Read Zeme Naga 1 SAMUEL 7 Bible Online

1 SAMUEL 7 - Zeme Naga bible

1 SAMUEL 7

¹Zai Kiriath-jearimme ne wangkeu lu Tingwang gu hingdebung ze teihang di de lei, zai peloa ge Abinadabbe ki lam’mbe teihang de lei; zai penui ne pe na Eleazarbe je diepat’nchi gai de lei, Tingwang gu hingdebung ze reî ra hangge zeu.

²Tingwang gu hingdebung bamgaibe gene betinggetie tat ti, patingkum ’ngkai riâ gum ze Israelme ki leine Tingwang dage hap ze bam de lei.

³Dadege Samuelbe ne Israel kibau leine dage sa ze, “Tingwang dage ningnui lung leine ne ningnui heliwang dizai â, ningnui ruagene heram kêdame gu hera ramme benai Ashtaroth (rapui) ramme ze tuâ ne zu lau, zai Tingwang lam’mbe ningnui lung ’nrei lu ze pe guâ runne ’nggua zu lau, dezai pa ne ningnui je Philistinme ba gene meupat kai gu lei,” ze kacheu de lei.

⁴Dadege Israelme ne Baal-râ ramme benai Ashtaroth-râ ramme tuâ lu, Tingwang guâ runne penui ’nggua di de lei.

⁵Dadege Samuelbe ne rang ze, “Israelme leine Mizpa ge wang’ndui gai lau, Tingwang dage ningnui hangge I kie gai gu lei,” ze kacheu de lei.

⁶Dadege Mizpa ge penui wang’ndui gai de lei, zai Tingwang suage hedui tuak lu ruî gai de lei, zai chipau mai ge penui teseurei ze acheu ze chige sa de lei, “Tingwang dage anui ne hemui gai ’ndi de lei,” ze acheu zeu. Zai Samuelbe ne Mizpa ge Israelme je nguasamram de lei.

⁷Chunage Israelme name Mizpa ge ’ndui gai la de lei be Philistinme seu lu dege, Philistinme gu heguangme Israelme je ’nggi ra hang de lei. Zai Israelme chize seu lu dege Philistinme je penui hing di de lei.

⁸Zai Israelme ne Samuelbe je rang ze, “Tingwang anui Rapeu dage anui hangge kellum sau se lau, dezai pa ne Philistinme ba gene anui je ’nripat kai be ra hangge zeu,” ze kacheu de lei.

⁹Dadege Samuelbe ne melipoine tungbe kau tei lu, Tingwang dage chize pelane rûkambe-râtewbe peipat kai de lei; zai Samuelbe ne Israelme hangge Tingwang dage kie gai bei ze, Tingwang ne pe kuâ kak kai bei de lei.

¹⁰Samuelbe rûkambe-râtewbe peipatbe luage, Philistinme ne Israelme je ’nggi ra wang’nchut ti de lei; kane Tingwang ne chipau mai ge pe kuâ kechibe ne Philistinme peireige ’nrung gai bei ze penui je tewtimra kam gai bei de lei; zai Israelme suagene penui je pak te ra tew gai bei de lei.

¹¹Zai Israelme ’mpeumi leine Mizpa gene zuapat lu, Philistinme je gua’nchu ze penui je Beth-kar ’ngkang riâ chang ze tewchat kam ’ndi de lei.

¹²Dadege Samuelbe ne tingchu kat lu lu, Mizpa benai Jeshana kakge chize sum gai bei de lei, zai pe ji ze Ebenezer acheu ze ’ntak kai de lei; pa ne, “Aigene Tingwang ne anui je ’ngngâ bei de lei,” ze kacheu dadegeu.

¹³Dadege Philistinme je â ngam ’ndi de lei, zai Israelme gu heram ge Philistinme gut dai ta di de lei. Zai Philistinme peireige Samuelbe ting leine ge Tingwang lumpum bam-bam de lei.

¹⁴Israelme gu namdi ramme Philistinme ne lu’ndibe ramme ze Israelme dage Ekron gene Gath riâ pei gai dai bei de lei, zai Philistinme ba gene penui gu heram ze Israelme ’nri dai lu de lei; Israelme benai Amorme kakge du desieyibe bam de lei.

¹⁵Israelme je Samuelbe ne pa ringbe ting tâluî samram de lei.

¹⁶Zai kum’nsangne Bethel, Gilgal zai Mizpa ge pa tat’nrui bam de lei; zai pa ne aipau bâm leine ge Israelme je samram de lei.

¹⁷Chidezaine Rama ’mbe pa wang dai dai lei, pe ki chige bam dadegeu, zai chige du Israelme je pa keyibe ne ngua’nggua bam de lei. Zai chige pa ne Tingwang dage herâtewbe bâm tew gai de lei.