Read Zeme Naga 1 SAMUEL 20 Bible Online

1 SAMUEL 20 - Zeme Naga bible

1 SAMUEL 20

¹Dege Dabidbe Rama ge Naioth gene paktat lu, Jonathanbe suage wang lu sa de lei, “I ne ’ndaikau tew gai ’ndi lau? A mâu ze ’ndaikau lau? Zai ning peu suage a gu hemui ze ’ndaikau lau, pa a keringbe peube zeu?” ze acheu zeu.

²Zai pa ne pechu rang ze, “Mâ de mak lei, nang chai ra mak lei. Pie le lau, a peu â a dage mâ de salia mak ze, kedibe du, kecheibe du mâ de tew mak lei; zai ’ndaitew ze a dagene a peu aipau ze tei’mbai ra lau? Chigum me lei,” ze kacheu de lei.

³Kane Dabidbe ne kak ze, “Ning mikngau ge ngauka’nggiabe I ngau lei be ning peu ne chikâ lamui lei; zai pa ne, ‘Peize Jonathanbe ne aipau ze chî se lau, pe suîhereu mak ra hangge zeu,’ ze ka’nning lei, ze kacheu de lei. Kane pelingsing ze Tingwang bambe ziegene zai nang bambe ziegene, I benai kechaibe kakge kiâm kat runne de lei,” ze acheu bei de lei.

⁴Dege Jonathanbe ne Dabidbe je rang ze, “’Ndaikau nang ne rang mei I ning hangge tew gai gu lei,” ze kacheu de lei.

⁵Dabidbe ne Jonathanbe je rang ze, “Pie le lau ’nchuamai â hekêu tenang mai lei, zai heguang dage bâmra ge I ’ntau mak ta ra mak lei; kane achu tat ra pei lau, dezai pakechumbe mai hegî riâ changbe a runne helu ge ’mbai de ra hangge zeu.

⁶Ning peu ne achu ’nning-desang dizai â, acheu ze salia be lau, ‘Dabidbe â pe gu namdi Bethlehem ’mbe paktat ra ’mpat kai ra achu kie-kadesang lei; chige pe kiduîme leine hangge tingkum gu herâtewbe la daseu,’ ze acheu be lau.

⁷Pa ne, ‘Yi de lei,’ acheu dizai â chize ning guâ ka’ngguapeu hang yi gu lei; kane pe lumpum zaine â kesiabe pa ka’nning de lei be chî le lau.

⁸Chidaze ning guâ ka’ngguapeu je yi ze tâtew gai lau, nang ne ning guâ ka’ngguapeu je ning dage samhatkaibe ka’nchibe tew gai lu daseu. Kane a dage kemaube la lei zaine â, nang ne achu gî ’ndu lau?” ze acheu bei de lei.

⁹Zai Jonathanbe ne sa ze, “Mâ de mak lei! Ning peireige kesiabe a peu ne ’nsapkaibe keu gai gu lei be I chî lu zai â, ningchu I rang mak ra semei?” ze kacheu de lei.

¹⁰Dadege Dabidbe ne Jonathanbe je rang ze, “Ning peu ne ningchu sam kak’nsiarak kai lêuzai châu ne achu salia ra lau?” kacheu de lei.

¹¹Zai Jonathanbe ne Dabidbe je rang ze, “Kei lei, ’nduloa ’mbe anai tatpat kei lei,” ze acheu bei de lei. Dadege penai hangna ’nduloa ’mbe zuapat ti de lei.

¹²Zai Jonathanbe ne Dabidbe je, “Tingwang Israelme Rapeu ne peize sakki chang lau! ’Nchuamai chuna hî ge, zai pakechumbe mai ge I ne a peu je ’nneu gai dezai, pie le lau, pa ne Dabidbe lam’mbe keyibe teilia dizai â chize ningchu sam lang gai ze salia mak ra mei?

