Read Zeme Naga 1 SAMUEL 2 Bible Online

1 SAMUEL 2 - Zeme Naga bible

1 SAMUEL 2

¹Hannale ze du kellum ze kacheu de lei, “Tingwang dage a lung ’ngngûchu de lei; a ranchibe ze Tingwang dage teichu’ngngu gai de lei. A mui ne a teureime je kakerai de lei, ning gu tewka’nringbe ge a sui-yi-ka’ntabe ziegeneu.

²“Tingwang gum ze mî de ka’nchibe kau ’ngga lei, ning peireige mî de ga lei; anui Rapeu gumbe ’nseugairabe chutum katte ’ngga lei.

³Kedikuâ-kua dai ta lau, ning mui gene gechîrettewbe peize pat dai ta lau; Tingwang â mâ-gechîbe Hera daseu, zai pa ne tâtewbe ramme ne ka’nchu lei.

⁴Peranchime gu bai’mpi ze bet kam de lei, kane peran-game ze â ranchibi-bi la de lei.

⁵Ka’nggeume â penui runne ne tingku hangge hiak kai ’nde lei, kane ka’njeime â ’njei ta de lei. Pe na gabe kau ne hangsena lungkeu lu de lei, kane pe na misongga bambepui je â sâu gai de lei.

⁶Tingwang ne tewchat zai tew’nring gai lei; pa ne Kechaiberam ’mbe teikeu gai zai teichu gai lei.

⁷Tingwang ne kelaksia ra tew gai zai lungyi ra tew gai lei; pa ne tei’nnakeu zai pa ne teichu’ngngu gai lei.

⁸Kedeiniamoîne gene kelaksiame je pa ne teichu gai lei, kegame je pa ne timbuntûm gene teichu gai lei, heguangsinme benai ’ntau ra, zai hengêutewbe bâm nguaheu ra hangge zeu, kedeiloa ramme ze Tingwang gu daseu, zai chiramme peireige pa ne kedeirei sum gai lei.

⁹“Pa ne pechu ’nnumtewme pî ramme rehei gu lei; kane helungriaksiame je â kemuîbe gene tew’ngga ’ndu lei; ziemmena pe ranchibe ne ngam lak lei.

¹⁰Tingwang je ka’nggime je â tewdesuirui ’ndu lei; penui peireige tinggîm gene pa ’nrahim gai gu lei. Tingwang ne tingmik ’nsangne samram gu lei; pa ne pe gu heguangme je peranchi pei gu lei, zai pa ne ’nnukkailume gu tâtewchibe teichu’ngngu gai gu lei,” ze acheu zeu.

¹¹Dadege Elkanabe pe ki lam Rama ’mbe tat ti de lei, zai ’mpeumi napoine ze Tingwang guâ ’nggua ze tingkupeu Elibe masuage bam di de lei.

¹²Chunage Elibe na ramme â ziemmena ’ntakû kau ramme lei; Tingwang je gechîbe ’ngga lei.

¹³Ziemmename mige â herâtewbe peipatbe ge tingkume ne tewbe sie â, tingkume guâ ka’ngguapeu wang ra chang gu, zai hemei langbe luage mâ-ramteube terui ruang-chum kau pe ba ge tei lu

¹⁴zai luaripoine ge mei châli ge mei luâri kedibe ge mei, heli ge mei ze chize pa kechi gai lei; chi mâ-ramteube terui zene ramchube leine tingkupeu ne pe hangge lu lei. Chigum ze Shilo ge Israelme wangme leine ze penui chigum ze tew de lei.

¹⁵Chipau peireige pechâ ramme rûgairabe suage tingkume guâ ka’ngguapeu wang lu herâtew ra wangme dage acheu sa de lei, “Tingkupeu hangge hemei rû ra pei zu lau; pa â ningnui dagene hemei sualube ze lu ra mak daseu, kane langmakbe runne lu gu lei,” ze acheu zeu.

¹⁶Zai chipaupeu ne pechu, “Peize penui ne pechâ ramme rû raî le lau, dezai ningnui ne luneibe riâ lu le lau,” ze acheu dezai pa ne, “Mak lei, chize chuna pei zu lau; nang ne pei maktizai â ’nchi-chine I ne lu ’ndu lei, ze acheu-cheu lei,”

¹⁷Aigum ze Tingwang mikngau ge rehangme bau gu hemui ze di-desang di de lei, ’mpuimi ramme zene Tingwang gu peipatbe ze naîlatewgaibe ziegeneu.

¹⁸’Mpeumi napoine Samuelbe â banutpaî mechua kai lu Tingwang guâ ’nggua bam de lei.

¹⁹Zai pe pui ne pe hangge mechuapui cheibe tew lu kum’nsangne pe napeu je ngua lu tingkum gu herâtewbe peipat kai ra hang dezai pe hangge teihang-hang lei.

