Read Zeme Naga 1 SAMUEL 3 Bible Online

1 SAMUEL 3 - Zeme Naga bible

1 SAMUEL 3

¹Chuna â ’mpeumi napoine Samuelbe â Elibe kangge Tingwang guâ ’nggua ze bam di de lei, zai chipau ting ’ngka â Tingwang gu sam cham lei; keliâbe ngau’nzie mak lei.

²Chipau ting ge â Elibe, pe mik ngaukezin di de lei, dadege pa ngauchi ta di ze, pebâm ge bam bam di de lei;

³Hera gu hemibung â ’mmit mak kerei lei, zai Samuelbe Hera gu hingdebung bambe bâm Tingwang gu kellumki lungge jeikela bam de lei.

⁴Dadege Tingwang ne kû ze, “Samuelbai, Samuelbai!” kacheu de lei, zai pa ne “Aige I lamui lei!” kacheu de lei.

⁵Zai Elibe tailam pakwang lu, “Aige I lamui lei, nang achu ku daseu,” ze kacheu de lei. Kane pa ne, “I â kû me lei; jei dai zu lau,” acheu bei de lei. Dadege â pa gut dai lu jei dai di de lei.

⁶Zai Tingwang ne kû dai ze, “Samuelbai!” ze kacheu de lei. Zai Samuelbe chu lu Elibe tailam pat dai di de lei, zai acheu sa ze, “Aige I lamui lei, nang ne achu kû daseu,” ze kacheu de lei. Kane pa ne rang ze, “I â kû me lei, a na gau, jei dai zu lau,” acheu bei de lei.

⁷Chuna Samuelbe â Tingwang je chî mak, zai Tingwang gu sam pechu liâ mak kerei dadegeu.

⁸Zai Tingwang ne lua pakechumbe Samuelbe je kû kadai de lei. Zai pa chu lu Elibe tailam pat lu, “Aige I lamui lei, nang ne achu ku daseu,” ze kacheu de lei. Chidadege napoine je Tingwang ne ku de lei be Elibe chî di de lei.

⁹Chidadege â Elibe ne Samuelbe je rang ze, “Tat ze jei du lau, zai pa ne ningchu kû lêuzai â, nang acheu sa ra lei, ‘Rang gai zu lau, Tingwang gau, ning guâ ka’ngguapeu ’ngking lamui lei,’ acheu zeu,” ze acheu bei de lei. Dadege Samuelbe tat lu jeî ge jeikeu gai di de lei.

¹⁰Zai Tingwang wang ze pe suage sap lu, keraî’ngka lua gum kû ze, “Samuelbai! Samuelbai!” kacheu de lei. Zai Samuelbe ne kak ze, “Sa gai zu lau, ning guâ ka’ngguapeu ’ngking lamui lei,” kacheu de lei.

¹¹Dadege Tingwang ne Samuelbe dage rang ze, “Pie le lau, pe kun kena bamme leine seu lu ze penui kun ’nchak ra Israelram ge mâ-kat I tew gai gu de lei.

¹²Chipau ting dezai Elibe peireige pe ki tedeu ge bepîbang gene betun changbe riâ sagai’ndibe leine tewpui gai gu de lei.

¹³Zai pechu I rang gai ’nde lei, betingbeta hangge pe ki je I tewsâ gu de lei, hemui-helut kesiabe pa chikâbambe hangge zeu, pe name ne Hera je sakahebâbe ziegeneu, zai pa ne penui je deî’nsaumakbe ziegeneu.

¹⁴Chidaze Elibe ki je I deseu gai ’nde lei, chi Elibe ki gu hemui-helut ze herâtewbe ne, zai mâ-peipatbe ne betingbeta tewkuakdairabe mak lei,” ze kacheu de lei.

¹⁵Hechua bapat mak tâne Samuelbe â jei bam lei; dadege pa ne Tingwang ki gu ’ngkam latpat kai de lei. Zai Samuelbe â keliâbe ze Elibe je saliahing de lei.

¹⁶Kane Elibe ne Samuelbe je kû lu ze, “A na Samuelbai,” ze kacheu de lei. Zai pa ne, “Aige I lamui lei,” kacheu de lei.

¹⁷Elibe ne, “Ningchu pa ne rangliabe ze ’ndaikau lau? A dagene chize ’ngkim se lau. Peize Hera ne chigum ze ning peireige tew gai be lau, zai chipau peireige du nang ne a dage pa ningchu rangliabe ramme tei’mbai lêuzai du tâtewgaibe lau,” acheu bei de lei.

¹⁸Dadege Samuelbe ne mâgetaleine tei’mbai mak ze pechu ranglia kam bei de lei. Zai pa ne rang ze, “Chize â Tingwang de lei; peize pa ne yira-rabe tew gai zu lau,” ze kacheu de lei.

¹⁹Zai Samuelbe chîngchu ze, zai pe dage Tingwang bam zai pe sam ramme kedei ge mâ de keu gai ra pei mak te lei.

²⁰Zai Israelme leine Dan gene Beer-sheba ge bamme leine ne Samuelbe je Tingwang gu kemeu’mpeu hang tew gai ’nde lei be chî di de lei.

²¹Zai Shilo ge Tingwang ne liâ kadai de lei, Tingwang gu sam ne Shilo ge Samuelbe je Tingwang ne liâ gai daseu.