Read Zeme Naga 1 SAMUEL 9 Bible Online

1 SAMUEL 9 - Zeme Naga bible

1 SAMUEL 9

¹Ziemmena hangkat Benjaminram kau, Benjaminme zat keheube kau, Aphiabe na, Bekorathbe na, Zerorbe na, Abielbe na, pe ji, Kisbe bam lei;

²zai pa pe na ’mpeumi hangkat pe ji Saulbe rehang pesakyipeu bam lei, Israelme ruage mî de pa suane pesakyibe kau ’ngga lei; ziemmena kêdame â pe keîtoa riâ du chang mak lei.

³Chunage Saulbe peu Kisbe gu hekunmerângne ramme ’ngga di lei, dadege Kisbe ne pe na Saulbe dage salia ze, “Tâka’ngguame ruage hangkat je ngua lu ze, chu lu tat ze hekunmerângne ramme je peu gai ni lau,” ze acheu bei de lei.

⁴Zai penui Ephraim loa gene tatpela ze Shalisharam tatpelatat ti de lei, kane penui ngau mak tai lei, zai Shaalimram tatpelatat ti de lei, kane chilia ’mbe du ga tai de lei. Dadege Benjamin ram penui tatpelatat ti de lei, kane penui ngaudau mak tai de lei.

⁵Zupram ge penui wang dege, Saulbe ne pe guâ ka’ngguapeu pe dage bambepeu je rang ze, “Kei lei, anai helat dai kei lei, a peu ne hekunmerângne je ’nningtenang ta di ze anai je ’nninghereu gu de lei,” ze kacheu de lei.

⁶Kane pa ne pechu rang ze, “Pie le lau, aipau namdi ge Hera gu ziemmena hangkat lamui lei, zai pa â ziemmena hengêutewbuibe kau lei; pa ne sabe leine gesang wangchang lei. Chilia ’mbe anai tat kei lei; pa anai tebeîtewbe tedeu ge saliachi duî lêu gu lei,” ze kacheu de lei.

⁷Dadege Saulbe ne pe guâ ka’ngguapeu je, “Anai chilia tat dezai ’ndaikau chipaupeu dage teiwang ra lau? Anai gu metie ge tingku ’ngga de daze Hera gu ziemmena dage teiwang ra anai kela hang ga dezei lau. Anai dage ’ndaikau la lau?” ze kacheu de lei.

⁸Kebangpeu ne Saulbe je kak ze, “Aige a dage gepûtgeî shekel bak medai ge bak kat lamui lei, zai I ne chize Hera gu ziemmena dage pei bu lei, anai ’mpuî ze anai je salia be ra hangge zeu,” ze kacheu de lei.

⁹(Tingtie’ngka â Israelram ge mige Hera gu ziemmena dage mâ-’mmêt ra tat dege, “Kei lei, gekungme tailam anui tat kei lei,” kacheu de lei; chuna pechu kemeu’mpeu, ze kûbe ze tingtie â gekungme, ze ku daseu.)

¹⁰Zai Saulbe ne pe guâ ka’ngguapeu je sa ze, “Yi de lei, kei lei, anai tat kei lei,” kacheu de lei. Dadege namdi ’mbe penai tat ti de lei, Hera gu ziemmena bambe bâm gezeu.

¹¹Namdi ’mbe peloa ge penai tat-hang dege, heleume ramme hedui tuak ra patme je penai kahedau de lei, zai penui je, “Gekungpeu aige lamei?” ze kacheu de lei.

¹²Penui ne kak ze, “Pa lamui lei; pie le lau, pa â ningnui suanege la de lei. Tat kelua zu lau; chuna gene namdi ge pa wang larei de lei, nemai ge baudime pebâm kehube gene herâtewbe ziegeneu.

¹³Namdi ’mbe ningnai gutgap dezai pechu ningnai ngau gu lei, pebâm kehube ge pa mâ-teu ra hangrabe suage zeu; baudime â pa wang mak tâne teu ra mak daseu, pa ne herâtewbe ze ’nnam gai sing ra chang daseu; bechâng dezai ’nnâgaime leine ze â teu gu lei. Chunage tat-hang zu lau, ningnai pechu hedau sing gu lei,” ze kacheu de lei.

