Read Zeme Naga 1 SAMUEL 31 Bible Online

1 SAMUEL 31 - Zeme Naga bible

1 SAMUEL 31

¹Chunage Philistinme ne Israelme je herei ze bam de lei; zai Philistinme masua gene Israelme pak te lei, zai Gilboa Loa ge bikau kam gai ’ndi de lei.

²Zai Philistinme ne Saulbe benai pe name je ’nsachang lu de lei; zai Philistinme ne Saulbe na ’mpeumi ramme, Jonathanbe benai Abinadabbe zai Malkishuabe je gî ’ndi de lei.

³Saulbe peireige kahereibe peranchi-desang di de lei; zai bai’mpikapme ne pechu kaptau ’ndi de lei; zai hetubaimpikapme ne pechu tewhejam’mmi ’ndi de lei.

⁴Chidadege Saulbe ne pe gu hereimeruateipeu je, “Aime rumgetenmakme ne wang ze achu huîpela gai mak ra, zai achu teihenuitew gai mak ra hangge, ning gu hiazutkie lupat lu, chize ne achu huîpelapik kai zu lau,” ze kacheu de lei. Kane pe gu hereimeruateipeu ne chize tewmeu tai de lei; pa hing-desang di dadegeu. Chipauziegene Saulbe pe runne pe gu hiazutkie tei lu, chipau peireige kâukeu gai de lei.

⁵Zai Saulbe â chai di de lei be pe gu hereimeruateipeu ngau lu dege, pa du pe gu hiazutkie peireige kau gai lu, pechu nguachai gai di de lei.

⁶Aigum ze Saulbe benai pe na ’mpeumi ramme hangchum, zai pe gu hereimeruateipeu, zai pe kumme leine mai kat gene chai kam di de lei.

⁷Zai Israelme ’nggeuchuak gene katlam ’mbe bamme zai Jordan gene wîgiam ’mbe bamme Israelme â pak te da, zai Saulbe benai pe na ’mpeumi ramme â chai de lei be ngau lu dege, penui gu namdi ramme put kai nan ze pak kam di de lei; zai Philistinme ne wang lu chiramme ge lung di de lei.

⁸Bechaibe mai ge kechaipum ramme gene Philistinme mâ-getai le ra wang dege, Saulbe benai pe na ’mpeumi ramme hangchum Gilboa Loa ge kâugaidibe penui ngaudau de lei.

⁹Zai penui ne pe peîdâng lu pe gu hereimerua ramme luaktat ti de lei, zai penui gu heraluîtewbe ramme benai baudime dage hesuiyibe sam pau gai ra hepâupaume je Philistinme ram dei pebâm ’nsangne ge lang gai de lei.

¹⁰Pe gu hereikerua ramme ze Ashtaroth-râ je kakellumbeki ge penui ne kai bei de lei; zai penui ne pe pum ze Beth-shan gu kerie ge rat kai bei de lei.

¹¹Kane Saulbe je Philistinme ne ’ndaikau tew gai bei mei be Jabesh-gilead ge lungme seu lu dege,

¹²Gekuume leine zuachu ze, tattingbabak kai ze, Beth-shan gu kerie gene Saulbe pum benai pe na ’mpeumi ramme pum lu ’ndi de lei; zai penui Jabes ge wang lu chigene penui je rû gai de lei.

¹³Zai penui râ ramme penui ne tei lu ze, Jabes ge tamariskbang kangge bai gai bei de lei, zai hezie sena teseurei gai de lei.