Read Zeme Naga 1 SAMUEL 25 Bible Online

1 SAMUEL 25 - Zeme Naga bible

1 SAMUEL 25

¹Chuna â Samuelbe chai di de lei; zai Israelme leine wang’ndui lu pechu desui bam de lei, zai penui ne pechu Rama ge pe ki ge bai gai bei de lei. Chidadege Dabidbe chu lu, Paran hênamkang ’mbe wangkeu di de lei.

²Zai Maon ge ziemmena hangkat, Karmel ge helîkahedetpeu bam lei. Chipaupeu â lungyi kagesang lei; pe gu meli chang chum zai kemei chang kat bam lei. Pa â Karmel ge pe gu meli gêu chiap ze bam lei.

³Chipau peu ji â Nabalbe lei, zai pe nâu ji â Abigaille lei. Chi ’mpuimi ze â mâ-’nningchi zai heleuyi lei, kane ’mpeumi ze â gesu, zai pa luilung sia lei. Pa â Kaleb zat lei.

⁴Nabalbe pe gu meli gêu chiap lei be Dabidbe hênamkang ge bambe lua seu lu de lei.

⁵Dadege Dabidbe ne rehangme hangkereu je lang gai de lei; zai Dabidbe ne rehangme bau je rang gai ze, “Karmel ’mbe hang zu lau, zai Nabalbe tailam hang zu lau, zai a ji gene pechu rechâ gai be lau.

⁶Zai aigum ze pechu ningnui kellum ra lei: ‘Ning dage desieyibe peize bam lau, zai ning ki ge desieyibe peize bam lau, zai ning gu bambe zat leine dage peize desieyibe bam lau.

⁷Ning gu meli gêu chiapme la lei be I seu lei; chuna ning gu melireîme â anui dage la lei, zai penui je anui kesiatew mak lei; zai penui mâ de tew’ngga me lei, pelua ’nsangne penui Karmel ge bam lei.

⁸Ning gu rehangme je ’nneu gai ni lau, zai penui ne ningchu salia gu lei. Chidaze ning mikngau ge peize a gu rehangme ramme ka’nggiabe ngau lau; ka’nggibe mai ge anui wang daseu. Ning ba ge ’ndaikau la mei be ning guâ ka’ngguame benai ning na Dabidbe je pei gai ra kie lei,’ acheu be lau,” ze kacheu de lei.

⁹Dabidbe gu rehangme wang dege airamme leine Dabidbe ji gene Nabalbe je salia de lei; zai penui bamkuâlêu lei.

¹⁰Zai Nabalbe ne Dabidbe guâ ka’ngguame je kak ze, “Dabidbe châu lau? Jessibe na châu lau? Chuna ting ge kebangme misonggame penui paume dagene paktattime lamui lei.

¹¹A gu tingku, zai a gu hedui, zai a gu hemei, a gu meli gêu chiapme hangge I tewchatlube tei lu ze, ’ndai’nggene wang mei be I chimakme hangge chize I pei be ra mei?” kacheu de lei.

¹²Dadege Dabidbe gu rehangme helat dai di de lei, zai wang dai lu ze airamme pechu salia de lei.

¹³Zai Dabidbe ne pe gu ziemmename je, “Haimena pe gu-gu hiazutkie pung gai zu lau!” kacheu de lei. Zai haimena pe gu hiazutkie penui pung gai de lei; Dabidbe du pe gu hiazutkie pung gai de lei; zai ziemmena haî medai gum ze Dabidbe chai suihang de lei. Zai ziemmena haî na gum ze merua reî bam lei.

¹⁴Kane rehangme ruage hangkat ne Nabalbe nâu, Abigaille dage rang gai bei de lei, “Pie le lau, Dabidbe ne anui wangpeu je rechâ gai ra hênamkang gene sampaume je lang gai de lei; zai pa ne penui je ’nrû bei de lei.

¹⁵Sede ziemmena ramme â anui hang yi-desang lei, zai anui je mâ de tewhereu mak lei, anui du helu ge bambe luage mâ de tew’ngga mak lei, anui penui je nguatat tânegeu;

¹⁶penui â anui hangge kemuî-keba kerie de lei, anui gu meli reî ze penui dage bam tâne gezeu.

