Read Zeme Naga 1 SAMUEL 4 Bible Online

1 SAMUEL 4 - Zeme Naga bible

1 SAMUEL 4

¹Zai Samuelbe gu sam Israelme leine dage wang de lei. Chuna Israelme Philistinme je ’nggi ra zuapat ti de lei; Ebenezer ge penui ’ndui gai de lei; zai Aphek ge Philistinme ’ndui gai de lei.

²Philistinme sapdapa lu ze Israelme je ’nggichu di de lei, zai hereichu dege, Israelme je â Philistinme ne ngam ’ndi de lei, hereipung gene ’mpeumi chang medai gum ze bihiam ’ndi de lei.

³Zai hereikangme baudime sieki ge wang dege Israelme gu gechîngme ne, “’Ndaitew ze Tingwang ne Philistinme suage nemai anui je tewhelêu gai lau? Kei lei, Tingwang gu samhatkaibe hingdebung Shilo gene ailia ’mbe teikeu gai kei lei, chidezai pa anui ruage wang lu anui teureime ranchi gene anui je ’nripat kai le ra hangge zeu,” ze kacheu de lei.

⁴Dadege Shilo ’mbe ziemmena lang gai de lei, zai baudime gu Tingwang gu samhatkaibe hingdebung Kerubme peireige bambe chilia ’mbe teiwang ra hangge zeu; zai Elibe na kena Hophnibe benai Phinehabe du Hera gu samhatkaibe bambe bâm ge bam lei.

⁵Tingwang gu samhatkaibe hingdebung sieki ge wangchang dege, Israelme leine ’nrunghim gai de lei, dadege kedei kengingchun bam de lei.

⁶Zai Philistinme chi ka’nrungbe kuâ seu lu dege, “Hebraime gu sieki ge ’nrunghimbe kuâ ze ’ndaitewbe rimba lau?” ze penui kacheu de lei. Zai Tingwang gu hingdebung sieki ge wangchang la de lei be penui chî lu dege,

⁷Philistinme hing di de lei; “Aipau sieki ge Hera wang gai la de lei,” ze penui kacheu de lei. Zai penui ne sa ze, “Anui hang lungkahereube de lei! Aigumbe ze besua’ngka â wangchang mak lei.

⁸Anui hang lungkahereube de lei! Aipau hera reziechibe ramme tâtewchibe gene châu ne anui je ’nripat kai ra lau? Aipau hera ramme ze Ijipme je hênamchangbe ge tewsabe zat leine ne tewchatbe hera ramme de lei.

⁹Sap’ntip le lau, ningnui runne ’mpeumi ’nsîng-sîng ze peipat kai lau, Hei Philistinme gau, penui ne ningnui gu kebang gum ze Hebraime gu kebang chang mak ra hangge zeu; ’mpeumi ’nsîng-sîng ze ningnui runne peipat ze ’nggi zu lau,” ze kacheu de lei.

¹⁰Dadege Philistinme ka’nggi de lei, zai Israelme je duî ’ndi de lei, zai pe ki lam-lam’mbe penui pak kam di de lei; zai chige misongga bichat ’ndi de lei. Israelme mi pî ne tatbe hereikangme chang himreu gum ze kâuhiam di de lei.

¹¹Zai Hera gu hingdebung ze teitat ’ndi de lei; zai Elibe na kena, Hophnibe benai Phinehabe je bichat ’ndi de lei.

¹²Zai Benjamin’mpeu kahereibe bâm gene paktat lu, chipau mai sing ge Shilo ge chang de lei; pe paî hit ze, pe peî ge kedei ’nruk kai lu zeu.

¹³Pa wangchang dege, Elibe â pe bâm ge ’ntau lu, Hera gu hingdebung hanggene pe lung kedun ze bam dadege ’mpuîhimdi taige piekua bam de lei. Zai chipaupeu ze namdi ge wang ze mâ-rasam ze salia gai dege, namdi leine ka’nrung de lei.

¹⁴Elibe chi ka’nrungbe kuâ seu lu dege, “Aipau ka’nrungbe ze ’ndaikau lau?” ze kacheu de lei. Dadege chipaupeu wang lu Elibe je salia de lei.

¹⁵Chuna Elibe â kum riaksekui ze desat chang di, zai pe mik heruî di dadege, pa ngauchi ta di de lei.

¹⁶Zai chipaupeu zene Elibe ze rang ze, “I ze herei gene wangpeu de lei; herei gene nemai I pakpat te lei,” ze kacheu de lei. Zai pa ne, “’Ndaigum ze chigum tat lu lau, a na gau?” ze kacheu de lei.

¹⁷Samkela pungwangpeu ne kak ze, kacheu de lei, “Israelme â Philistinme suagene pak te lei, zai chige du ziemmename ruage tewchat-kadesang de lei; ning na kena, Hophnibe benai Phinehabe du chai de lei, zai Hera gu hingdebung du teitat te lei,” ze acheu zeu.

¹⁸Hera gu hingdebung ze pa sataû gai dege â, teririe kemui hiage pe bâm gene ’ncheilakkeu di de lei; zai pe guang sukpup nan ze pa chai di de lei, pa â chîng di pe pum rit ti dadegeu. Israelme ram ge tingkum hedai pa nguasamram ze bam de lei.

¹⁹Chunage pe mupui, Phinehabe nâu â ’mpung ze hena lung ra na di bam de lei. Zai Tingwang gu hingdebung teitat te lei be sam pa seu lu, pe pau zai pe napeu â chai de lei be seu lu dege, pa kukdung lu henalung de lei, pe dage keri’nnangwang di dadegeu.

²⁰Zai pa chai ra changdibe luage, ’mpuimi henapuaka’nname ne rang ze, “Hing se lau, nang ’mpeumi napoine lungkeu la daseu,” ze kacheu de lei. Kane pa â kak mak, zai ’ngking du ’ngking mak te lei.

²¹Zai pa ne napoine ji, Ikabod ’ntak kai de lei, “Israelme dagene Tingwang ngeudibe rimna de lei!” kacheube hangge zeu, chize Hera gu hingdebung teitattibe ziegene benai pe pau benai pe napeu chaidibe ziegeneu.

²²Zai pa ne sa ze, “Pengeudibe Israelme dagene rimna de lei, Hera gu hingdebung ze teitat di daseu,” ze kacheu de lei.