Read Zokam Piancilna 1 Bible Online

Piancilna 1 - Zokam bible

Piancilna 1

¹A kipatcilin Pasian in van le lei piangsak hi.

²Tu-in lei in lim le mel nei loin a hawmpi hi a[1] a, tui thukpi maitang khuamial in tuamcipin tuite tungah Pasian Kha gamtang hi.

³Tua ciangin Pasian in "Khuavak om hen," ci-a khuavak ompah hi.

⁴Pasian in tua khuavak hoihsa a, khuamial panin khuavak khenkhia hi.

⁵Pasian in tua khuavak "sun" ci a, tua khuamial "zan" ci hi. Nitak omin zingsang om a - ni khatna ahi hi.

⁶Tua ciangin Pasian in, "Tui le tui kikhensak dingin tuite kikal ah vansin om hen," ci hi.

⁷Tua ciangin Pasian in vansin bawla vansin tung le vansin nuai-ah tuite kikhensak hi. A cih bangin ompah hi.

⁸Pasian in tua vansin "huihkhua" a ci hi. Nitak omin zingsang om a - ni nihna ahi hi.

⁹Tua khit ciangin Pasian in, "Van nuai-a tuite mun khatah kikhawmin leikeu kidawk hen," ci hi. A cih bangin ompah hi.

¹⁰Pasian in leikeu pen "leitung" ci a, tui vung khawm pen "tuipi" ci hi. Pasian in hoih sa hi.

¹¹Tua ciangin Pasian in leitangh in singkung lopa: amau nam ciat tawh kizui-in khaici a nei lopate le a gah sungah tang a nei singkungte piangsak hen," ci hi. A cih bangin ompah hi.

¹²Leitangh in singkung lopa amau nam ciat tawh kizui-in khaici a nei lopate le amau nam ciat tawh kizui in a sungah tang a nei a gah singkungte piangsak hi. Pasian in hoih sa hi.

¹³Nitak omin zingsang om a - ni thumna ahi hi.

¹⁴Tua ciangin Pasian in, "Zan pan sun a khenkhia dingin vansin a huihkhua ah khuavakte omin, tuate pen khuahunte, nite le kumte ciamteh nading limte hi henla,

¹⁵leitunga khuavak dingin vansin huihkhua-a khuavakte hi ta hen," ci hi. A cih bangin ompah hi.

¹⁶Pasian in khuavakpi nih - a lianzaw sun uk ding le a neuzaw zan uk dingin a bawl hi. Aksite zong a bawl hi.

¹⁷Pasian in leitung a taan ding

¹⁸sun le zan a uk ding khuamial pan khuavak a khenkhia dingin vansin huihkhua ah tuate koih hi. Pasian in hoih sa hi.

¹⁹Nitak omin zingsang om a - ni lina ahi hi.

²⁰Tua ciangin Pasian in, "Tua pen a nungta ganhingte tawh kidim henla lei tung vansin huihkhua ah vasate leng kawikawi ta hen," ci hi.

²¹Pasian in hih bangin amau nam ciat zui-in tuipi ganhing liante le tui sung a dim a nungta a tangtheite, le amau nam ciat zui-in kha a nei vasa namkim a piangsak hi. Pasian in hoih sa hi.

²²Pasian in tuate thupha pia a, "Cipha unla pungin tuipi sung tuilak teng dim un; leitungah vasate pung ta hen," ci hi.

²³Nitak omin zingsang om a - ni ngana ahi hi.

²⁴Tua ciangin Pasian in, "Leitung in amau nam ciat zui-in a nungta ganhingte: innsate, a bokvak ganhingte le gamsate amau nam ciat zui-in piangsak ta hen," a ci hi. A cih bangin ompah hi.

²⁵Pasian in gamsa amau nam ciat, innsa amau nam ciat, a bokvak ganhingte khempeuh amau nam ciat bawl hi. Pasian in hoih sa hi.

²⁶Tua ciangin Pasian in, "Ei lim ei tawh a kibangin mihing bawl ni-in, tuipi sunga ngasate, leitunga om huihlak vasate, innsate le a bokvak ganhingte a[2] khempeuh amau uksak ni," ci hi.

²⁷Tua bangin Pasian in ama lim sunin mihing piangsak a, Pasian lim sunin amah piangsakin anu le apa-in amaute piangsak hi.

²⁸Pasian in amaute thupha pia a, amaute tungah, "Cipha unla pung un; leitung khempeuh dim unla thuzawh un. Tuipi ngasate huihlak vasate le a bokvak a nungta ganhing khempeuh uk un," ci hi.

²⁹Tua ciangin Pasian in, "Leitung buppi-a po khaici a nei lopa namkim le a gah sunga khaici a nei singkung namkim khempeuh kong pia hi. Tuate in note an ding ahi hi.

³⁰Leitunga ganhing khempeuh, huihlak vasa khempeuh, a bokvak ganhing khempeuh - a sunga nuntakna huu a nei khempeuh - kunghing namkimte a an dingun ka pia hi," ci hi. A cih bangin hipah hi.

³¹Pasian in a bawlsa na khempeuh mu a, a hoih mahmah hi. Nitak omin zingsang om a - ni gukna ahi hi.