Read Zokam Piancilna 14 Bible Online

Piancilna 14 - Zokam bible

Piancilna 14

¹Hih hun laitakin Shinar c[65] kumpipa Amraphel, Ellasar kumpipa Arioch, Elam kumpipa Kedorlaomer le Goiim kumpipa Tidal-te in

²Sodom kumpipa Bera, Gomorrah kumpipa Birsha, Admah kumpipa Shinab, Zeboiim kumpipa Shemeber le Bela kumpite (tua pen Zoar) sim uh hi.

³Hih a nununga kumpite in Siddim Kuam (Ci Tuipi) d[66] ah a galkapte uh a gawm uh hi.

⁴Kum sawm le nih sung Kedorlaomer ukna nuai-ah om uh a, ahi hangin a kum sawm le thumna kumin lehdo uh hi.

⁵A kum sawm le lina kumin Kedorlaomer le amah tawh a kop kumpite kuankhia uh a, Ashteroth Karnaim a Rephai-te, Ham a Zuzim-te, Shaveh Kiriathaim a Emim-te

⁶le Seir mualtung gama Hori mite zo in sehnel-gam kianga El Paran dong a zo uh hi.

⁷Tua ciangin amaute kihei kik uh a En Mishpat (tua pen, Kadesh) ah pai-in Amalek mite gam buppi le Hazezon Tamar a teng Amor mite zo uh hi.

⁸Tua ciangin Sodom kumpipa, Gomorrah kumpipa Admah kumpipa, Zeboiim kumpipa, le Bela kumpipa (tua pen Zoar) - te kuankhia uh a Siddim Kuamah a galsim nading uh gelin

⁹Elam kumpi, Kedorlaomer Goiim kumpi Tidal, Shinar kumpi Amraphel le Ellasar kumpi Arioch-te - kumpi li in kumpi nga sim uh hi.

¹⁰Tua hunin Siddim Kuam teng Kultar khuk tawh kidima, Sodom le Gomorrah kumpite a tai uh ciangin a mite uh pawlkhat tuate sungah kia in, tua lo teng mual tungah tai uh hi.

¹¹Kumpi lite in Sodom le Gomorrah-te’ vante khempeuh, a ante khempeuh uh manin, tua ciangin a pai mang uh hi.

¹²Amaute in Abram sanggampa tapa Lot, Sodom ah teng ahi manin a neihsate puakhia uh hi.

¹³A suakta mi khat in hih thu Hebrew mi Abram kiangah ko hi. Tu-in Eshcol le Aner-te’ sanggampa a[67] khat Amor mi Mamre neihsa singkung lianpite gei-ah Abram tenga, amaute khempeuh in Abram koppihte ahi uh hi.

¹⁴Abram in a tanaupa uh sal-a kiman cih a zak ciangin ama inn sunga suak a kisinsa mi 318 samkhia a, Dan dong delh uh hi.

¹⁵Zanin Abram in amaute sim dingin a mite khena, amaute vatgawpin Damascus leilu lama Hobah dong a zandelh hi.

¹⁶Amah in vante khempeuh ngah kika, a tanaupa uh Lot, le a neihsate, numeite le midangte a ciahpih kik hi.

¹⁷Abram in kumpi Kedorlaomer le a koppihte zo khina a ciah ciangin Shava Kuam (tua pen Kumpi Kuam) ah Sodom kumpipa amah dawn dingin kuankhia hi.

¹⁸Tua khit ciangin Salem b[68] kumpipa Melchizedek in anlum le lenggahzu a luikhia hi. Amah a Sang Pen Pasian’ siampi hi a,

¹⁹Abram thupha pia in, "Van le lei a Piangsakpa c[69] a Sang Pen Pasian in Abram, thupha pia henla,

²⁰Na galte na khut sunga hong piapa a Sang Pen Pasian in thupha d[70] ngah ta hen," a ci hi. Tua khit ciangin Abram in amah na khempeuhah sehsawm suah sehkhat pia hi.

²¹Sodom kumpipa in Abram kiangah, "A mite kei hong pia inla a vante nang tang in," a ci hi.

²²Ahi hangin Abram in Sodom kumpipa kiangah, "Van le lei a Piangsakpa Sang Pen Pasian TOPA, tungah ka khut lamto in,

²³‘Abram kei hauhsak hi,’ na cih khak loh nadingin nang tawh kisai na khat beek, khauzang khat ahikeh khedap khau nangawn ka la kei ding hi," ci-in ka kiciam khin hi.

²⁴Ka mite neksate le kei tawh hong kuan khawm - Aner, Eshcol le Mamre te tanhte tawh kisai lo buang bangmah kong sang kei ding hi. Amaute amau tanh ciat lasak in," a ci hi.