¹⁴Dadege namdi ’mbe penai hang di de lei. Namdi ’mbe penai gut dege, pebâm kehu ’mbe tat ra Samuelbe penai tailam patbe penai ngau de lei.

¹⁵Chunage Saulbe wangrabe suabe mai ge Tingwang ne Samuelbe je lia de lei:

¹⁶“’Nchuamai chuna gumbe hî ge ning dage rehang’mpeu hangkat Benjaminram gene I lang gai gu lei, zai pechu Israelme a gume peireige heguang hangge nang ’nnuk kai ra lei, pa ne a gu ziemmename je Philistinme ba gene tew’nring gai gu lei; a gu ziemmename kahereube I ngau lu daseu, penui ka’nrungbe kuâ a dage wangchangdibe ziegeneu,” ze kacheu de lei.

¹⁷Samuelbe ne Saulbe je ngaube luage, Tingwang ne pechu salia de lei, “Aize ningchu I saliapeu ze de lei! Pa ze chi a gume peireige heguangrapeu de lei,” ze kacheu de lei.

¹⁸Dadege Saulbe teririe kemui ge Samuelbe dage wang lu ze, kacheu de lei, “’Ndai’ngge gekungpeu ki la mei be achu ranglia lau?” ze acheu zeu.

¹⁹Samuelbe ne Saulbe je kak ze, “I ze gekungpeu de lei, a sua ’mbe kehube bâm ’mbe hang zu lau, nemai ge nang a dage mâ-nguateu gu daseu, zai hechua dezai ningchu tat ra I pei gu lei, zai ning lung ge ka’nningbe bambe leine ningchu ranglia gu lei.

²⁰Ning gu hekunmerângne ramme hezie kechumne sua’ngka ’nggadibe ge ning lung mâ-ka’nningbe kai se lau, penui je â ngau lu daseu. Zai châu je Israelme luneilangbe lau? Chize ning hang benai ning peume ki leine hang mak mei?” ze kacheu de lei.

²¹Zai Saulbe ne kak ze, “Israelme zat ruage cheilangbe, I Benjamin kiria mak semei? Zai Benjamin zatme kelak leine ruage a kiduîme ze cheilangbe mak semei? ’Ndaitew ze aigumbe tak gene achu nang rang rei lau?” ze kacheu de lei.

²²Dadege Saulbe ne Samuelbe benai pe guâ ka’ngguapeu je ngua lu penai je hekisiâm ’mbe nguagut lu penai je ’nnâgaime ziemmena hanghimreu riâ gumme ruage penai je bâm yilangbe pei bei de lei.

²³Zai Samuelbe ne kahelangpeu je, “I ne ningchu pei gai ze, ‘Kaichâm gai ne lau,’ ze I ranggaibe hedam ze teipat chu lau,” kacheu de lei.

²⁴Dadege kahelangpeu ne bepi benai pegara ze tei lu Saulbe suage kai bei de lei; zai Samuelbe ne, “Pie le lau, ’ndaikau ’nsak kai mei be ze ning suage kai ’nde lei, teu zu lau, chize diegaibe hî changrabe suage ning hangge kaikua de lei, dezai hesangme ramme benai nang nguateu le ra hangge zeu,” ze kacheu de lei. Dadege Saulbe chipau mai ge Samuelbe benai nguateu de lei.

²⁵Zai pebâm kehube gene penui namdi ’mbe wangkeu dege, Saulbe hangge jeibâm heki’mpûm ge kâm gai bei ze pa jei di de lei.

²⁶Dadege tingba dege, Samuelbe Saulbe je ’mpûmgîm gene kû gai ze “Chu lau, nang ’mpuî ’mbe ningchu I lang gai ra hangge zeu,” ze kacheu de lei. Dadege Saulbe chu lu, Samuelbe benai pa chi ’mpuîhimdi ’mbe zuapat ti de lei.

²⁷Penui namdi kerie’mbang ’mbe zuakeu dege, Samuelbe ne Saulbe dage rang ze, “Tâka’ngguapeu je anai sua ’mbe raîtat ra rang gai be lau, zai tat’ntuatat ti dezai aige nang â ning runne kecheîne sau gai lau, dezai I ningchu Hera gu sam salia ra hangge zeu,” ze kacheu de lei.