Read Zeme Naga 1 SAMUEL 27 Bible Online

1 SAMUEL 27 - Zeme Naga bible

1 SAMUEL 27

¹Zai Dabidbe pe lung gene sa ze, “Saulbe ba gene mai kat â I ga gai gu de lei; Philistinme gu heram ’mbe pakkaiderabe peirei keyibe mâ de a hangge ga gu de lei; dezai Israelme gu heramrai lungge Saulbe achu peuhereu dai ta du de lei, zai pe ba gene I ’nreipat tu de lei,” ze kacheu de lei.

²Dadege Dabidbe chu lu, ’mpeumi haî serukme pe dage bamme, Gathme gu heguang Maokbe na Akisbe tailam tat ti de lei.

³Zai Dabidbe Gath ge Akisbe dage bam di de lei, pa benai pe gu ziemmename, pe ki ge haimena zai Dabidbe nâu kena, Jezril’mpui, Ahino-amle benai Karmel ’mpuî Abigaille Nabalbe nâu kemîpui du bam de lei.

⁴Zai Dabidbe â Gath ’mbe pak te lei be Saulbe je ranglia bei dege â pechu pa peu dai ta di de lei.

⁵Dadege Dabidbe ne Akisbe je, “Ning mikngau ge ka’nggiabe I ngau dizai â heguangram gu keloa kat ruage pebâm kat a hang pei gai be lau, dezai chige I bam ra hangge zeu; ’ndaitew ze ning guâ ka’ngguapeu namdi ge ning dage bam ra lau?” ze acheu bei lei.

⁶Dadege chipau mai ge Akisbe ne pechu Ziklag namdi pei bei de lei; chidadege nemai riâ chang ze Ziklag ze Juda heguangme gu chang di de lei.

⁷Zai Philistinram ge Dabidbe bamgaibe kum kat ze kêu medai lei.

⁸Chuna Dabidbe benai pe gu ziemmena hang lu, Geshur ramme, Girzime zai Amalekme peireige ’nggigut te lei; airamme ze â tingtie’ngkane lungbe kedei, Shur riâ zai Ijipram riâ daseu.

⁹Zai Dabidbe ne heram ze tewkau ’ndi de lei, zai ’mpeumi zai ’mpuimi je du ’nsak kai mak te lei, kane meli ramme, getum ramme, hekunmerângne ramme, put-hu ramme, zai paîni ramme teitat ’ndi de lei, zai Akisbe dage helatwang kadai de lei.

¹⁰Akisbe ne, “Nang chaume peireige nemai ’nggigut lau?” ze ’nneu gai dege, Dabidbe ne sa ze, “Juda gu Negeb peireige lei, zai Jeramilme peireige lei, zai Kenme gu Negeb peireige lei,” ze acheu bei de lei.

¹¹Gad ’mbe ’mpuimi benai ’mpeumi ramme je nguawang dai ra hangge Dabidbe ne penui je hangkat je de sâu gai mak te lei, “Penui ne anui rasam pau gai ze, ‘Dabidbe ne aigum tew lei, aigum tew lei’ ze acheu ze sa gu lei” be hangge ’nning gai lu zeu. Pa Philistinram ge bambe ting tâluî ge pe dage â aigumbe ne acheu ze bam bam de lei.

¹²Akisbe ne Dabidbe peireige ’nnumtew ze bam de lei, “Pa (Dabidbe) â pe zatme ne pechu ngaugailak ra pe runne pechu tew gai ’nde lei; chipauziegene pa ze a guâ ’nggua ze bam bam du de lei” be hangge ’nning gai lu zeu.