Read Zeme Naga 1 SAMUEL 18 Bible Online

1 SAMUEL 18 - Zeme Naga bible

1 SAMUEL 18

¹Saulbe je pa ’mpau kam dege, Jonathanbe keringbe ze Dabidbe keringbe ge heluagit kai di de lei, zai Jonathanbe ne pe runne pe keringbe je gum ze pa pechu hung de lei.

²Zai Saulbe ne chipau mai ge pechu tei’ndi lei, zai pe peu ki lam’mbe wang dai ra pechu pei ta di de lei.

³Chidadege Jonathanbe ne Dabidbe dage puinakattew ra samhat kai de lei, pe gu keringbe je gum ze pechu hungbe ziegeneu.

⁴Zai Jonathanbe pe dage mechuapui bambe luakpat lu ze, chize Dabidbe je pei ’ndi de lei, zai pe gu hereipuâ zai pe gu hiazutkie benai bai’mpi zai pe kiakâk ’nsangdu pei ’ndi de lei.

⁵Zai Dabidbe tatpat ze Saulbe ne pechu langgaibe bâm leine ge pa duîtat bam de lei; dadege Saulbe ne hereitewme leine peireige pechu sum gai de lei. Zai aipau ze ziemmename leine mikngau ge zai Saulbe gu tâka’ngguame leine mikngau ge du yi di de lei.

⁶Dabidbe Philistinme je tewchat lu helatwang ze penui keloa ’mbe wang dege Israelme gu namdi leine gene ’mpeumi ramme, heleutew ze, zai lim ze heguang Saulbe je hedau ra ’ntoî ramme tei lu penui suiyibe leutew ze, zai ’nra zat ramme tei lu suidau de lei.

⁷Zai ’mpeumi ramme penui suiyi’nta ze kat-kat dage heleutew de lei. “Saulbe ne changme je gî lu de lei, zai Dabidbe ne chang kereume je gî lu de lei,” ze heleutew de lei.

⁸Zai Saulbe pe lumpum-desang di de lei, zai aipau sam zene pe lungsui tewka’nsia de lei; pa ne sa ze, “Penui ne Dabidbe je chang kereume hang chau gai zai penui ne a peireige changme hang runne chau gai lei; zai ’ndaikau kêdabe pa larei lau? Heguangram mak zai neu?” ze kacheu de lei.

⁹Zai chipau mai gene Saulbe Dabidbe je miksungpie di de lei.

¹⁰Zai bechai mai dege Hera dagene herui kesiabe Saulbe peireige wang gai di de lei, zai pe ki ge pa kebiengkeleulia bam di de lei, Dabidbe â ’nrabung kebat ze bam lei, patingnai’nsangne pa tew tew gum zeu. Saulbe â pe ba ge hengeu tei bam lei;

¹¹zai Saulbe ne hengeu hia gai de lei, “I ne Dabidbe je hingbie ge hiatemi gai gu lei,” ze pa ka’nningbe ziegeneu. Kane Dabidbe lua na ’mbia di lei.

¹²Saulbe â Dabidbe je hing di de lei, Tingwang ne Dabidbe dage bam zai pe dagene Tingwang â rimnadibe ziegeneu.

¹³Dadege Saulbe ne pechu lupat lu, changme ruage hereikang haîmuiteipeu hang sum gai de lei, zai ziemmena suage pa pat-gut ze bam di de lei.

¹⁴Zai Dabidbe â pa tâtewgaibe leine ge kengambe ngau de lei; pe dage Tingwang bambe ziegeneu.

¹⁵Zai pa â misongga kengambe ngau lu de lei be Saulbe ngau lu dege pa hing di de lei.

¹⁶Kane Israelme benai Judaram ’nteumena ne Dabidbe je hung di de lei, penui ruage pa â pat-gut ze bam dadegeu.

