Read Zeme Naga 1 SAMUEL 6 Bible Online

1 SAMUEL 6 - Zeme Naga bible

1 SAMUEL 6

¹Tingwang gu samhatkaibebung ze Philistinram ge kêu sena bam gai lei.

²Philistinme ne tingkume benai hedachakme je kû lu ze, “Tingwang gu hingdebung je ’ndaikau anui tew ra lau, ’ndaikau ne anui chize pebâm ’mbe ’mput kai ra mei be anui je ranglia lau?” ze kacheu de lei.

³Penui ne rang ze, “Israelme Rapeu gu hingdebung ze ningnui langtua dai ra lei zai â perua ’mput kai se lau, kane ’ndaigummeisedu pechu kemaube-râtewbe kela ’mput kai ze langtua ra lei. Chidezai ningnui je tew’mmi gai gu, zai ’ndaitewbeibe ne pe ba ningnui dagene tei’mbia mak mei be ningnui chî gu lei,” ze kacheu de lei.

⁴Zai penui ne, “’Ndaibe ze kemaube-râtewbe peipatbe anui ne pechu pei ra lau?” kacheu de lei. Penui ne kak ze, “Philistinme heguangme riak luigum ze gechâk ne tewbe heteubut luî mengeu zai gechâk ne tewbe hezapui luî mengeu pei ra lei; chipau rarît singbe ne ningnui benai ningnui gu heguangme peireige keu gai daseu.

⁵Daze ningnui gu heteu benai ningnui gu heza ramme, ningnui gu heram tew’nsia kam’ndibe chiramme luî tak ze ningnui tew sing ra lei, zai Israelme Rapeu je hengêutewbe pei ra lei; pa ne ningnui benai ningnui rapeu ramme, zai ningnui gu heram gene pe ba tew’ncha gai leu gu lei.

⁶Ijipme benai Pharaobe ne penui lung tewka’nchi gum ze ’ndaitew ze ningnui lung ningnui tew’nchi ra lau? Pa ne penui je kedaklube chângge penui ne chipau zat je tat ra pei mak, kane penui tatlie mak mei?

⁷Chunage chidaze timriang karchibe kedâ lu, getumpui yibe kena mâdau de guangkam punggaimakbe kau kedâ le lau, zai guangkam ze getum timriang ’mbe teitat kai zu lau, kane bepoine ramme je â penui dagene teichâm lu, kilûng ’mbe teiwang gai ne lau.

⁸Zai Tingwang gu hingdebung tei lu ze timriang ge kai zu lau, zai pehiage bambe mâbung (bakso) ge gechâk luî ramme ningnui pe dage kemaube-râtewbe gu kela peipatbe ze kai le lau. Chidezai chize langtua ne lau, zai peize pe gu ’mpuî ’mbe tat zu lau.

⁹Zai piekua le lau; pe ram ’mpuî ’mbia chize tat ti zai â, chize pa de lei, anui je tewhereugaibe zeu; kane tat makchai â, anui je tewkahereube ze pe ba ne mak lei be anui chî gu lei, chize anui dage acheu ze wangchangbe kau de lei,” kacheu lei.

¹⁰Chime ne chigum tew gai de lei, zai getumpui kena pe poine kanguabe kau penai guang ge guangkam kai lu timriang ge kai de lei, kane bepoine â pe ki ge kainam gai ’ndi de lei.

¹¹Zai penui ne Tingwang gu hingdebung ze timriang ge kai de lei, zai gechâk ne tewlube hezapui luî benai heteubut luî ramme ze mâbung (bakso) ge kai lu timriang ge kai de lei.

¹²Zai getum kena ze ’nzeitun ze Beth-shemes ’mbe ’mpuî kedibe ge penui tatbe luigum ze pe kuâ ’nra ze tat ti de lei; hezat’mbia du zai heku’mbia du tatkelik mak lei, zai Philistinme gu heguangme penui chai-chai tat ze Beth-shemeshram rai riâ tatchang lei.

¹³Chuna Beth-shemes ge bamme hingbak ge penui gu dekuîmeu gat ze bam lei; zai penui mik’ngngangrak chu dege hingdebung ngau lu penui suiyi di de lei.

¹⁴Hingdebung ze Beth-shemes’mpeu Joshuabe gu helu pung ge wang gai lu chige sau gai de lei. Tingchu kedibe chige bam lei; zai penui ne timriang kang ramme ’nsâupâng lu Tingwang dage getum kena zene rûkambe-râtewbe peipat kai de lei.

¹⁵Zai Lebime ne Tingwang gu hingdebung benai pe hiage bambe mâbung (bakso), gechâk ne tewlube mâ-luî ramme bambe ze tingchu kedibe peireige chiramme ze kai de lei; zai Tingwang gu tingnaimikpui ge Beth-shemes ge bamme ne rûkambe-râtewbe peipat ze herâtewbe ramme tew gai de lei.

¹⁶Zai Philistinme gu heguangme hangmengeume chize ngau lu dege chipau mai ge penui Ekron ’mbe helat dai di de lei.

¹⁷Tingwang dage Philistinme ne hemui-râtewbe peipatbe teiwangbe gechâk ne tewbe heteubut luî ramme ze aize lei: Ashdod hangge kat, Gaza hangge kat, Ashkelon hangge kat, Gath hangge kat, Ekron hangge kat;

¹⁸zai gechâk ne tewbe hezapui luî, Philistin heguangme hangmengeu gu namdi riak, chi kerie riegua’ndibe namdi ramme benai kerie tewmakbe keloa ramme riak luigum ze peibe ramme zeu. Tingchu kedibe pe taige penui ne Tingwang gu hingdebung teiwanggaibe chutum ze chuna riâ chang ze sakki hang Beth-shemes’mpeu Joshuabe gu helu pung ge lamui lei.

¹⁹Zai pa ne Beth-shemeshme hanggesame je tewchat ’ndi de lei, penui ne Tingwang gu hingdebung lung ze piebeibe ziegeneu; pa ne ’mpeumi riaksename je tewchat ’ndi de lei, zai Tingwang ne ziemmename ruage misongga tewchat’ndibe ziegene ziemmename hap desui ze bam de lei.

²⁰Dadege Beth-shemes ge bamme ne sa ze, “Tingwang aipau ka’nchibe Rapeu suage châu sapchi dui lau? Zai châu tailam pa hang ze anui dagene rimna de ra lau?” ze kacheu de lei.

²¹Dadege penui ne Keriathjearim ge bamme dage sampaume je lang gai ze, “Philistinme ne Tingwang gu hingdebung langwang dai la de lei, wangkeu lu ze ningnui tailam teihang du lau,” ze kacheu de lei.