Read Zeme Naga 1 SAMUEL 30 Bible Online

1 SAMUEL 30 - Zeme Naga bible

1 SAMUEL 30

¹Chunage pakechumbe mai Dabidbe benai pe kumme wangchang dege, Amaklekme ne Negeb ge benai Ziklag peireige hereigua de lei, penui ne Ziklag je duî lu hemi ne rû ’ndi de lei,

²zai chige lungme ’mpuimi ramme benai ’nteumena, kedi-kechei leine je nîm ’ndi de lei; penui ne mî je du tewchat mak lei, kane penui je teitat ti de lei, zai penui ’mpuî ’mbe tat ti de lei.

³Zai Dabidbe benai pe kumme namdi ge wangchang dege, hemi ne chize rû ’ndi, zai penui nâu ramme benai penui name ’mpeumi benai ’mpuimi je kebang hang teitat ti laleu de lei.

⁴Chidadege Dabidbe benai pe kumme hapka’nrung de lei, penui ran-ga di ze hapchitadibe riâ chang zeu.

⁵Dabidbe nâu kena, Jezril’mpui Ahino-amle benai Karmel’mpeu Nabalbe nâu kemîpui Abigaille je du kebang hang nîmtat ti de lei.

⁶Zai Dabidbe pe duângga-desang di de lei, penui name ’mpeumi ramme benai ’mpuimi ramme deu hanggene ziemmename leine penui suisia-desangdibe ziegene pechu tingchu ne tuârabe sam sadibe ziegeneu. Kane Dabidbe â pe Rapeu Tingwang dagene pe ran tew’nchi gai lu bam de lei.

⁷Zai Dabidbe ne Ahimelekbe na, tingkupeu Abiatharbe je, “A dage tingkupuâ teiwang gai lau,” acheu bei de lei. Chidadege Abiatharbe ne Dabidbe dage tingkupuâ teiwang gai bei de lei.

⁸Zai Tingwang dage Dabidbe mâ-ka’mmêt te lei, “Aime bau chai I ’nsatat ra mei? Penui je I gua’nsachang ra mei?” ze acheu zeu. Pa ne pechu kak ze, “Gua’nsa zu lau; nang gua’nsachang sing gu, zai meupat sing gu lei,” kacheu de lei.

⁹Chidadege pe dage bamme ziemmena haî seruk je ngua lu, Dabidbe zuapat ti de lei, zai ’nsakkaidiakme bambe bâm Besor ’nggeuterak ge penui wang de lei.

¹⁰Kane Dabidbe â pa benai ziemmena haî medai je ngua lu gua’nsatat te lei; Besor geuki ka ra lei-desangdime ziemmena haî na je â ’nsak kai diak te lei.

¹¹Penui ne ’nduloa gene Ijip’mpeu je ngaudau lu, pechu Dabidbe dage teiwang de lei; zai penui ne pechu tingku pei bei ze pa teu de lei, penui ne pechu hedui sak ra pei de lei.

¹²Zai penui ne pechu ’mbeuchî tingku kat, zai grepchîhuâ kena pei bei de lei. Zai pa mâ-teu gai lu dege peranchiwang dai di de lei; pa â tingku teu mak, zai hedui sakmakbe hezie kechum muî kechum di dadegeu.

¹³Zai Dabidbe ne pechu, “Nang châu kiangna kau lau? Zai ’ndai’nggene nang wangbe kau lau?” kacheu de lei. Pa ne, “I â Amalek’mpeu guâ ka’ngguapeu, Ijipme rehangme lei; hezie kechumne suage I ’nrâdibe ziegene a pau ne achu put kai bei de lei;

¹⁴anui ne Kerethme gu Negeb peireige benai Juda gu mâ-leine benai Kaleb gu Negeb peireige hereigua de lei. Zai Ziklag namdi ze anui ne hemi ne rû ’ndi de lei,” ze kacheu de lei.