¹⁷Dege Saulbe Dabidbe dage sa ze, “Aige a na chîngpui Merable lamui lei; ning nâu hangge pechu I pei bu lei; a hangge kuugiereu ze bam zai Tingwang gu herei gene nang herei lau,” ze kacheu de lei. Saulbe â, “Peize pe peireige a ba keu gai mak ze, kane Philistinme ba ne pe peireige keu gai lau,” ze ka’nningbe ziegeneu.

¹⁸Zai Dabidbe ne Saulbe dage sa ze, “I ze châu, zai chaume ze a sikiname Israelme ram ge a peu kibaume lau, dezai heguang chapeu I chang le ra hangge zeu?” ze kacheu de lei.

¹⁹Kane chipau luage Merable, Saulbe na heleu’mpui je Dabidbe dage peigairabe luage, pechu ze Meholath’mpeu Adrielbe nâu hang pei gai ’ndi lei.

²⁰Chuna â Saulbe na heleu’mpui Mikalle Dabidbe je hung di de lei; zai penui ne Saulbe je salia bei ze, chize ne pe suitew’mmi bei de lei.

²¹Saulbe â, “Pechu pe hangge I pei be ra de lei, dezai pe hangge pa ze ’mpia chang ra hangge zeu, zai Philistinme bau pechu ’nggi ra hangge zeu,” ze ka’nning lei. Chidadege lua pakenabe Dabidbe je Saulbe salia de lei, “Chuna â nang a chapeu chang ra de lei,” ze acheu zeu.

²²Zai Saulbe ne pe guâ ka’ngguame je samdie gai ze, “Dabidbe je reine ze ’mpau lau, zai acheu sa lau, ‘Pie le lau, heguang ne ning dage pe suiyi la lei, zai pe guâ ka’ngguame leine ne ningchu hung la lei; chuna â chidaze heguang chapeu chang de zu lau,’ ze acheu zeu,” ze kacheu de lei.

²³Zai Saulbe guâ ka’ngguame ne chipau sam ramme ze Dabidbe kun ge salia gai de lei, zai Dabidbe ne, “I kelaksiabe kau, zai heji dimakbe kau lei be ngaukâ lu ze, heguang chapeu chang ra mâ-kecheîne hang ningnui ’nning gai mei?” ze kacheu de lei.

²⁴Zai Saulbe guâ ka’ngguame ne pechu rang ze, “Aigum ze Dabidbe ne sa de lei,” ze acheu bei de lei.

²⁵Dege Saulbe ne sa ze, “Aigum ze Dabidbe je ningnui salia ra lei, ‘Heguang ne kahegiabe kela lunei mak lei, Philistinme ziemmena haîme gu gei rumpatbe lunei zangnêu, dezai heguang teureime je hekûm lu le ra hangge zeu,’ ze acheu zeu” ze acheu bei de lei. Chuna â Philistinme ba gene Dabidbe je tewkau gai ra Saulbe ’nning gai de lei.

²⁶Zai aipau sam ramme pe guâ ka’ngguame ne Dabidbe je salia bei de lei, chize ne heguang chapeu changrabe hangge Dabidbe lungsui tew’mmi’nteu gai bei de lei. Pehî wangchang makge,

²⁷Dabidbe chu lu ze pe gu ziemmena ramme benai tat ti de lei, zai Philistinme ziemmena haî na je tewchat lu de lei; zai Dabidbe ne penui gei rumpatbe teiwang de lei, heguang chapeu chang ra hangge heguang ne ziemmena riak peibeibe luigum zeu. Zai pe na heleu’mpui Mikalle je pe nâu hang Saulbe ne pei gai de lei.

²⁸Kane Dabidbe dage Tingwang bam lei be Saulbe chî lu dege, zai Israelme leine ne pechu hung lei be chî lu dege,

²⁹Saulbe â Dabidbe je hingbi-bi di de lei. Dadege Saulbe â Dabidbe teurei chang bam di de lei.

³⁰Chidadege â Philistinme gu heguangsinme ramme herei ra zuapat te lei, zai penui zuapat tâne Dabidbe â Saulbe guâ ka’ngguame leine sua â duîtat’ngkie bam de lei; chidadege â pe ji je hengêutew’ndi-desang ze bam di de lei. -