Read Zeme Naga 1 SAMUEL 26 Bible Online

1 SAMUEL 26 - Zeme Naga bible

1 SAMUEL 26

¹Dadege Saulbe dage Ziphme Gibea ge wang lu, “Jeshimon gene naimikpat ’mbia Hakila deiloa ge Dabidbe ’mbai bam mak mei?” ze kacheu de lei.

²Dadege Saulbe chu lu zai Ziph hênamkang ’mbe Israelme ’mpeumi chang chum kelânglume je ngua lu, Ziph hênamkang ge Dabidbe je peu ra wangkeu de lei.

³Zai Saulbe Hakila kedeiloa Jeshimon gene naimikpat ’mbia ’mpuî’ntai ge sieki tew gai de lei, kane Dabidbe â hênamkang ge bam di lei, zai Saulbe pe chaige hênamkang ’mbe wangbe pa ngau lu dege,

⁴Dabidbe heramrikme je lang gai de lei, zai Saulbe â wang mui de lei be gesang-peling chî lu de lei.

⁵Dadege Dabidbe chu lu Saulbe ’nseugaibe sieki ’mbe tat ti de lei; zai Saulbe benai Nerbe na Abnerbe, pe gu hereikang haîmuiteipeu jei bambe Dabidbe ngau lu de lei; Saulbe â sieki zuilung ge jei bam lei, hereikangme ne pechu bamguâ bei zeu.

⁶Chidadege, Dabidbe ne Het’mpeu Ahimelekbe benai Zeruiale na Abishaibe, Joabbe sipeu je, “Saulbe gu sieki ’mbe châu ne ningnai ruage achu nguakeu ra lau?” ze kacheu de lei. Zai Abishaibe ne, “I ne ningchu nguakeu gu lei,” ze acheu bei de lei.

⁷Dadege Dabidbe benai Abishaibe hereikangme tailam tingmuî ge wangkeu de lei, zai chige Saulbe hereikang gu sieki lungge pe gu hengeu pe jeîpeî ge huî gai lu jei bam lei, zai Abnerbe benai pe gu hereikangme ne pechu jeiguâgit bam lei.

⁸Chige Abishaibe ne Dabidbe je rang ze, “Nemai ge ning teureipeu je Hera ne ning ba ge pei gai de lei; daze chunage luakatne hengeu ne I pechu kedei ge huîtemi gai ne ra de mei? Pechu lua na I huî ra mak lei,” ze kacheu de lei.

⁹Kane Dabidbe ne Abishaibe je, “Pechu tew’nsia se lau, Tingwang gu ’nnukkai’ndipeu peireige châu pe ba hua gai lu ze pe mâu garabe kau la lau?” ze acheu bei de lei.

¹⁰Zai Dabidbe ne sa ze, “Tingwang ringbe ziegene, Tingwang ne pechu tew gu lei; makchai pa chairabe tingnaimikpui ze wang gu lei; makchai pa herei ge wangkeu gu zai chai du lei.

¹¹Tingwang gu ’nnukkai’ndipeu peireige a ba huapat kai ra Tingwang ne nam lei; kane chunage pe jeîpeî ge hengeu bambe ze tei le lau, zai heduibung tei le lau, zai anai â tat zu kei lei,” ze kacheu de lei.

¹²Dadege Dabidbe ne hengeu benai heduibung Saulbe jeîpeî ge bambe ze tei lu de lei; zai penai tat ti de lei. Mige de ngau mak, chî de chî mak, zai mî de ’nrakchu mak lei. Penui ’nteumena jeikeu di dadegeu, Tingwang dagene jeichi-kadesangbe penui peireige peikeugaibeibe ziegeneu.