¹⁵Zai Dabidbe ne pechu, “Aime bau dage nang achu nguakeu gai ra mei?” acheu bei de lei. Zai pa ne, “Nang achu tewchat mak ra, zai a pau ba ge achu peipat kai mak ra hangge a dage deseu gai lau, chidezai aime bau dage I ne ningchu nguakeu gai bu lei,” kacheu de lei.

¹⁶Zai pa ne pechu nguakeu gai dege, pie le lau, penui ne heram luî bamtenaitai di, Philistinme dei ge benai Juda dei ge penui ne hereichâ misongga ze lulube ziegene teu ze sak ze lim ze bam de lei.

¹⁷Zai Dabidbe ne ba’nzangrabe gene bechai mai hegî riâ chang ze penui je bichat te lei; zai rehangme haî medai put-hu chingchua lu paktime je sâu ze penui ruage mî de pak’mbiapat mak te lei.

¹⁸Amalekme ne teitattibe leine Dabidbe ne lu dai lu de lei; zai pe nâu kena je Dabidbe ne ’nri dai lu de lei.

¹⁹Kecheibe mei nune kedibe mei nune penui na ’mpeumi mei, ’mpuimi mei hereichâ mei nu ’ndaikaukau mei ze teitattibe leine mâ de gadibe tew mak te lei; Dabidbe ne pelane teiwang gai kadai de lei.

²⁰Dabidbe ne melidung benai kebuidung ramme leine du nîm kam ’ndi de lei; zai baudime ne chi kaurui ramme je pe suage kumtat te lei; zai acheu sa ze, “Aize â Dabidbe gu hereichâ de lei,” kacheu de lei.

²¹Chidadege ziemmena haî na Dabidbe chai suitat ra hangge leizûdime, zai Besor geuki taige sâudiakkai’ndime dage Dabidbe wang de lei; zai penui ne Dabidbe benai pe kumme je suidau ra pat te lei; zai baudime dage Dabidbe wang’nna dege, penui je pa kakellum de lei.

²²Chidadege Dabidbe dage nguatatme ’mpeumi ramme ruage ziemmena kesiame benai katîmphime ne, “Penui nâu name je ngua lu tatterabe runne zangno, penui â anui dage nguatat mak daze anui ne sutdailube hereichâ ramme â mâ de penui je â anui pei ra mak lei,” kacheu de lei.

²³Kane Dabidbe ne, “A puiname gau, Tingwang ne anui je peibeibe geze, chigum ze ningnui tew mak ra lei; pa ne anui je ’nzuak kai bei, zai anui je ’nggi ra wangme bau je anui ba ge pei gai bei de lei.

²⁴Aipau deu ge châu ne ningnui kuâ ’ngking be ra lau? Herei ra wangkeupeu gu hedam gum ze keruareîpeu dam du chigum ra lei; penui ’nzi ’nsamrap ra lei,” ze acheu bei de lei.

²⁵Zai chipau mai gene seu ze pa ne Israelme hangge nemai riâ chang ze chize hingde rawdiakkaibe benai hingdetewgaibe hang chang ra tew gai bei de lei.

²⁶Ziklag ge Dabidbe wangchang dege, pa ne pe kangme Juda ge gechîngme dage pe gu hereichâ gêsa â lang gai ze, “Aize Tingwang teureime dagene hereichâ ngaube gene ningnui hangge kela lang gai de lei,” ze kacheu de lei.

²⁷Chize â Bethel ge bamme, Negeb gu Ramoth ge bamme, Jattir ge bamme,

²⁸Aroer ge bamme, Siphmoth ge bamme, Eshtemoa ge bamme,

²⁹Rakal ge bamme, Jerahmilme gu namdi ramme ge bamme, Kenme gu namdi ramme ge bamme,

³⁰Horma ge bamme, Borashan ge bamme, Athak ge bamme,

³¹Hebron ge bamme, Dabidbe benai pe kumme tatruagaibe bâm leine hang ge lang gai de lei. -