Read Zokam Piancilna 13 Bible Online

Piancilna 13 - Zokam bible

Piancilna 13

¹Tua ciangin Egypt panin Abram, a neihsa khempeuh le a zi tawh Negev ah paito a, Lot in amah zui hi.

²Abram in ganhing le ngun le kham hau mahmah hi.

³Negev panin amah Bethel a tun dong mun khat pan mun khat ah a pai kawikawi hi; a tunna mun pen

⁴hun masa lai-a Bethel le Ai kikal-a puanbuk lama biaknatau a dawh nasa mun ahi hi. Tua munah Abram in TOPA min a lo hi.

⁵Tu-in Abram tawh a ton kawikawi Lot in zong tuuhon le ganhon le puanbukte nei hi.

⁶Ahi zongin amaute a ten khawm uh ciangin leitang in amaute a vak zo nawn kei hi. Ahang in, amau neihsate tam lua mahmah a, a teng khawm thei kei uh hi.

⁷Tua hi a Abram gan cingte le Lot gan cingte kitawng uh hi. Tua hun lai-in Canaan mite le Periz mite zong tua gamah a teng uh hi.

⁸Tua ciangin Abram in Lot kiangah, "Eite unau khat i hi ciangin nang le kei kikal ahi a, nang gancingte le kei gancingte kikal ahi zongin kitotna i omsak nawn kei ding hi.

⁹Na mai-ah gambuppi om hi lo ahi hiam? Kipawl khen ni. Nang veilamah na pai leh kei taklamah ka pai ding hi. Nang taklamah na pai leh kei veilamah ka pai ding hi," ci hi.

¹⁰Lot khuadakto a, Jordan zanglei buppi in limtakin tui ngah a, TOPA’ huan tawh kibangin Zoar lam-a Egypt leitang tawh a kibatna mu hi. (Hih pen TOPA in Sodom le Gomorrah a suksiat ma ahi hi.)

¹¹Tua ahi ciangin Lot in ama adingin Jordan zanglei bup tel a, nisuahna lamah kisuankhia hi. Tua mi nihte kipawlkhen uh hi:

¹²Zanglei khuapite lakah Lot tengin Sodom gei ciangah a puanbuk a lam laitakin, Canaan gamah Abram teng hi.

¹³Tu-in Sodom-a mite gilo a, TOPA langah mawhna lianpite bawlbawl uh hi.

¹⁴Ama kiang pan Lot a paikhiat nungin TOPA in Abram kiangah, "Na omna panin khuadak to inla leilu-lam, leitaw-lam le nisuahna le nitumna lam en in.

¹⁵Na muhna gam khempeuh nang le na suante b[64] aa ahi den dingin kong pia ding hi.

¹⁶Na suante leivui ka bangsak dinga, mi khatpeuh in leivui a sim theih leh na suan-le-khakte zong kisim thei ding hi.

¹⁷Nang hong pia ding ka hi manin pai-in leitang adung a vai-in siksuak in," ci hi.

¹⁸Tua ciangin Abram in a puanbuk suankhia a, Hebron-a Mamre singkungpite kiangah teng hi. Tua lai-a TOPA tungah biakna-tau khat a dawh hi.