Read Zokam Piancilna 12 Bible Online

Piancilna 12 - Zokam bible

Piancilna 12

¹TOPA in Abram kiangah, "Na gam, na mite le na pa’ innkuante nusia-in nang kong lah ding gamah pai in.

²"Nang minam lianpi kong suaksak ding a; thupha kong pia ding hi; na min ka liansak dinga, nang, thupha khat na hi ding hi.

³Nang thupha hong piate, thupha ka pia dinga, nang hong hamsiat peuhmah ka hamsiat ding hi; nang tungtawnin leitunga minam khempeuh thupha kipia ding hi," ci hi.

⁴Tua ciangin TOPA gensa bangin Abram in nusia a; Lot in amah zui hi. Haran pan a paikhiatin Abram kum sawm sagih le nga a upa ta hi.

⁵A zi Sarai, a tupa Lot, a neihsa khempeuh le Haran-a a zat nasem khempeuh tonpih in Canaan gam zuanin paikhia uh a, tua lai-ah a tung uh hi.

⁶Abram in tua gam tawna, Shechem-a Moreh singkungpi phung dongah a pai hi. Tua hunin Canaan mite tua munah teng uh hi.

⁷Abram kiangah TOPA kilanga, "Nang suante a[63] tungah hih gam ka pia ding hi," a ci hi. Tua ciangin amah in ama tunga kilang TOPA ading biakna-tau khat dawh hi.

⁸Tua lai panin Bethel nisuahna lam mualte tungah paisuaka, a puanbuk a lam hi; a nitumna lamah Bethel oma, a nisuahna lamah Ai om hi. Tua lai-ah TOPA ading biakna-tau khat dawh a, TOPA min a lo hi.

⁹Tua ciangin Abram paikhia-a, Negev manawh in paisuak hi.

¹⁰Tua hun laitakin tua gamah kialpi tunga, kialpi nasia lua ahi manin Egypt ah tawlkhat sung a teng dingin Abram paisuk hi.

¹¹Egypt a lut kuan laitakin a zi Sarai kiangah, "Na mel a hoih mahmah lam ka thei hi.

¹²Egypt-te in nang hong muh uh ciangin ‘Hih nu ama zi hi,’ ci-in kei hong thatin nang bel hong hingkhawi ding uh hi.

¹³Nang hanga ka nuntakna bangmah a cih loh nadingin nang kei sanggamnu in kigen lecin kei hong limbawl ding uh hi," ci hi.

¹⁴Egypt ah Abram a tun ciangin Egypt-te in tuanu numei melhoih mahmah khat ahilam a mu uh hi. Pharaoh’ uliante in tuanu a muh uh ciangin

¹⁵Pharaoh kiangah amah phat uh a, ama kumpi innah a kipaipih hi.

¹⁶Tuanu hangin amah in Abram limbawla, Abram tuuhon, bawnghon, laa a nu le a pa, nasem numei, nasem pasal le kala-oh-te ngah hi.

¹⁷Ahi hangin TOPA in Abram’ zi Sarai hangin, Pharaoh le a innkuanpihte tungah natna nasia mahmah tungsak hi.

¹⁸Tua ciangin Pharaoh in Abram sama, "Kei bang hong cih na hi hiam? Bang hangin amah na zi ahilam hong gen lo na hi hiam?

¹⁹Bang hanga amah ka zi dinga ka lak theih nadingin, ‘Amah ka sanggamnu hi,’ ci na hi hiam? Tua ahi ciangin tu-in hi lai-ah na zi om hi, la inla pai in!" ci hi.

²⁰Tua ciangin Pharaoh in Abram tawh kisai-in a mite thu pia a, a zi le a neihsa khempeuh tawh amah a khakhia uh hi.