Read Zeme Naga 1 SAMUEL 5 Bible Online

1 SAMUEL 5 - Zeme Naga bible

1 SAMUEL 5

¹Hera gu hingdebung ze lu lu dege Philistinme chize Ebenezer gene Ashdod ’mbe puatat te lei;

²dadege Hera gu hingdebung ze Philistinme lu lu chize Dagon ki ge pungtat lu Dagon taige dung gai de lei.

³Zai Ashdodme bechai mai hechuasûn chu dadege, pie le lau, Dagon ze Tingwang gu hingdebung suage kedei ge pe ju kau’ngkum lu laleu lei. Dadege Dagon je tei lu pechu pe bâm ge kai dai bei de lei.

⁴Kane bechai mai penui chu dege, pie le lau Tingwang gu hingdebung suage Dagonbe ze kau’ngkum la leu lei, zai Dagon pei benai pe ba kena ze bet ti ze namsûng ge tuâ bam de lei; Dagon pumdâng runne ’nsak kai lei.

⁵Ai dadege Dagon gu tingkume zai Dagonbe ki ge gutme leine Dagonbe kâugaibe namsûng Ashdod ge bambe ge chuna ting chang ze mî de ka gai mak lei.

⁶Ashdodme peireige Tingwang ba ranchi hua gai ze, pa ne Ashdodme benai pehuâzie ge bamme je tewhingrim gai ze heteu (hejâmteube) ramme ne penui je tewsâ gai bei de lei.

⁷Zai Ashdodme mâ-wangchangbe ramme ngau lu dege, penui ne sa de lei, “Israelme Rapeu gu hingdebung ze anui dage bam bam ra mak te lei; anui peireige benai anui rapeu Dagon peireige pe ba ranchi hua gai daseu,” ze acheu zeu.

⁸Dadege penui ne lang gai bei ze Philistinme gu heguangme leine wang’ndui lu ze, “Israelme Rapeu gu hingdebung ze anui ’ndaikau tak tew ra lau?” ze kacheu de lei. Penui ne kak ze, “Peize Israelme Rapeu gu hingdebung ze Gath ’mbe teimie gai be lau,” ze acheu bei de lei. Dadege Israelme Rapeu gu hingdebung ze penui ne chilia teimie gai bei de lei.

⁹Kane penui ne teimiegailube chângge chipau namdi peireige Tingwang ba hua gai ze, kehingbe tew gai ze, pa ne chipau namdi gu ziemmena ramme hename benai gechîngme je tewsâ gai bei de lei, dege heteu ramme penui peireige ’ndetpat ti de lei.

¹⁰Chidadege Hera gu hingdebung ze Ekron ’mbe penui lang gai de lei. Kane Hera gu hingdebung ze Ekron ge wang gai bei dege, Ekron gu ziemmename ’nrung ze, “Penui ne, Israelme Rapeu gu hingdebung ze anui je benai anui gu ziemmena ramme je tewchat kai ra anui tailam teiwang de lei,” ze kacheu de lei.

¹¹Chidadege penui ne lang gai bei ze Philistinme gu heguangme leine wang’ndui lu, “Israelme Rapeu gu hingdebung ze anui dagene langtua ’ndu lau, pebâm ’mbe peize helatwang dai zu lau, dezai anui benai anui gu ziemmename je tewchat mak ra hangge zeu,” ze kacheu de lei. Namdi pelane ge hing kam di dadegeu. Chige Hera baran chi-desang di de lei.

¹²Ziemmena chaimakme je du heteu ne tewherereu’nteu gai bei de lei, zai namdime ka’nrungbe kuâ tinggîm chuchang di de lei.