Read Zokam Piancilna 15 Bible Online

Piancilna 15 - Zokam bible

Piancilna 15

¹Hih khit ciangin mangmuhna tawh TOPA kammal Abram tungah tunga, "Abram aw, lau kei in. Keimah na lum ka hi hi; e[71] Na pahtakman a lian mahmah pa ka hi hi," f[72] ci hi.

²Ahi hangin Abram in, "Thuneipipen TOPA aw, ta ka nei kei hi, ka neihsate a luah g[73] ding Damascus a Eliezer ahi manin bang hong pia thei ding na hi hiam?" a ci hi.

³Abram in, "Ta nong pia kei hi; tua ahi ciangin ka inn sunga nasem khat in ka inn luah ding hi," a ci hi.

⁴Tua ciangin ama tungah TOPA kammal tunga: "Hih mipa in na inn a luah kei ding hi. Nangma sung pana suakkhia tapa khat in na gamh a luah ding hi," a ci hi.

⁵Amah a pualamah paikhiatpih a, "Vante ento-in na sim zo hiam aksite sim in," ci a, tua ciangin ama kiangah, "Na suan-le-khakte tua bang hi ding hi," ci hi.

⁶Abram in TOPA um a, amah in tua pen thumaanna-in simsak hi.

⁷Amah in, "Keimah in Chalde-te gama Ur pan hong pikhia a, na neih hih gam hong piapa TOPA ka hi hi," ci hi.

⁸Ahi hangin Abram in, "Thunei-pipen TOPA aw, tua ka neih ding ahilam bangci theih ding ka hi hiam?" ci hi.

⁹Tua ahi ciangin TOPA in, "Kum thum ciat a pha bawngla khat, keel khat, tuutal khat hong puak inla tuate tawh vakhu khat le kawlvakhu khanglai khat hong puak in," ci hi.

¹⁰Abram in hihte khempeuh amah puaka, tuate phel nih suahin a sate khat le khat a kigalsai dimdiam in a gual hi: vasate pen phel nih a suah kei hi.

¹¹Tua ciangin sasialne vasate, tua sate tungah tu uh a, ahi hangin Abram in hawlkhia mang hi.

¹²Ni tumkuan a, Abram ihcipin a lauhuai khuamial sah mahmah in amah a mialnelh hi.

¹³Tua ciangin TOPA in a kiangah "Na suan-le-khakte, amau gam ahi lo gam khatah mikhual hi ding uh a, mi sila suakin kum zali sung kibawlsia ding cih theician in.

¹⁴Ahi hangin a sila suahna uh minam, dan ka pia dinga, tua nung ciangin amaute neihsa tampitak tawh a paikhia ding uh hi.

¹⁵Nang na hileh na pate kiang lungnuamtakin na zuan dinga, tekkut vuaikutin hong kivui ding hi.

¹⁶Amor mite mawhna kicing kim nai lo ahi manin a khang lina ciangin na suan-le-khakte hih lai-ah a pai kik ding uh hi," ci hi.

¹⁷Ni tumin khua a mial khit ciangin meikhu kawma a kuang meibel tang hong kilangin tua sate kikalah a paisuak hi.

¹⁸Tua ni-in TOPA in Abram tawh thukhun bawl a, "Na suante tungah hih leitang, Egypt gun h[74] panin gunpi lian Euphrates dong -

¹⁹Ken-te, Keniz-te, Kadmon-te,

²⁰Hit-te, Periz-te, Rephaim-te,

²¹Amor-te, Canaan-te, Girgash-te le Jebus-te ka pia hi," ci hi.