Read Zeme Naga 1 SAMUEL 28 Bible Online

1 SAMUEL 28 - Zeme Naga bible

1 SAMUEL 28

¹Israelme je ’nggi ra hangge chipau ting ge Philistinme penui gu hereikangme ramme je hereirabe hangge gekumwangkandui de lei, Zai Akisbe ne Dabidbe je, “Hereikangme ruage a dage nang benai ning gu ziemmena zuapat’mpam ra de lei be chî le lau,” kacheu de lei.

²Dabidbe ne Akisbe je, “Yi-desang de lei, ning guâ ka’ngguapeu ne ’ndaikau tewchi duî mei be nang chî gu lei,” kacheu de lei. Zai Akisbe ne, Dabidbe je, “Yi-desang de lei, I keringbe ting tâluî achu kereîpeu hang ningchu I tew gai ra de lei,” ze kacheu de lei.

³Chunage Samuelbe â chai di de lei, zai Israelme leine pa kechaibe kadesui de lei. Zai pe gu namdi Rama ge pechu bai gai de lei. Zai heram gene Saulbe ne gekungme benai heduaîtewme je lutua ’ndi de lei.

⁴Philistinme wang’ndui lu, zai Shunem ge sieki tew-tew de lei; zai Saulbe Israelme leine je kûwang’ndui lu, Gilboa ge sieki tew gai de lei.

⁵Philistinme gu hereikangme je Saulbe ngau lu dege pa hing di de lei, zai pe lung kedun-desang di de lei.

⁶Zai Tingwang dagene Saulbe mâ-’mmêt kai dege, Tingwang ne pechu hemang ka’mmibe gene mei nune Urim gene mei nune kemeume dagene mei ze du kak kai mak te lei.

⁷Chidadege pe guâ ka’ngguame je Saulbe ne, “Gekungbe tâ tewbe ’mpuimi je a hangge peupat kai lau, chidezai pe dage I tat ze mâ’mmêt ra hangge zeu,” kacheu de lei. Zai pe guâ ka’ngguame ne pechu, “Pie le lau, En-dor ge gekungbe tâ tewbe kau hangkat la lei,” kacheu de lei.

⁸Chidadege Saulbe peluî tewchâm lu, kêdabe puâ ramme kai lu, pe dage ziemmena hangna je ngua lu pa tat ti de lei; zai chi ’mpuimi dage tingmuî ge penui wang de lei. Zai pa ne, “Herui dagene a hangge mâ-’mmêt kai lau, ning suage heji I ne kûliâgai-gaibe kau je a hang teichu gai lau,” kacheu de lei.

⁹’Mpuimi ne pechu, “Saulbe ne ’ndaikau tâ tew gai mei be nang chî sing lei, heram gene gekungme benai heduaîtewme je pa ne ’ndaigum ze lutua kam ’ndi mei be zeu. Chidaze I chairabe hangge ’ndaitew ze a keringbe hangge nang ’mpia tew lau?” ze kacheu de lei.

¹⁰Kane Tingwang ji gene Saulbe pe dage deseu ze, “Tingwang bambe luigum ze aipau ziegene ning peireige tewsabe mâ de wangchang ra mak lei,” kacheu de lei.

¹¹Chidadege ’mpuimi ne, “Châu je ning hangge I teichu gai be ra lau?” kacheu de lei. Pa ne, “A hangge Samuelbe je teichu gai lau,” kacheu de lei.

¹²Samuelbe je chi ’mpuimi ze ngau lu dege, pe laîkai ka’nrung de lei; zai chi ’mpuimi zene Saulbe je, “’Ndaitew achu nang choa lau? Nang ze Saulbe zeî lau,” kacheu de lei.

¹³Heguang ne pechu, “Hing se lau, nang ’ndaikau ngau lau?” kacheu de lei. Zai ’mpuimi ne Saulbe je, “Kedei gene Hera zuachube I ngau lei,” kacheu de lei.

