Read Zokam Piancilna 17 Bible Online

Piancilna 17 - Zokam bible

Piancilna 17

¹Abram kum sawm kua-le-kua a phak ciangin ama kiangah TOPA kilanga, "Keimah, a Thahat pen e[79] Pasian ka hi hi; ka mai-ah pai inla kawkbaang kei in.

²Kei le nang kikala ka thukhun ka kipsak dinga hong pungsakin tampi kong phasak ding hi," ci hi.

³Abram khupbawh suka Pasian in ama kiangah,

⁴"Kei adingin hih in nang tawh ka thukhun ahi hi! Nang, minam tampite’ pa na hi ding hi.

⁵Nang, Abram f[80] hong kici nawn lo ding hi; Na min Abraham g[81] hi ding hi; Minam tampite pa-in nang kong bawl zo hi.

⁶Nang kong ciphasak dinga; minam liante hong suaksakin nang panin kumpite piangkhia ding hi.

⁷Keimah in na Pasian le nang nunga na suan-le-khakte’ Pasian ka hina dingin tawntung thukhun in kei le nang le hong tung lai ding khangte-a na suan-le-khakte tungah thukhun kip ka bawl ding hi.

⁸Tu laitaka mikhual na hina Canaan leitang bup, nang le nang nunga na suan-le-khakte neih tawntung dingin kong pia dinga; kei amaute’ Pasian ka hi ding hi." ci hi.

⁹Tua ciangin Pasian in Abraham kiangah, "Nang ahileh nang le nang nunga khang na suan-le-khakte tunga ka thukhun zui pelmawh in.

¹⁰Hih in na zuih pelmawh ding nang le nang nunga na suan-le-khakte tawh ka thukhun ahi hi, na zuih ding uh thukhun in: Note laka pasal peuhmah vun ki-at ding hi.

¹¹Na vun na at dinga, tua pen nang le kei kikala thukhun lim hi ding hi.

¹²Mailama khangte adingin, no inn sunga suakte ahi a, gamdang mite tunga sum tawh na leite uh - no sung pana piang a hi lote a hi zongin pasal peuhmah nigiat a phak nak leh a vun ki-at pelmawh ding hi.

¹³No innkuan sunga suakte ahi a, sum tawh na leite uh ahi zongin amaute vun ki-at pelmawh ding hi. Note ci-le-sa sunga ka thukhun, tu le a tawntunga thukhun ahi hi.

¹⁴Pasal vun at lo, a ci-le-sa vun at lo peuhmah ama mite pan kikhenkhia ding hi; amah ka thukhun a palsat ahi hi," ci hi.

¹⁵Pasian in Abraham tungah, "Na zi Sarai ahileh Sarai na ci nawn kei ding hi; ama min Sarah hi ding hi.

¹⁶Thupha ka pia dinga, amah panin tapa khat kong pia taktak ding hi. Amah minamte’ nu ahi theih nadingin thupha ka pia ding hi; minamte’ kumpite amah panin piang ding hi," ci lai hi.

¹⁷Abraham khupbawha, nui-in amah le amah, "Kum zakhat a phasa mi khat sungah tapa piang ding maw? Kum sawm kua a phasa Sarah in ta nei ding maw?" a kici hi.

¹⁸Tua ciangin Abraham in Pasian kiangah, "Ishmael in nang ma thupha sangin minungta-a hong om nak leh!" a ci hi.

¹⁹Tua ciangin Pasian in, "Sang thei ding hi, ahi hangin na zi Sarah in nang tawh tapa khat nei dinga, ama min Isaac h[82] na phuak ding hi. Ama nunga a suan-le-khakte ading tawntung thukhun ahi dingin amah tawh thukhun ka bawl ding hi.

²⁰Ishmael ahileh, na gen ka za zo hi! Thupha ka pia takpi ding hi; amah ka ciphasak dinga pungsakin tampi ka phasak ding hi. Amah gam-uk sawm le nihte’ pa hi dinga minam lian khat ka suaksak ding hi.

²¹Ahi hangin mai kum tu hun ciangin Sarah tawh na neih ding Isaac tawh ka thukhun ka bawl ding hi," a ci hi.

²²Abraham tawh a kiho a man ciangin ama kiang pan Pasian a paikhia to hi.

²³Tua ni tektek in Abraham in a tapa Ishmael le ama inn sunga suakte le sum-a a leite khempeuh, a inn sunga pasal peuhmah, Pasian gen bangin amaute’ vun a at hi.

²⁴Abraham in a vun a at in kum sawm kua le kua pha a,

²⁵a tapa Ishmael kum sawm le thum pha hi.

²⁶Abraham le a tapa Ishmael in a ni kibangin vun at khawm uh hi.

²⁷Ama inn sunga suakte ahi a, gamdang mite tunga a leite ahi zongin Abraham innkuan sunga pasal peuhmah in amah tawh vun at uh hi.