²⁰Dadege Elibe ne Elkanabe benai pe nâu je ’nnam gai ze, “Tingwang ne ningchu aipau pui dagene ning na ramme pei gai de lei, Tingwang hangge pa ne peipatkaibe ziegeneu,” ze acheu-cheu lei. Dadege chigum ze penui ki lam’mbe penui helatwang dai di di de lei.

²¹Zai Tingwang ne Hannale je ’ngkiâmie gai bei de lei, zai pa ’mpung ze ’mpeumi hangchum zai ’mpuimi hangna lungkeu de lei. Zai ’mpeumi napoine Samuelbe â Tingwang masuage chîngchu di de lei.

²²Chuna â Elibe â chîng-kezuzie di de lei, zai pe name ne Israelme leine dage tâtewgaibe leine pa seu kam lei, zai ’ndaigum ze ka’nduibe hetiamki gutbe kemui ge ’mpuimi ramme ka’ngguame je nguajei mei be du pa seu kam lei.

²³Zai pa ne penui je rang ze, “’Ndaitew ze ningnui aigumbe tâ tew lau? Ziemmename leine dage ningnui tatew kesiabe I seu di de lei, ze kacheu de lei.

²⁴Mak lei, a name gau, Tingwang gu ziemmena ramme ne saruatattibe sampau geseube ze keyibe sam mak lei.

²⁵Ziemmena ne ziemmena dage hemui gai dizai â, Hera ne pe hangge sapgu gu lei; kane ziemmena ne Hera dage hemui gai dizai â, châu ne pechu ’ngngâ be ra lau?” ze kacheu de lei. Kane penui peu kuâ penui ’ngking mak lei; penui je tewchatrabe ze Tingwang ’nning di dadegeu.

²⁶Chuna â ’mpeumi napoine Samuelbe ze chîngchu ze Tingwang benai ziemmena mikngau ge ka’nggiabe puibi-bi di de lei.

²⁷Zai Hera gu ziemmena hangkat Elibe dage wang ze, pechu, “Ijipram ge Pharaobe ki ge kebangtew’ngka ge penui dage I achu liâ gai bei lei.

²⁸Zai Israelme zat leine gene a gu tingku chang ze, a gu herâtewbe-kaira ’mbe hang ze, mâ-perîmyibe rû ra, a suage tingkume puâ kai ra, pechu I kelângpat kai de lei; zai Israelme zatme dage hemi gene a gu peipatbe leine ning peu ki ge I pei gai de lei.

²⁹’Ndaitew ze chuna ne a gu herâtewbe ramme benai a gu peipatbe ramme I ne samdiegai’ndibe ramme ze katekumbe mik ne pie lau, zai ’ndaitew ze a peireige ning name ze hengêutew ze Israelme ne peipatbe ramme yilangbe gene ning runne tewchâmpat ze bam ra pei gai lau?

³⁰Chidadege Tingwang Israelme Rapeu ne saba gai de lei: ‘Ning ki benai ning name ki suage betingbeta gut ze pat ra I samhat kai de lei,’ acheu zeu; kane chuna â Tingwang ne rang lei: ‘A dagene tat’ndeu de zu lau; achu hengêutewme je I hengêutew gu, zai achu ngauka’nname je I ngau’nna gu lei.

³¹Pie le lau, ning ranchibe benai ning peu ki ranchibe I ne lutua ’nderabe ting ze patingnaimikpui wang mui de lei, chidezai ning ki ge gechîngme bam dai mak ra hangge zeu.

³²Chidezai keheube leine Israelme peireige peigairabe ze nang lungkahereube luage ngau’nchie gu lei; zai ning ki ge gechîngme betingbeta bam dai ra mak lei.

³³Ningnui je I ne a gu herâtewbe-kaira gene deî’ngga makrame pe mik hap’nsia ’ndi ze pe lung hereu ze bam ra I ’nsak kai gu lei, zai ning ki gene hingpatme leine je ziemmename gu hiazutkie gene chai ra tew gai gu lei.

³⁴Zai aipau ning na kena, Hophnibe benai Phinehabe peireige kêugairabe ze ning hangge ’nchetrabe chang ra de lei: Penai hangna ze mai kat gene chai gu lei.

³⁵Zai a hangge tingku ’nnumtewduibe kau, a lung ge I ka’nningbe luigum ze tewrabe kau je I teichu gai gu lei; pe hangge I ne gesangsingbeki tew gai gu, zai betingbeta I ne ’nnukkai’ndibe suage pa gut ze pat ze bam gu lei.

³⁶Zai ning ki ge sâudiakkaime leine ne gepûtgeî kat hang benai tingkuliâp kat kie ra hang wang gu lei; zai “Achu tingkupeu gu bâm ramme ruage bâm kat ge achu kai lau, hangkat bâm ge â kai lau, chidezai tingkuliâp I teu le ra hangge zeu,” ze acheu kie gu lei,’ zeu,” ze kacheu de lei.