¹³Kane kesiabe tew ra a peu pe suiyi gu semei, zai chize ningchu I ranglia mak ze, zai nang hereu mak ze tat te ra ningchu I langtua mak zaine â, Tingwang ne Jonathanbe je chigum tew lau, peize a peireige tew’ngkeu lau. Peize Tingwang ning dage bam lau, a peu dage bam gum zeu.

¹⁴I ring ze laleu rei lei zai â, I chai mak ra hangge Tingwang kehungbe achu teilia lau;

¹⁵zai a ki gene nang ning lung peigaibe betingbeta hang râmtap se lau. Tingwang ne Dabidbe teureime leine je kedeirei gene tew’ngga dezai,

¹⁶peize Dabid ki gene Jonathanbe ji ze lutua se lau. Zai Dabidbe teureime peireige Tingwang ne peize hekûm lu lau,” ze kacheu de lei.

¹⁷Zai Jonathanbe Dabidbe je pechu pa kehungbe gene kadeseube tâ tew gai kadai de lei, pa pechu pa keringbe je gum ze hung dadegeu.

¹⁸Dadege Jonathanbe ne pechu rang ze, “’Nchuamai â hekêu tenang mai lei; zai ningchu â ’nningdau bam gu lei, ning bâm ze perua bam gu daseu.

¹⁹Zai pakechumbe mai ge ningchu ’nning-desang gu de lei; dezai nang ka’mbaibe bâm ge tat lu ze pehî na da zaine, ning runne ’mbai zu lau; zai katlam’mbia tingchukoa-seu ge bamkuâ lau.

²⁰Zai chipau taihia ge bai’mpitu kechum I kap kai gu lei, mâ-ka’nchetbe ge kap gum zeu.

²¹Zai pie le lau, rehang’mpoine je I lang gai gu lei, ‘Tat ze bai’mpitu peu le lau,’ acheu salia gai lu zeu. I ne rehang’mpoine je, ‘Pie le lau, ning taige bai’mpitu ramme la de lei, chiramme ze tei le lau,’ acheu dizaine â, nang wang ra de lei, Tingwang bambe ziegene ning hangge keringbe de lei, zai mâ de mi hing ra ga lei.

²²Kane rehang’mpoine je, ‘Pie le lau, bai’mpitu ramme ze ning sua ’nzûtat te lei,’ ze I acheu dizaine â, tatchu lau; Tingwang ne ningchu langtua gai daseu.

²³Zai I benai nang ne sam sagaibe deu hangge, pie le lau, Tingwang â nang benai a kakge betingbeta lamui lei,” ze kacheu lei.

²⁴Dadege Dabidbe â ’nduloa ge pe runne ’mbai di de lei, zai hekêu tenang pat dege heguangme mâ-teu ra ’ntaukeu de lei.

²⁵Heguang pebâm peireige kêdabe lua gum ze hingbie taige bambe bâm ge ka’ntau de lei; Jonathanbe katlam ’mbia ka’ntau de lei, zai Abnerbe ne Saulbe taige ka’ntau de lei, kane Dabidbe bâm â perua bam lei.

²⁶Sede chipau mai ge â Saulbe mâ de sa mak lei, “Mâge â pe peireige wangchang de lei; pa â ’nchi mak lei, pa â ’nchi mak sing daseu,” ze pa ’nning gai dadegeu.

²⁷Kane pakenabe mai ge, hekêu tenang chai makge, Dabidbe bâm ze perua bam lei. Zai Saulbe ne pe na Jonathanbe je, “’Ndaitew ze Jessibe na teseu teu ra hangge ’nzimai du zai nemai du wang mak lau?” kacheu de lei.

²⁸Jonathanbe ne Saulbe je kak ze, “Dabidbe a dage Bethlehem tat ra hang ’mpat kai ra pei sing lau ze kie lei;

²⁹pa ne rang ze, ‘Achu tat ra pei lau, a kiduîme namdi ge herâtewbe bam gu daseu, zai a sipeu ne chige bam ra achu samde gai lei. Daze chunage ning mikngau ge ngauka’nggiabe I ngau dizai â, achu tat ra pei lau, zaine a sime je I ngau gai ra hangge zeu,’ kacheu de lei. Chipau hang ziegene pa heguang gu leisi-kaira ge wang mak te lei,” ze acheu bei de lei.

