nang ’nnuk kai ra lei,” ze kacheu de lei.

⁴Tingwang ne samdiegaibe Samuelbe tew de lei, zai Bethlehem ’mbe wang de lei. Namdi ge gechîngme kelippin ze pe dage wang lu ze, “Keyibe tew ra nang wang mei?” ze kacheu de lei.

⁵Zai pa ne, “Keyibe tew ra I wang lei; Tingwang dage herâtew ra I wang de lei, ningnui runne ningnui je tew’nchi le zu lau, zai herâtewbe ge a dage wang lau,” ze kacheu de lei. Zai pa ne Jessibe benai pe name je tew’nchi gai lu, penui je herâtewbe ge ’nnâ gai de lei.

⁶Penui wang dege, Eliabbe je pa pie gai lu, “Tingwang ne ’nnukkaipeu ze pe suage la sing de lei,” ze ’nning gai di de lei.

⁷Kane Tingwang ne Samuelbe je, “Pe luî mei nu pe kaura mei be je pie se lau, pechu I ne tuâpatbe ziegeneu; Tingwang â ziemmena gum ze pie mak daseu; ziemmena â hela luî pie lei, kane Tingwang â helung pie lei,” ze kacheu de lei.

⁸Dege Jessibe ne Abinadabbe ze kubepeu Samuelbe suage nguapat kai de lei, zai pa ne, “Aipau peu je du Tingwang ne kelâng gai me lei,” ze kacheu de lei.

⁹Dadege Jessibe Shammabe je nguapat kai de lei, zai pa ne, “Aipau peu je du Tingwang ne kelâng gai mak lei,” ze kacheu de lei.

¹⁰Zai Jessibe ne pe name hangsename je Samuelbe suage nguapat kai de lei. Zai Samuelbe ne Jessibe je, “Tingwang ne aime je kelâng gai mak lei,” kacheu de lei.

¹¹Dege Samuelbe ne Jessibe je, “Ning name leine aige la mei?” kacheu de lei. Zai pa ne, “Henalangpeu lamui rei lei, kane pie le lau, pa â meli reî lamui lei,” kacheu de lei. Zai Samuelbe ne Jessibe dage, “Lang gai bei ze peize pechu nguawang lau; pa wang mak tâne anui ’ntaukeu ra mak lei,” ze acheu bei de lei.

¹²Zai pa ne lang gai bei ze pechu nguawang de lei. Pa â satgie ze pe mikhuâ yi ze rehangyi lei. Zai Tingwang ne rang ze, “Chu lu pechu ’nnuk kai zu lau, aize pa daseu,” acheu bei de lei.

¹³Dege Samuelbe taudui kaibe meli’nsei kie tei lu, pechu pe sime zuilung gene ’nnuk kai de lei. Chigene seu ze Tingwang gu Herui rezie chi-desang ze Dabidbe peireige wangkeu bam di de lei. Dege Samuelbe chu lu Rama ’mbe tat ti de lei.

¹⁴Chuna â Tingwang gu Herui Saulbe dagene tat ti de lei, zai Tingwang dagene herui kesiabe ne pechu tewsâ de lei.

¹⁵Zai Saulbe guâ ka’ngguame ramme ne pechu rang ze, “Pie le lau, chuna â Tingwang dagene herui kesiabe ramme ne ningchu tewsâ de lei.

¹⁶Peize ning suage bamme guâ ka’ngguame je anui Wangpeu ne samdie gai be lau, peize ziemmena ’nra kebatchime je peuwang ra hangge zeu; zai Hera dagene herui kesiabe ning peireige wang dezai pa ne ’nra kebat kai bei ze nang temi ra hangge zeu,” ze acheu bei de lei.

¹⁷Dadege Saulbe ne pe guâ ka’ngguame je, “’Nra kebatchime a hangge peu gai lu, a dage pechu nguawang zu lau,” kacheu de lei.

¹⁸Rehangme ruage hangkat ne kak ze, “Pie le lau, Bethlehem’mpeu Jessibe na hangkat ’nra teichibe kau, ziemmena gekuube kau, herei tewchibe kau, gekuube sam sachibe kau, zai ziemmena keyibe kau je I ngau de lei; zai Tingwang pe dage lamui lei,” ze kacheu de lei.

¹⁹Chidadege Saulbe ne sampaume je Jessibe dage lang gai ze, “Ning na Dabidbe melireîpeu je a dage lang gai lau,” acheu bei de lei.

²⁰Zai Jessibe ne hekunmerângne tingku punggit lu, zai wain hemeigeibung benai kemeipoine tei lu, penui je Saulbe ki lam’mbe pe na Dabidbe ji gene lang gai de lei.

²¹Zai Saulbe dage Dabidbe wang lu, pe guâ ka’ngguabe bâm ge gut te lei. Zai Saulbe ne pechu hung-kadesang de lei; zai pa â pe gu hereipuâ teipeu chang di de lei.

²²Zai Saulbe ne Jessibe dage sam lang gai ze, “Peize Dabidbe â a dage bam de zu lau, a mikngau ge ka’nggiabe pa ngau lu daseu,” ze kacheu de lei.

²³Zai Tingwang dagene herui kesiabe Saulbe peireige wanggai-gaibe luage Dabidbe ne ’nrabung tei lu chize pe ba ne kebat kai de lei; dadege Saulbe je tewrechi gai de lei, zai yi di de lei; zai pe dagene herui zai kesiabe rimna di de lei.