¹⁷Chunage chidaze aipau ze nang ’ndaikau tew ra mei be ’nning le lau; anui pau benai pe kibaume leine peireige kesiabe ’nning la de lei, zai pa â kelaksia-desang ze mî ne de pechu ’mpauchi lak la de lei,” ze acheu zeu.

¹⁸Chidadege Abigaille kelua ze tingku haî na tei lu, zai wain hemeigeibung kena, zai meli mengeu teleuzunlube zai dekuîmeu getalube ’ndat mengeu, zai grepchîkang dûm haî kat zai ’mbeuchî tingku haî na tei lu, chiramme hekunmerângne peireige kai de lei.

¹⁹Zai pa ne pe gu rehangme ramme je, “A sua ’mbe tatchu lau; pie le lau, ningnui chaige I wang gu lei,” ze acheu bei de lei. Kane pe napeu Nabalbe je pa ranglia mak lei.

²⁰Zai pa hekunmerângne chingchuabe, zai kedeiloa ’ntûm kangge wangkeube luage, pie le lau, Dabidbe benai pe gu ziemmename pe tailam wangkeu de lei; zai penui je pa kahedau de lei.

²¹Chunage Dabidbe ne sa ze, “Gesang sing ze peruânggabe gene aipaupeu gu hênamkang ge bambe leine I reî de lei, dezai pe gu leine mâ de ’ngga mak ra hangge zeu; zai pa ne kesiabe ne keyibe kelei ge achu peiruî bei de lei.

²²Chigum ze Hera ne Dabidbe dage peize tew gai lau, zai chipau peireige du hechua dezai, pe gume ruage ’mpeumi hangkat ’nsak kai lêuzai du chigum ze tew gai lau,” ze kacheu de lei.

²³Abigaille Dabidbe je ngau lu dege pa kelua ze hekunmerângne gene zuakeu lu, Dabidbe suage pe ju ’ngkumkeu ze kedei ge ’ngkum gai di de lei.

²⁴Pe pî ge pa kâukeu lu sa ze, “A peireige runne kemaube chang lau, a pau gau; peize ning guâ ka’ngguapui ne ning kun ge sam sa gai lau, zai ning guâ ka’ngguapui sam ramme ’ngking gai lau.

²⁵Peize a wangpeu ne aipau peluilungsiapeu Nabalbe je mâ-hang chak kai se lau; pe ji luigum ze pa â chigum de lei, Nabalbe ze pe ji de lei, zai pe dage kemiebe bam lei, kane I ning guâ ka’ngguapui a wangpeu gu rehangme nang ne langgaime bau je ngau mak tai de lei.

²⁶Chunage chidaze a pau gau, Tingwang bambe luigum ze zai nang ringbe luigum ze nang ne hejai tewpatrabe mâu gene zai ning ba gene hekûmtewrabe gene Tingwang ne ningchu tewnam gai bei de lei, chunage chidaze ning teureime, zai a wangpeu je kesiatew ra peume je Nabalbe gum peize chang lau.

²⁷Chunage aipau kela ning guâ ka’ngguapui ne a wangpeu dage teiwangbe ze rehangme ramme a wangpeu chaisuime dage peize pei gai be zu lau.

²⁸Ning guâ ka’ngguapui gu tewmaube lun gai ra kie lei. Tingwang ne a wangpeu hangge heki gesang tew gai gu daseu; a wangpeu ne Tingwang gu herei-ka’nggibe ziegeneu, zai nang ring tâne ning dage kesiabe dau ra mak lei.

²⁹Ziemmena chu ze nang keringbe peu ra gua’nchu lêuzaidu, a wangpeu keringbe ze â Tingwang ning Rapeu ne kareheibe keringbe ruage puigit ze bam gu lei; zai ning teureime keringbe ze pa ne mâ-kakeliabe gene keliapat gum ze keliatua ’ndu lei.