¹⁴Pa ne ’mpuimi je, “Peluî ze ’ndaigum tai lau?” kacheu de lei. Dadege pa ne, “Gechipau ze hang lei, zai pa â mechuapui kaisup kai lei,” kacheu de lei. Zai chize â, Samuelbe de lei be Saulbe chî di de lei, zai kedei ’mbe pe ju ’ngkumkeu lu, hengêutewbe pa pei gai de lei.

¹⁵Chidadege Samuelbe ne Saulbe je, “’Ndaitew ze achu kûchu ze nang tewkeleu gai lau?” kacheu de lei. Saulbe ne kak ze, “I a duângga-desang di de lei; Philistinme ne achu herei la da, zai a dagene Hera ’nnuk’tat ti, zai kemeume dagene mei nune hemangka’mmibe ramme gene mei ze achu kaktadibe ziegene de lei; chipauziegene I ’ndaikau tew ra mei be achu rang gai ra hangge I ningchu kû gai de lei,” ze kacheu de lei.

¹⁶Zai Samuelbe ne “Tingwang ne ning dagene ’nnuktat ti, zai ning teurei chang di zaine, ’ndaitew ra achu nang ka’mmêt lau?

¹⁷A dagene pa sagaibe luigum ze Tingwang ne ning dage tew gai de lei; Tingwang ne ning ba gene heguangram ze tewpângtat ti, zai ning kining’mpeu Dabidbe je pei gai ’ndi daseu,

¹⁸Tingwang kuâ nang ne pheu mak, zai Amalek peireige pa pe lumpum-kadesangbe tâ ze nang ne tewgaimakbe ziegene nemai ge Tingwang ne aipau ze tew gai de lei.

¹⁹Chipau peireige du ningchu benai Israelme je Philistinme ba ge Tingwang ne pei gai gu de lei, zai ’nchuamai ge nang benai ning na ’mpeumi ramme a dage bam gu lei, Israelme gu hereikangme je du Philistinme ba ge Tingwang ne pei gai gu lei,” acheu bei de lei.

²⁰Chidadege Samuelbe sam ramme ziegene kehingbe ne pui di ze, Saulbe kedei ge tuâ’ntatui gai di de lei; kebabe ting tâluî benai kemuîbe ting tâluî mâ de pa teumakbe ziegene pe dage mâ de perantew ta di de lei.

²¹Zai chi ’mpuimi ze Saulbe dage wang de lei, zai pa hing di de lei be pa ngau lu dege, pa ne Saulbe je, “Pie le lau, ning guâ ka’ngguapui ne ning kuâ pheu gai de lei; I ne a keringbe a ba gene tei lu, nang ne achu ranggaibe kuâ I pheu gai de lei.

²²Chidaze chunage ning guâ ka’ngguapui kuâ nang du ’ngking gai lau; ning hangge I ne tingku (hetak) kecheîne ’ngguapat kai che lei; zai nang tebeîtewbe ge ning ranchi hang teu gai lau,” kacheu de lei.

²³Saulbe ne lun mak te lei, zai pa ne “I â teu ra mak lei,” kacheu de lei. Kane pe guâ ka’ngguame benai ’mpuimi ne pechu kiâm gai bei de lei; zai penui kuâ pa pheu gai de lei. Chidadege â kedei gene pa zuachu lu jeî ge ka’ntau de lei.

²⁴’Mpuimi ze pe ki ge getumpoine peleuyibe bamdau de lei, zai pa ne chize kelua ze tewchat lu, zai dekuî lu lu, chize kenei lu zai chize ne ’nduihîkaimakbe tingku lang gai de lei,

²⁵zai pa ne chize Saulbe benai pe guâ ka’ngguame suage dekampat kai bei de lei; zai penui teu de lei. Chidadege penui zuachu lu chipau mai muî ge tat ti de lei. -