Read Zeme Naga 1 SAMUEL 29 Bible Online

1 SAMUEL 29 - Zeme Naga bible

1 SAMUEL 29

¹Chunage Philistinme penui gu hereikangme leine je Aphek ge teiwang’ndui gai de lei; zai Israelme â Jezril ge bambe ’nggeutering hiage tejeîbâm tewka’ndui de lei.

²Philistinme wangpeu ramme, penui gu ziemmena haîme benai changme je ngua lu tatpatbe luage, zai pe chaige Akisbe je ngua lu Dabidbe benai pe gu ziemmena patbe luage,

³Philistinme gu sipai ge kanguame ne, “Aime Hebraime aige ’ndaikau tâ tew lau?” kacheu de lei. Zai Philistinme gu sipai ge kanguame je Akisbe ne, “Aize â a dage hezie misongga zai patingkum misongga bamdipeu, Israelme gu heguang Saulbe guâ ka’ngguapeu Dabidbe de mak se mei? Zai a dage pa pakkaibe gene nemai riâ chang ze pe dage kemaube mâ de I ngau me lei,” acheu de lei.

⁴Kane Philistinme gu sipai ge kanguame pe peireige penui râta di de lei; zai Philistinme gu sipai ge kanguame ne pechu, “Chipaupeu je peize helatwang dai de ra lang gai ne lau, chidezai nang ne pe bâm hang peipatkaibe bâm ge peize helatwang dai de ra hangge zeu; herei ra hangge pa â anui dage wangkeu mak ra lei; pa zene herei bâm ge anui teureipeu chang gai mak ra hangge zeu. ’Ndaigum ze pe pau lungsui tew’mmi dai ra aipaupeu ne tewchi le ra lau? Aige bamme ziemmena peî ramme gene mak ra semei?

⁵Penui kelimbe ramme ge penui karai heleutewkak ze, ‘Saulbe ne changme je gî lu, zai Dabidbe ne chang kereume je gî lu de lei,’ ze tewgaipeu ze aipaupeu Dabidbe de mak mei?” kacheu de lei.

⁶Chidadege Akisbe ne Dabidbe je kû lu pechu, “Tingwang ne bambe luigum ze, nang â lungsangtew ze bam de lei, zai herei ’nggitatbe ge a dage nang zuapatrabe ze a dage â I â ka’nzeibe hang ’nning gai lei; a dage nang wangbe mai gene nemai riâ chang ze ning dage mâ de maube I ngaupat mak daseu. Acheusede besuitewme ramme ne ning peireige hezuâ mak te lei.

⁷Chidaze chunage helatwang dai de zu lau; zai yine ze tatchu lau, dezai Philistinme besuitewme lungsui nang tew’nsia mak ra hangge zeu,” kacheu de lei.

⁸Zai Dabidbe ne Akisbe je, “Kane I ne ’ndaikau tew gai ’ndi lau? A wangpeu heguang teureime je ’nggi ra hangge I zuapatmakrabe hangge ning guâ ka’ngguabe ge I gutbe gene chuna riâ changbe ge ning guâ ka’ngguapeu dagene ’ndaikau ngaupat lu lau?” kacheu de lei.

⁹Zai Akisbe ne Dabidbe je kak ze, “A mikngau ge nang â Hera gu angel’mpeu gum ze heziâkga lei be I chî lei; acheuleusede Philistinme gu sipai ge kanguame ne, ‘Pa â herei ge anui dage nguatat mak ra lei,’ kacheu de lei.

¹⁰Chidaze chunage ning dage nguawangme ning wangpeu guâ ka’ngguame je ngua lu hechuasûn chu le lau; zai hechuasûn ’ngngaichu lu bapat gap dezai tatrimna de zu lau,” ze kacheu de lei.

¹¹Chigum ze Philistinme dei ’mbe helatwang dai de ra hechuasûn ze pe gu ziemmena je ngua lu Dabidbe zuapat ti de lei. Kane Philistinme â Jezril ’mbe hang di de lei. -