³⁰Zai Tingwang ne ning tâdeu ge keyibe ramme sagai’ndibe luigum ze, zai Israelme peireige heguangsinpeu hangge sumgai’ndibe luigum ze a wangpeu peireige tew gai dezai,

³¹pedeu ga ze hejai tewpatkaibe hangge, zai a wangpeu ne pe kûm lu dezai a wangpeu â pe suîhereu ra mak, zai keyi-kesia ’nning-kahereube tew ra mak lei. Zai a wangpeu dage Tingwang ne keyibe tew gai dezai ning guâ ka’ngguapui je chî bam lau,” ze acheu bei de lei.

³²Zai Dabidbe ne Abigaille dage rang ze, “Achu hedau ra ningchu langgaipeu Tingwang Israelme Rapeu je peize toa lau!

³³Nang mâ-’nningchibe je peize toa lau, zai nemai ge hejai tewpatbe mâu benai a runne achu ba ne a peireige hekûm tew gai ra tei’mbiagaipui, ningchu peize toa lau!

³⁴Tingwang Israelme Rapeu, ningchu tewjâmrabe gene achu tei’ntaugaipeu bambe ziegene, ningnui achu hedau ra tewkelua mak laîzai ne â hechua dezai â, ’mpeumi hangkatte Nabalbe dage sâu gai dai ra mak te lei,” ze kacheu de lei.

³⁵Chidadege Dabidbe ne pe ba gene pa ’ndaikau teiwang mei be lu gai de lei; zai pa ne pechu rang ze, “Ning ki lam’mbe ning suiyi ze hang zu lau; pie le lau, I ning kuâ ’ngking bei de lei,” ze kacheu de lei.

³⁶Zai Nabalbe dage Abigaille wang de lei, zai pie le lau, pa â pe ki ge heguangme gu luube-bâm gum ze heluu laleu lei, zai Nabalbe lung â ’ntaza bam lei, pa â meneu-desang di dadegeu; dadege hechua bapat dai mak tâne mâ de pechu pa salia mak lei.

³⁷Zai hechua dege, Nabalbe dage hezaurai ga kam dadege pe nâu ne airamme pechu ranglia de lei. Zai pe lung ge tingchu gum ze chaida bam di de lei.

³⁸Zai hezie hingreune gum chang dege, Tingwang ne Nabalbe je tew’nteu gai bei de lei; zai pa chai di de lei.

³⁹Nabalbe chai di de lei be Dabidbe seu lu dege, pa ne sa ze, “Nabalbe ne a peireige saka’nsiabe deu ge samrâmgaipeu, zai pe guâ ka’ngguapeu je tâkesiabe tewrabe gene tew’ntaugaipeu Tingwang je peize toa lau; Tingwang ne Nabalbe tâkesiabe tewbe ze pe peireige wang gai dai ra tew gai bei de lei,” ze kacheu de lei. Chidadege â Dabidbe ne lang gai bei ze Abigaille je pe nâu hang ’mpau gai de lei.

⁴⁰Zai Dabidbe guâ ka’ngguame Karmel ge Abigaille dage wang dege penui ne pechu, “Dabidbe ne ningchu pe nâu hangge lu ra anui je lang gai de lei,” ze kacheu de lei.

⁴¹Zai pa chu lu, pe ju kedei ge ’ngkumkeu lu ze, “Pie le lau, ning guâ ka’ngguapui â a wangpeu guâ ka’ngguame pî hui ra ka’ngguapui chang de lei,” ze kacheu de lei.

⁴²Zai Abigaille kelua ze chu lu, hekunmerângne ching ge keuchu gai lu, pe gu heleume hangmengeu ne pechu nguatat ti de lei; Dabidbe gu sampaume chai pa suitat ti de lei, zai pe nâu chang di de lei.

⁴³Jezril’mpui Ahino-amle je du Dabidbe lu de lei, zai penai hangna pe nâu chang di de lei.

⁴⁴Saulbe ne Mikalle pe na ’mpuimi Dabidbe nâu je Laisbe na Paltibe, Gallim’mpeu je pei ’ndi de lei. -