Read Zokam Piancilna 18 Bible Online

Piancilna 18 - Zokam bible

Piancilna 18

¹Mamre singpite kianga puanbuk kongah nisat laitakin Abraham tu-a tua laitakin ama tungah TOPA kilang hi.

²Abraham khuadak to a, ama kiang mahmah a ding mi thum a mu hi. Amaute a muh ciangin a puanbuk kong panin manlangin va dawna lei lamah kunsuk hi.

³Amah in, "Ka topa a[83] aw, angvan taak nong sak uh leh na nasempa hong kheng kei un.

⁴Tui tawm i lasak dinga na khe uh silin hih sing nuai-ah na khawl phot ding uh hi.

⁵Na tawldam theih nadingun nek ding na khat ka va la ding hi; tua khit ciangin paisuak un - tu-in na nasempa kiang na tung zo uh hi," ci hi. Amaute in, "Hoih mahmah hi, na cih bangin hih in," ci-in dawng uh hi.

⁶Tua ciangin puanbuk sunga Sarah kiangah Abraham pai-a, "Kinawh in, annel hoihte seah b[84] thum mekin anlum tawm em pak in," ci hi.

⁷Tua ciangin ganhon lakah tai-a bawngno dawng khat teelin a nasempa pia-a, tuapa in manlang takin a bawl hi.

⁸Tua ciangin bawngnawi le bawngnawi khal pawlkhat le bawngno sa minsa tawi-in amaute mai-ah lui hi. Amaute in a nek laitakun amaute kiang sing nuai-ah amah ding hi.

⁹Amaute in, "Na zi Sarah koi-ah om hiam?" ci-in amah dong uh hi. Amah in "Hua lai puanbuk sungah," ci hi.

¹⁰Tua ciangin TOPA c[85] in, "Mai kum tu hun ciangin na kiangah pel loin kong pai dinga na zi Sarah in tapa khat a nei ding hi," ci hi. Tua laitakin Sarah in ama nunglam puanbuk sungah na ngai hi.

¹¹Abraham le Sarah tek lua ta in a kum uh tam lua-a, Sarah zong taneih hun nawn lo hi.

¹²Tua ciangin Sarah in, "Ka vuai khit nung, ka topa d[86] lah tekta-a, hih nopsakna nei buang ding ka hiam?" cih ngaihsun kawmin amah guak a nui hi.

¹³Tua ciangin TOPA in Abraham kiangah, "Bang hang Sarah nui-in, ‘Kei lah tekta inga, ta nei takpi ding ka hiam?’ ci-in nui ahi hiam?

¹⁴TOPA adingin na khatpeuh haksa lua ahi hiam, mai kum ciang a kisehsa hunin kong pai kik dinga Sarah in tapa khat nei ding hi," ci hi.

¹⁵Sarah lau-a, zuau phuakin, "Ka nui kei hi," a ci hi. Ahi hangin amah in, "Hi mah hi, na nui hi," ci hi.

¹⁶Mite ciah dinga a dinkhiat uh ciangin amaute in Sodom lam ensuk uh hi. Abraham in amaute kha dingin zui hi.

¹⁷Tua ciangin TOPA in, "Ka hih dek thu Abraham tungah im ding ka hi hiam?

¹⁸Abraham pen a vanglian minam suak taktak dinga ama tungtawnin leitunga minam khempeuh thupha kipia ding hi.

¹⁹Ahang in, TOPA in Abraham tunga a ciamsa thu a tunsak theih nading, ama nunga a tate le a innkuanpihte in thuman le thutanga gamtatna tawh TOPA lampi a zuih nadingun amah ka teel zo hi," ci hi.

²⁰Tua ciangin TOPA in, "Sodom le Gomorrah langa kikona lian lua-a, amau mawhna uanglua

²¹ahi manin amau gamtatnasa a kigen ka zakzahin a man hiam, cih en dingin ka paisuk ding hi. A kigen zah ahi kei leh ka thei ding hi," ci hi.

²²Tua mite kihei uh a Sodom lam manawh in pai uh hi, ahi hangin TOPA’ e[87] mai-ah Abraham ding lai hi.

²³Tua ciangin Abraham in va naih a, "A thumante migilote tawh siakmang khawm ding na hi hiam?

²⁴Khuapi sungah midik sawm nga om leh bang na cih ding hiam? Tua sunga om midik sawm ngate cihna-in tua mun hawi f[88] loin siakmang takpi ding na hi hiam?

²⁵A thumaante migilote tawh that khawma, a thumaante le migilote, a kibanga thuaksak ding nang adingin kilawm peuhmah ding ahi hiam? Kilawm peuhmah kei in teh! Leitung khempeuh Thukhenpa g[89] in a maan in khen lo ding ahi hiam?" ci hi.

²⁶TOPA in, "Sodom khuapi sungah midik sawm nga ka muh leh amaute cihna-in tua mun buppi bangmah ka cih kei ding hi," a ci hi.

²⁷Tua ciangin Abraham in, "Topa tunga thugen dingin bangmah ahi lo, leivui le vut ahi lel khat in hangtakin thu kong gen ngam hi;

²⁸midik, sawmnga sangin nga tawmzaw leh bang na cih ding hiam? Mi ngate hangin khuapi bup na susia ding hiam?" ci leuleu hi. Amah in, "Tua lai-ah sawm li le nga ka muh leh ka suasia kei ding hi," ci hi.

²⁹Amah in khatvei gen kika, "Tua lai-ah sawm li kimu leh bang na cih ding hiam?" a ci hi. Amah in, "Sawm lite cihna in ka susia kei ding hi," ci hi.

³⁰Tua ciangin amah in, "Topa aw, heh kei in, hong gensak lai in. Tua lai-ah sawm thum bek kimu thei leh bang na cih ding hiam?" a ci hi. Amah in, "Tua lai-ah sawm thum ka muh leh ka hih kei ding hi," ci-in dawng hi.

³¹Abraham in, "Topa tungah hangtaka thu kong gen ngam khin hi. Tua lai-ah sawm nih kimu leh bang na cih ding hiam?" ci hi. Amah in, "Sawm nihte cihna in ka susia kei ding hi," ci hi.

³²Tua ciangin amah in, "Topa aw, na heh peuhmah kei in, khatvei bekbek hong gensak lai in, tua lai-ah sawm bek kimu leh bang na cih ding hiam?" ci hi. Amah in, "Sawmte cihna in ka susia kei ding hi," ci-in dawng hi.

³³Abraham tawh a kiho a man khit ciangin TOPA in amah nusia a, Abraham a innah ciah hi.