Read Zeme Naga 1 SAMUEL 21 Bible Online

1 SAMUEL 21 - Zeme Naga bible

1 SAMUEL 21

¹Dege Nob ge tingkupeu Ahimelekbe dage Dabidbe wang de lei; zai Ahimelekbe kelippin ze Dabidbe je hedau ra pat te lei, zai pechu, “’Ndaitew ze ning runne wang rei se lau, ning dage mî de ga zeu?” ze kacheu de lei.

²Zai Dabidbe ne tingkupeu Ahimelekbe dage sa ze, “Heguang ne achu sam lang gai ze, zai achu rang gai ze, ‘Peize ningchu I langgaibe sam ze mige de chî se lau, zai ningchu I ranggaibe du peize chî se lau,’ kacheu de lei. I ne rehangme ramme dage aigumbe hang benai aigumbe bâm hangge pehî die gai ’nde lei.

³Chidaze chuna â ning ba ge ’ndaikau la lau? Achu tingkukuak mengeu pei lau, makchai aige bam-bambe pei lau,” acheu bei lei.

⁴Zai tingkupeu ne Dabidbe je kak ze, “A dage kêdabe tingku ga lei, kane tew’nchilube tingku runne lei; rehangme pe runne ne ’mpuimi dagene ’mbialube kau hangge runne bambe zeu,” acheu bei de lei.

⁵Zai Dabidbe ne tingkupeu je kak ze, “Pelingsing ze I hereitebeî ’mpuî tat tânege anui â ’mpuimi ramme dagene ’mbia bam de lei; rehangme pum ramme â acheu ze tebeîtewbe ge du ’nchi lei; nemai ge ’ndaizeuge penui pum ’nchi ra lau,” ze kacheu de lei.

⁶Dadege tingkupeu ne pechu, tew’nchilube tingku pei bei de lei; chige tingku ’ngga di ze, kane heraliebe tingku runne bam di dadegeu, chize teitattibe mai ge langlumbuppatbe tingku zene chige kaihelei-gaidairabe zeu.

⁷Chunage chipau mai ge Saulbe guâ ka’ngguame ruage ziemmena hangkat Tingwang suage dei’ntaugaibeipeu bam lei; pe ji â Doegbe Edom’mpeu, Saulbe gu getum reîme ruage pemuitewpeu de lei.

⁸Zai Dabidbe ne Ahimelekbe je, “Zai aige ning dage hengeu, makchaine hiazutkie ’ngga mei? A dage hiazutkie du zai a gu hereimerua du tei mak lei, heguang gu tatew kelua-desang ra changdibe ziegeneu,” ze kacheu de lei.

⁹Zai tingkupeu ne sa ze, “Philistin’mpeu Goliathbe gu hiazutkie, Elah kâm ge nang tewchatpeu gu ze pie le lau, chize paî ne ’nnum lu tingkume mechuapui chaige la lei; chize nang ne tei gu lei zai â tei le lau, katte ga de lei, chize runne de lei,” ze acheu bei de lei. Zai Dabidbe ne sa ze, “Chigumbe mâ de ga de lei, chize achu pei lau,” ze acheu bei de lei.

¹⁰Dadege Dabidbe chu lu chipau mai ge Saulbe dagene pak ti de lei, zai Gath gu heguang Akisbe tailam tat ti de lei.

¹¹Zai Akisbe guâ ka’ngguame ne pechu rang ze, “Aipaupeu ze Dabidbe, heram gu heguang mak mei? Penui kat kat dage pechu heleu toachu gai ze lim ze heleutew mak mei, ‘Saulbe ne changme je gî lu da, zai Dabidbe ne chang kereume je gî lu de lei,’ acheu zeu,” ze kacheu de lei.

¹²Zai Dabidbe aipau sam ramme pe lung ge tei gai de lei, zai Akisbe Gath gu heguang ze hing-desang di de lei.

¹³Dadege pa penui suagene pa kebambe tak tewkeli gai ze penui ba gene pe runne pe jiesia di de lei, zai keriekemui gu ’ngkam ramme ge ’nchet kai de lei, peize pe tâm ze pe tekangmai ge luakeu ra tew gai de lei.

¹⁴Dadege Akisbe ne pe guâ ka’ngguame bau je rang ze, “Pie le lau, chipaupeu ze mie de lei; ’ndaitew ze a tailam pechu teiwang lau?

¹⁵A dage ziemmena kemiebe kau ’ngga mei, kemiebe kau dage ngua’nta ra aipaupeu je a suage ningnui nguawang mei? Aipaupeu ze a kilûng ’mbe wang ra mei?” ze kacheu de lei.