Read Zeme Naga 1 SAMUEL 19 Bible Online

1 SAMUEL 19 - Zeme Naga bible

1 SAMUEL 19

¹Zai Saulbe ne pe na Jonathanbe benai pe guâ ka’ngguame leine je, Dabidbe je penui tewchat ne ra de lei ze salia lei. Kane Saulbe na Jonathanbe â Dabidbe je ’nchâ-kadesang lei.

²Zai Jonathanbe ne Dabidbe je rang ze, “A peu Saulbe ne ningchu tewchat ra peu la de lei; chidaze hechua dezai ning runne ningchu ’ntîng le lau, zîngbe bâm ge bam ze ’mbai de lau,

³zai I pat lu a peu taige helu ge nang ’ndaige la mei be bâm ge I bam gu lei, zai nang tedeu ge a peu je I ’mpau gu lei, zai mâge â I chî lu zaine â ningchu ranglia gu lei,” ze kacheu de lei.

⁴Zai Jonathanbe ne pe peu Saulbe je Dabidbe je saka’mmi de lei, zai pechu rang ze, “Peize heguang ne pe guâ ka’ngguapeu Dabidbe peireige hemuitew se lau; pa ne ning peireige hemui gai mak daseu, zai pa tatew ze ning hangge tâ’ngguagaika’mmibe daseu;

⁵pa keringbe pe ba ge tei lu ze Philistin’mpeu je pa ne tewchat lu, zai Israelme leine hangge Tingwang ne keduîbe kedibe tew gai bei la daseu. Nang ne chize ngau de lei, zai hesuiyika’nta de lei; chidaze ’ndaitew ze pe mâugame jai peireige kesiatew ze mâ-pedeu ga ze Dabidbe je tewchat ra lau?” ze kacheu de lei.

⁶Zai Jonathanbe kuâ Saulbe ’ngking gai de lei; Saulbe ne deseu gai ze, “Tingwang bambe ziegene pechu tewchat ra mak lei,” ze kacheu de lei.

⁷Zai Dabidbe je Jonathabe ne kû lu, pechu airamme leine Jonathanbe ne teilia bei de lei. Zai Jonathanbe ne Dabidbe je Saulbe dage nguawang gai de lei, zai besua’ngka gum ze pa pe dage bam de lei.

⁸Zai kahereibe bam kadai de lei, zai Dabidbe zuapat lu Philistinme je ka’nggi de lei, zai penui ruage misonggame je gîchat lu de lei, dadege pe suagene penui pak ti de lei.

⁹Dadege Tingwang dagene herui kesiabe Saulbe peireige wang gai di de lei, pe ba ge hengeu tei lu pe ki ge pa ’ntaubambe luage zeu; zai Dabidbe â ’nrabung kebat bam lei.

¹⁰Zai Saulbe Dabidbe je hengeu ne hingbie ge hiatemi gai ra peu de lei; kane Saulbe je pa ’mbia di lei, dadege hengeu ze pa hingbie ge hia gai de lei. Zai Dabidbe pak ti de lei, zai ’nreitat ti de lei.

¹¹Chipau mai tingmuî ge hepâupaume je Saulbe Dabidbe ki lam’mbe pechu rik ra lang gai de lei, dezai hechua dezai pa pechu tewchat ne ra hangge zeu. Kane Dabidbe nâu, Mikalle ne pechu ranglia ze, “Nemai tingmuî ge nang keringbe tew’nring mak tizaine â, ’nchuamai ge ningchu tewchat ku de lei,” kacheu de lei.

¹²Dadege Mikalle ne Dabidbe je kemuicheiki gene ’mpatkeu de lei; zai pa pak’nreipat ti de lei.

¹³Mikalle ne mâ-luî tei lu jei peireige ’njei gai bei de lei, zai kemei gêu ne tewbe hekum ze chi mâ-luî peireige kai lu, paî ne tapchim gai bei de lei.

¹⁴Zai Saulbe ne hepâupaume je Dabidbe je teiwang ra lang gai dege, pa ne rang ze, “Pa â ’nrâ la lei,” acheu bei de lei.

¹⁵Dadege Saulbe ne hepâupaume je Dabidbe je pie ra lang gai ze, “Pechu a tailam jeî gene teiwang lau, dezai pechu I tewchat ra hangge zeu,” ze acheu salia bei de lei.

¹⁶Zai hepâupaume gut dadege, pie le lau, jeî ge mâ-luî ze pe peî ge kemei gêu ne hekum hang tew lu ze laleu lei.

¹⁷Saulbe ne Mikalle je, “Aigum ze ’ndaitew ze nang achu duai ze a teureipeu pak’nreitat te ra hangge pechu pei lau?” ze kacheu de lei. Zai Mikalle ne Saulbe je kak ze, “Pa ne achu rang ze, ‘Achu tat ra pei lau, ’ndaitew ze ningchu I tewchat ra lau,’ ze kacheu de lei,” ze kak lei.

¹⁸Chuna â Dabidbe â pak ti ze ’nreipat lu de lei, zai Rama ge Samuelbe dage pa wang de lei, zai Saulbe ne pe peireige tewgaibe leine pechu ranglia bei de lei, zai pa benai Samuelbe tat lu Naioth ge bam di de lei.

¹⁹Zai chize Saulbe je ranglia ze, “Pie le lau, Dabidbe â Rama ge Naioth ge la de lei,” ze acheu bei de lei.

²⁰Dege Dabidbe je teiwang ra Saulbe hepâupaume je lang gai de lei; zai kemeume bau, Samuelbe ne penui peireige besuitew ze sap lu kemeusam sa bambe penui ngau lu dege, Saulbe gu hepâupaume peireige Hera gu Herui wang gai ze, penui du kemeu sam sa bam di de lei.

²¹Chize Saulbe je ranglia bei dege, pa ne kêdame sam paume je lang gai kadai de lei, zai penui du kemeusam sa bam di de lei. Zai Saulbe ne lua pakechumbe sampaume je lang gai kadai de lei, zai penui du kemeusam sa bam di de lei.

²²Dadege pe runne Rama ’mbe tat ze, Seku ge dekuaki dibe ge wang de lei; zai pa ne ’nneu ze, “’Ndai’ngge Samuelbe benai Dabidbe la lau?” kacheu de lei. Zai hangkat ne rang ze, “Pie le lau, penai â Rama ge Naioth ge la lei,” acheu bei de lei.

²³Zai pa chi Rama ge Naioth ’mbe tat ti de lei; zai pe peireige du Hera gu Herui wangchang di de lei, zai pa tat ze Rama ge Naioth wangchang mak tâne kemeusam sa bam di de lei.

²⁴Zai pa du pe paî gâupat lu Samuelbe dage kemeusam sa bam di de lei, zai ’nrîmbeting luî zai kemuîbe ting tâluî pa pumlâng tuâtingbabak kai de lei. Chipauziegene acheu ze sa gai de lei, “Saulbe du kemeume ruage lamei?” kacheube zeu. -