³⁰Dadege Jonathanbe peireige Saulbe pe lumpum tewpat kai de lei, zai pa ne pechu rang ze, “Nang, lungkahailabe, ’nggichipui na, Jessibe na dage ningchu ning runne tew’ngngam gai ra, zai ning pui je tew’ngngam gai ra, zai pumlâng tew gai ra pechu nang kelâng gai ’ndi de lei be I chî mak mei?

³¹Jessibe na kedeirei ge ring tâne, nang du zai ning gu heguangram du beichu gai ra mak lei. Chidaze lang gai ze pechu nîm lu a tailam teiwang lau, pa chai sing gu lei,” ze kacheu de lei.

³²Dadege Jonathanbe ne pe peu Saulbe je kak ze, “’Ndaitew bei ze pechu tewchat ra lau? Pa ne ’ndaikau tew gai ’ndi lau?” ze kacheu de lei.

³³Kane Saulbe pechu hia ra hengeu ’mpatpat te lei, dadege pe peu â Dabidbe je tewchat ra ka’nsap te lei be Jonathanbe chî di de lei.

³⁴Chidadege â Jonathanbe pe lumpum-desang di ze bâmra gene zuachu lu, chipau kêu gu pakenabe mai â, tak teu mak tai lei, Dabidbe hangge pa kadesui dadegeu, pe peu ne pechu tewkengamgaibe ziegeneu.

³⁵Hechua dege Jonathanbe ’nduloa ’mbe Dabidbe dage sam rang gai ’ndi ’mbe, pe dage napoine je tei lu zuapat te lei.

³⁶Zai pa ne rehang’mpoine je rang ze, “Bai’mpitu ramme I kapkaibe paktat lu peu le lau,” ze kacheu de lei. Rehang’mpoine pak kai dadege pe sua ’mbe bai’mpitu pa kap kai de lei,

³⁷zai rehang’mpoine Jonathanbe ne pe sua ’mbe bai’mpitu kapkaibe bâm ’mbe wangchang dege, Jonathanbe ne rehang’mpoine je kû ze, “Ning sua ’mbe bai’mpitu ’ngga mei?” kacheu de lei.

³⁸Zai Jonathanbe ne rehang’mpoine je kû ze, “Kelua lau, tewkelua lau, sapbam ta lau,” kacheu de lei. Dadege Jonathanbe gu rehang’mpoine ne bai’mpitu tei’ndui lu pe pau dage wang de lei.

³⁹Kane rehang’mpoine â mâ de chî mak tai lei; Jonathanbe benai Dabidbe runne patedeu ze chî de lei.

⁴⁰Zai Jonathanbe ne pe gu hereimerua ze rehang’mpoine je bala gai ze, pechu acheu rang ze, “Namdi ’mbe chiramme pungtat kai be lau,” ze acheu bei de lei.

⁴¹Zai rehang’mpoine ze tattegap dege, Dabidbe tingchukoa hiagene chu lu, pe ju kedei ’mbe tua’ngkum lu, luachum kei’ngkum gai lei; zai penai kat-kat je kakeput te lei, zai Dabidbe yiwang dai mak tâne penai kat-kat dage hap te lei.

⁴²Dadege Jonathanbe ne Dabidbe je, “Ning suiyi ze tatchu lau, Tingwang ji gene anai hangna deseu gai ze, ‘Nang benai a kakge zai ning chaname benai kakge peize Tingwang betingbeta bam lau,’ ze acheu ze sagai’ndibe luigum zeu,” ze kacheu de lei. Zai pa chu lu tat ti de lei; zai Jonathanbe a namdi ’mbe tat ti de lei. -