Read Zeme Naga 1 SAMUEL 22 Bible Online

1 SAMUEL 22 - Zeme Naga bible

1 SAMUEL 22

¹Dabidbe chigene rimna ze Adullam tingchutegup ’mbe ’nreitat ti de lei; zai pe sime bau leine benai pe peu kiduîme leine chize seu lu dege pe tailam penui wangkeu de lei.

²Zai ziemmena pe duânggame leine, ziemmena hepâupungme leine, zai ziemmena pe lungwângchangmakme leine, pe dage wangkaherua de lei; zai penui peireige pa ne pemuitewpeu chang de lei. Zai pe dage ’mpeumi haî medai riâ gum bam lei.

³Zai Dabidbe chigene Moab gu Mizpe ’mbe tat ti de lei; zai pa ne Moab gu heguang je, “Hera ne a hangge ’ndaikau tew gai ra mei be I chî mak tâne, peize a peu benai a pui ning dage bam ra pei lau,” ze kacheu de lei.

⁴Zai penui je Moab gu heguang dage pa sâudiak kai kai de lei, zai Dabidbe pe gu ’mbaibâm ge bam tâne penui pe dage bam de lei.

⁵Chidadege kemeu’mpeu Gadbe ne Dabidbe je rang ze, “Ka’mbaibe bâm ge bam ta lau, tat te zu lau, zai Juda gu heram lung ’mbe tatchu lau,” ze acheu bei de lei. Dadege Dabidbe tat ti de lei, zai Hereth hênamkang ’mbe tat ti de lei.

⁶Chunage Saulbe ne Dabidbe je benai pe dage bamme leine je peupat lu de lei be rasam seu lu de lei, Saulbe â Gibea ge peloa kehube ge tamarisk chingbang kangge, pe ba ge hengeu tei lu, zai pe guâ ka’ngguame leine pe taige sap lu, ’ntau bam de lei.

⁷Zai Saulbe ne pe taige bamme pe guâ ka’ngguame je, “Chuna ge seu le lau, ningnui Benjamin kiriame gau; Jessibe na ne ningnui haimena je helu benai grepchî merie pei gu semei, pa ne ningnui je changme gu sipai ge kanguame hang zai haîme gu sipai ge kanguame hang tew gai gu semei,

⁸dezai ningnui ’nteumena a peireige kelutew ra hangge zeu? A na ne Jessibe na dage nguahezuâgaibe luage ze mî ne du a suage paulîa gai mak, ningnui mî du a hangge ’nninghereu gai mak, zai a guâ ka’ngguapeu zene peize achu ’nggi ra a na ne tew gai ze nemai ge gum ze achu lîmkua ra tewgaibe ze achu paulîa mak lei,” ze kacheu de lei.

⁹Dege Edom’mpeu Doegbe Saulbe guâ ka’ngguame dage sappeu ne kak ze, “Nob ge Ahitubbe na Ahimelekbe dage Jessibe na wangbe I ngau de lei,

¹⁰zai pa ne Tingwang dage pe hangge ka’mmêt te lei, zai pa ka’nnangbe ramme pei de lei, zai Philistin’mpeu Goliathbe gu hiazutkie pechu pei ’ndi de lei,” kacheu de lei.

¹¹Chidadege heguang ne Ahitubbe na Ahimelekbe tingkupeu, zai pe peume ki leine, Nob ge tingkume bamme leine je kelau gai de lei; penui ’nteumena heguang dage wang de lei.

¹²Zai Saulbe ne sa ze, “Chunage ’ngking le lau, Ahitubbe na gau,” ze kacheu de lei. Zai pa ne kak ze, “Aige I lamui lei, a pau gau,” ze kacheu de lei.

¹³Zai Saulbe ne pechu rang ze, “’Ndaitew ze nang benai Jessibe na, pechu tingku benai hiazutkie pei gai ze, zai pe hangge Hera dage ’mmêt ze chipauziegene pa ne a peireige ’nggichu ze nemai riâ chang ze achu lîmkua bam ra a peireige kesia ’mpung gai lau?” ze kacheu de lei.

¹⁴Chidadege Ahimelekbe ne heguang je kak ze, “Ning guâ ka’ngguame ruage ’nnumtewduibe kau heguang chapeu, zai ningchu kereîme ruage pemuitewpeu zai ning ki ge hengêu peize bambepeu Dabidbe gumbe châu la lau?

¹⁵Pe hangge I Hera dage mâ-ka’mmêtbe ze nemai ne raîlangbe semei? Mak lei! peize heguang ne pe guâ ka’ngguapeu je benai a peu ki leine je mâ de peize kesia’ndam gai se lau; ning guâ ka’ngguapeu â airamme gene mâ de gechâmbe chî mak daseu,” ze kacheu de lei.

¹⁶Zai heguang ne sa ze, “Nang Ahimelek, nang benai ning peu ki leine chai sing gu lei,” ze kacheu de lei.

¹⁷Zai heguang ne kereîme pechu sapguame je, “’Nreiwang ze Tingwang gu tingkume je tewchat ne zu lau; penui ba du Dabidbe dage la daseu, zai pa pak te lei be chî lu achu rangliamakbe ziegeneu,” ze kacheu de lei. Kane heguang guâ ka’ngguame ne Tingwang gu tingkume peireige penui ba hua gai mak tai de lei.

¹⁸Dadege heguang ne Doegbe je, “Nang ’nreiwang ze tingkume peireige kau gai zu lau,” kacheu de lei. Zai Deogbe Edom’mpeu ne ’nreiwang ze tingkume peireige tew gai ze, pa ne chipau mai ge ziemmena banutpaî, tingkume puâ kaime hangriakdesat-ze-mengeume je tewchat ’ndi de lei.

¹⁹Zai Nob, tingkume gu namdi je pa ne hiazutkie mui ge kai ’ndi de lei; ’mpeumi benai ’mpuimi, napoine benai ’ngngiêne, getumsei ramme, hekunmerângne ramme, meli ramme, pa ne hiazutkie mui ge kai kam ’ndi de lei.

²⁰Kane Ahitubbe na, Ahimelekbe name ruage hangkat, pe ji, Abiatharbe ’nreipat lu Dabidbe chai pak ti de lei.

²¹Abiatharbe ne Dabidbe je, Saulbe ne Tingwang gu tingkume je tewchat kam ’nde lei, ze rang gai de lei.

²²Zai Dabidbe ne Abiatharbe je kak ze, “Chipau mai ge Edom’mpeu Doegbe chige bambe ge Saulbe dage pa salia sing gu lei be chî di de lei; ning peu kibau leine je chai ra I ne tew gai de lei.

²³A dage bam lau, hing se lau, a keringbe peubepeu ne ning keringbe peu de lei, a dage a nang hing mak ze bam gu lei,” ze acheu bei de lei. -