Read Zokam Piancilna 25 Bible Online

Piancilna 25 - Zokam bible

Piancilna 25

¹Abraham in Keturah min nei zi dang khat la b[118] hi.

²Tuanu in amah tawh: Zimran, Jokshan, Medan, Midian, Ishbak le Shuah nei hi.

³Jokshan pen Shebak Dedan-te’ pa ahi hi. Dedan suan-le-khakte in Asshur-te, Lethuh-te, le Leummi-te ahi hi.

⁴Midian’ tapate: Ephah, Epher, Hanoch, Abida le Eldaah ahi hi. Hihte khempeuh Keturah suan-le-khakte ahi hi.

⁵Abraham in a neihsa khempeuh Isaac tungah nusiat hi.

⁶Ahi hangin a nuntak lai-in a zinote’ tapate tungah letsongte pia-a, amaute a tapa Isaac omna pan nisuahna lam gamah a paisak hi.

⁷Abraham kum za khat sawm sagih le nga nungta hi.

⁸Tua khit ciangin Abraham in a nunung pen a hu sanga, tekkuut in, mi upa, a kum tamin si a, a mipihte kiangah kigawm hi.

⁹A tapa Isaac le Ishmael-te in Mamre kianga Hit mi Zohar tapa Ephron’ lo sung Machpelah suanghawm ah vui uh hi.

¹⁰Abraham in tua lo Hit-te c[119] tung pana a leisa ahi hi. Tua lai-ah Abraham a zi Sarah tawh kivui hi.

¹¹Abraham a sih khit ciangin Pasian in Beer Lahai Roi a teng a tapa Isaac thupha pia hi.

¹²Hih in Sarah’ nasemnu Egypt mi Hagar in Abraham tawh a neih Abraham’ tapa Ishmael khang sutna ahi hi.

¹³Hihte in amau suah bang banga kigual Ishmael’ tapate’ minte ahi hi: Ishmael pana suak masa pen Nebaioth, Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Naphish le Kedemah.

¹⁶Hihte Ishmael tapate ahi amau lalnate le a giahphualte uh tawh kizui-a minam neu sawm le nihte’ gam-ukte min ahi hi.

¹⁷Ishmael a nuntak sung khempeuh kum za khat sawmthum sagih ahi hi. Amah in a hu nunung pen sangin si a, ama mite omna-ah kigawm hi.

¹⁸Ama suan-le-khakte Havilah kual panin Asshur lam manawha d[120] paina Egypt tawh gamgi kiang Shur ah a teng uh hi. Amaute a sanggamte khempeuh uh tawh a kigalneih niloh uh hi.

¹⁹Hih in Abraham’ tapa Isaac khangsutna ahi hi. Abraham Isaac’ pa hi a,

²⁰amah in Paddan Aram e[121] pan-a Arammi Bethuel’ tanu - Aram mi Laban sanggamnu Rebekah tawh a kiten in kum sawmli pha hi.

²¹Isaac in a lawmnu tangin TOPA tungah thu a ngen hi. Bang hang hiam cih leh tuanu tasel ahi hi. TOPA in a thungetna dawnga, a zi Rebekah gai hi.

²²A sunga naungekte khat le khat kinawt uh a, amah in, "Kei tungah bang hangin hih bang piang ahi hiam?" ci hi. Tua ciangin TOPA tungah a dong hi.

²³TOPA in ama kiangah, "Na sul sungah minam nih om hi; na sunga om mi nihte kikhen ding uh hi; khat pen a khat sangin thakhauh zaw-a, a upa zaw pen in a naupa na sem ding hi," ci hi.

²⁴A suah hun a tun ciangin a sul sungah a peng pasalno nih om hi.

²⁵A suak masa pen a ci san a, a pum tung khempeuh mul silh tawh kibang hi; tua ahi ciangin a min Esau f[122] a phuak uh hi.

²⁶Hih khitah Esau khetul len tentansa-in a sanggampa suakkhia hi; tua ahi manin a min Jacob g[123] kici hi. Rebekah in amaute a suahin Isaac kum sawmguk upa ta hi.

²⁷Naupangte khang uh a, Esau pen gamsung mi sabet siam khat suakin, Jacob pen cinghkam in puanbuk lak bekah om hi.

²⁸Isaac in, a matsa gamsate lim sa in Esau it hi; ahi hangin Rebekah in Jacob it hi.

²⁹Khatvei Jacob in meh a ui laitakin Esau gamvaka phuk-hong veisa in a tung hi.

³⁰Amah in Jacob kiangah, "Manlang, hua na ui buhcim san tawm hong pia pak in! Phuk-hong ka vei hi," ci hi. (Edom h[124] a kicihna zong tua hang mah ahi hi.)

³¹Jacob in, "Na innluahza hong zuak masa phot in," ci-in a dawng hi.

³²Esau in, "En in, a si petmah ding ka hi ta hi. Kei adingin innluahza banga kimang ding hiam?" ci hi.

³³Ahi hangin Jacob in, "Kei tung hong kiciam masa phot in," ci hi. Tua ciangin Jacob tungah a innluahza zuakna-in tomlo-in kiciam hi.

³⁴Tua ciangin Jacob in Esau, anlum pawlkhat le be meh pawlkhat a pia hi. Amah in ne in dawn a, tua khit ciangin dingin a paisan hi. Tuaci-in Essau in a innluah za a thusim kei hi.