¹³Chidadege Dabidbe kêda ’mbia tat ti de lei, zai kedeiloa ’ntûm ge penui kak getie ’mbe sap’ndeutau bam di de lei;

¹⁴zai Dabidbe ne hereikangme benai Nerbe na Abnerbe je, “Abnerbai, nang kak mak ra mei?” acheu ze kû gai de lei. Chidadege â Abnerbe ne kak ze, “Heguang je kube ze châu lau?” kacheu de lei.

¹⁵Zai Dabidbe ne Abnerbe je, “Nang â ’mpeumi mak mei? Israel ge nang gumbe kau châu la lau? Acheuzaine ’ndaitew ze ning wangpeu heguang peireige nang reî bam mak lau? Heguang ning wangpeu je tew’ngga ra hangkat gut te lei.

¹⁶Aipau nang tewgaibe bâm â yi mak lei, Tingwang bambe ziegene nang chaibui de lei, ning wangpeu, Tingwang ne ’nnukkaipeu je nang reîmakbe ziegeneu. Zai chuna ne heguang gu hengeu, zai pe peireige heduibung bambe ze ’ndai’ngge la mei be pie gai ni lau,” ze acheu bei de lei.

¹⁷Zai Dabidbe kuâ Saulbe chî di de lei, zai acheu sa ze, “A na Dabidbai, aize ning kuâ mei?” ze kacheu de lei. Zai Dabidbe ne, “Chize â a kuâ de lei, a wangpeu, Hei heguang gau,” ze kacheu lei.

¹⁸Zai pa ne, “’Ndaitew ze a wangpeu ne pe guâ ka’ngguapeu je guaka’nsa lau? ’Ndaikau I ne tew gai ’ndi lau? A ba ge ’ndaikau kemaube la lau?

¹⁹Chidaze chunage a wangpeu heguang ne peize pe guâ ka’ngguapeu kuâ seu le lau. A peireige ning lung tewchugaipeu ze Tingwang zai â peize kela peipatbe pei lu le lau; kane chize ziemmena ne zai â Tingwang suagene penui je peize deset kai be lau, penui ne achu nemai ge Tingwang heurâ ge hedam ga de ra achu kelipat ’ndaseu, ‘Tat chu lau, kêdabe heramme guâ ’nggua lau,’ acheu sa gai lu zeu.

²⁰Chidaze chunage peize Tingwang masua gene a jai kedei ge keu gai se lau; hangkat kedeiloa ’ntûm ge hekuaipui je rikrua gum ze Israelme gu heguang ne a keringbe peu ra zuapat ti daseu,” ze kacheu de lei.

²¹Dadege Saulbe ne, “I tewmau ’nde lei, helatwang dai lau, a na Dabidbe gau; a keringbe ze nemai ge ning mikngau ge pemîhungbe ziegeneu; pie le lau, I kemiebe tâ tew de lei, zai tewmau ’nzû ’nde lei,” ze kacheu de lei.

²²Zai Dabidbe ne kak kai de lei, “Aige hengeu la lei, Hei heguang gau! peize rehangme hangkat ne hang ze lu le lau.

²³Tingwang ne haimena hangge pa kapelingbe benai pa keneibe hangge hetoa pei lei; Tingwang ne ningchu nemai a ba ge pei gai lei, zai Tingwang ne ’nnukkaipeu peireige I a ba huapat kai mak ra hangge zeu.

²⁴Pie le lau, nang keringbe â nemai ge a mikngau ge pemîhung gum ze, peize a keringbe ze Tingwang mikngau ge pemîhungbe chang lau, zai pa ne hereuliebe gene achu ’nripat kai be lau,” ze acheu zeu.

²⁵Chidadege Saulbe ne Dabidbe je, “A na Dabidbe gau, ningchu peize ’nnam gai be lau. Nang misongga mâ tâ tew gu, zai chiramme ge ’nggim bam gu lei,” ze acheu bei de lei. Dadege Dabidbe â pa tatrabe ’mpuî ’mbe tat ti de lei, zai Saulbe â pe ki lam’mbe helat dai di de lei. -