Read Zokam Piancilna 21 Bible Online

Piancilna 21 - Zokam bible

Piancilna 21

¹TOPA in a gensa bangin Sarah tungah thukhual mahmah a, TOPA in a ciamsa pen Sarah adingin a hihsak hi.

²Sarah gai-a, Abraham a tek nungpi-in Pasian in amah a ciam hun lianin tapa khat a neisak hi.

³Abraham in Sarah tawh a neih tapa min Isaac d[99] phuak hi.

⁴A tapa Isaac ni giat a phak ciangin Pasian in amah a thupiak bangin Abraham in a vun atsak hi.

⁵A tapa Isaac a suahin Abraham kum za khat a upa ta hi.

⁶Sarah in, "Pasian in kei hong niusak ta hi; hih thu a za peuhmah in hong nuihpih ding uh hi," ci a,

⁷"Kua in Abraham tungah, ‘Sarah in nau don ding hi,’ ci ngei ahi hiam? Hi ta leh a tek nungin amah tawh tapa khat ka nei hi," cih beh lai hi.

⁸Naupang khanga nawi a ne nawn kei hi; Isaac in nawi a nek nawn loh ni-in Abraham in pawi lianpi khat a bawl hi.

⁹Ahi hangin Sarah in Egypt mi Hagar tawh Abraham in a neih tapa in a zahpih mu-a,

¹⁰Abraham kiangah, "Tua sila nu le a tapa hawlkhia in, ahang in, tua sila nu’ tapa in ka tapa Isaac tawh gou a luahkhawm ngei kei ding hi," a ci hi.

¹¹Tua thu a tapa tawh kisai ahi manin Abraham a lungzing mahmah hi.

¹²Ahi hangin Pasian in ama kiangah, "Nang le na nasemnu hangin lungzing lua kei in. Sarah hong gen bangbang mang in, bang hang hiam cih leh Isaac tungtawnin na khanggui e[100] kisim ding hi.

¹³Nang suan-le-khak ahi manin na nasemnu tapa panin zong minam khat ka bawl ding hi," ci hi.

¹⁴A zing ciang zingtungin Abraham in an pawlkhat le savun tuithawl khat Hagar pia hi. Amah in tuate tuanu liangko-ah suana naupangpa tawh a paikhiasak hi. Tuanu pai-a, Beersheba sehnel-gamah vak kawikawi hi.

¹⁵Savun thawl sunga tui a bei ciangin sawlbawk nuai khatah naupang koih hi.

¹⁶Tua ciangin tuanu paikhia in a pam thal lot khatna bangah tu a, "Naupang sih mu nuam kei si’ng," ci-in a ngaihsun hi. Tuaci-in a gei-ah tuanu a[101] a tut kawmin a kidik hi.

¹⁷Pasian in naupangpa kah za in, Pasian’ vansawltak in vantung panin Hagar sama, "Hagar aw, bang thu hiam? Lau kei in; Pasian in hua lai-a lum naupang kah za zo hi.

¹⁸Naupang phong inla a khutin kai in; ahang in, amah minam lian khatin ka bawl ding hi," ci hi.

¹⁹Tua ciangin Pasian in tuanu mit honsaka, tui omna tuikhuk khat a mu hi. Tua ciangin amah pai-a savun-thawl ah tui dimin naupangpa dawnsak hi.

²⁰Naupang a khan tawh kizui-in Pasian in ompih hi. Amah gamlakah tenga, thalkappa a suak hi.

²¹Amah Paran Sehnel-gama a ten laitakin a nu in a zi ding Egypt panin va la hi.

²²Tua hun laitakin Abimelech le a galkap mangpa Phicol in Abraham kiangah, "Na sepna khempeuhah Pasian in hong ompih hi.

²³Tu-in hih lai Pasian mai-ah kei tung ahi zongin, ka tu ka tate tung ahi zongin a man lopi-in nong bawl loh nading kei tungah hong kiciam in. Nang tunga ka migitna kong lah bangin kei le tu laitaka mikhuala na tenna gam tungah na migitna hong lak in," ci hi.

²⁴Abraham in, "Ka kiciam hi," a ci hi.

²⁵Tua ciangin Abraham in Abimelech tungah Abimelech’ nasemte in a suh uh tuikhuk thu a lungkimlohna a gen hi.

²⁶Ahi hangin Abimelech in, "Hih pen kua hih hiam, ka thei kei hi. Nang lah nong gen kei a, hih thu tuni bekin ka za pan hi," a ci hi.

²⁷Tua ciangin Abraham in Abimelech tuu le bawng pia-a a nih un thukimna a bawl uh hi.

²⁸Abraham in a ganhon sung panin tuuno a nu sagih a tuam koih hi;

²⁹tua ciangin Abimelech in Abraham kiangah, "Tuate lak pana tuuno a nu sagih na tuam koih, a cihnopna bang ahi hiam?" ci-in a dong hi.

³⁰Amah in, "Hih tuikhuk kei tawhsa ahina ka teci dingin ka khut panin hih tuu sagih hong sang in," ci-in a dawng hi.

³¹Tua ahi manin tua mun Beersheba b[102] kici hi, bang hang hiam cih leh tua lai-ah mi nihte kiciam uh hi.

³²Beersheba ah thukimna a bawl khit uh ciangin Abimelech le a galkap mangpa Phicol, Philistia-te gamah ciah uh hi.

³³Abraham in Beersheba ah makeng kung khat suana, tua lai-ah TOPA, Tawntung Pasian tungah thu a ngen hi.

³⁴Philistia-te gam ah Abraham sawtpi teng hi.