Read Zokam Piancilna 26 Bible Online

Piancilna 26 - Zokam bible

Piancilna 26

¹Abraham hun lai-a kialpi masa banah - tu-in gam sungah kialpi tunga - Gerar a Philistia kumpipa Abimelech kiangah Isaac pai hi.

²Isaac tungah TOPA kilanga, "Egypt ah paisuk kei in; na ten nadinga kong genna gamah teng in.

³Hih gamah tawmvei sung teng in; nang tawh omkhawm in thupha kong pia ding hi. Ahang in nang le na suan le khakte tungah hih gamte hong pia-in na pa Abraham tungah tomlo a ka ciamna ka kipsak ding hi.

⁴Na suan-le-khak a[125] te vana aksi zahin ka tamsak dinga, amaute hih gam khempeuh pia-in, na suan-le-khak tungtawnin leitunga minamte thupha ka pia ding hi;

⁵bang hang hiam cih leh Abraham in ka thu hong mangin, ka sawlna, ka thupiakna, ka thukip le ka thukhamte mang hi," ci hi.

⁶Tua ahi ciangin Gerar ah Isaac teng hi.

⁷Tua muna mite in a zi thu amah a dot uh ciangin, "Amah ka sanggamnu ahi hi," ci hi. Bang hang hiam cih leh, "Amah ka zi hi," a cih ding lau hi. Amah in, "Hih muna mite in Rebekah melhoih ahi manin ama hangin kei hong that kha ding uh hi," ci-in ngaihsun hi.

⁸Tua lai-ah Isaac sawtveipi a om khit ciangin Philistia-te’ kumpi Abimelech in tawlet panin ensuk a, Isaac in Rebekah a noh laitak a mu hi.

⁹Tua ciangin Abimelech in Isaac samsak a, "Amah na zi taktak hi lo hiam! Bang dinga, ‘Ka sanggamnu hi,’ ci na hi hiam?" ci hi. Isaac in, "Ama hangin ken sih lawh kha leng, ci-a ka kingaihsut hang ahi hi," ci-in dawng hi.

¹⁰Tua ciangin Abimelech in, "Ko tungah bang hong hih na hi hiam? Mite khatpeuh in na zi luppih man leh kote hong siattut na suak ding hi," a ci hi.

¹¹Tua ciangin Abimelech in mi khempeuh thu pia a, "Hih mipa ahikeh a zi a khoihkha peuhmah kithat ding hi," a ci hi.

¹²Isaac in tua leitangah khaici tuh a, TOPA in thupha pia ahi manin a zah za khat at hi.

¹³Tua mipa hau a, mihau mahmah a suah dong a hauhna a kizom den hi.

¹⁴Amah in tuuhonte le bawnghonte le nasemte tampi nei ahi manin Philistia-te in amah haza uh hi.

¹⁵Tua ciangin a pa Abraham hun lai-a a pa’ nasemte in a tawh uh tuikhukte khempeuh, Philistia-te in hucip in lei vuk uh hi.

¹⁶Tua ciangin Abimelech in Isaac kiangah, "Ko kiang panin paikhia in; ko adingin na vanglian lua hi," a ci hi.

¹⁷Tua ciangin tua mun panin Isaac kikhinkhia a, Gerar Kuamah giahphual satin tua lai-ah teng hi.

¹⁸Isaac in a pa hun lai-a kitosa tuikhukte, Abraham sih khit cianga Philistia-te in a hukcipte uh hong kika, a pa min phuahsate mah a phuak hi.

¹⁹Isaac nasemte in tua kuam ah to uh a tuisiang khuk khat a mu uh hi.

²⁰Ahi hangin Gerar gancingte in Isaac gancingte tawng uh a, "Tua tui ko aa ahi hi!" ci uh hi. Tua ciangin amaute amah tawh kitawng uh ahi manin tuikhuk min Esek b[126] phuak hi.

²¹Tua ciangin tuikhuk dang khat to kik uh a, tua hangin zong kitawng uh ahi manin Sitnah c[127] min phuak hi.

²²Tua lai panin kikhinkhia in tuikhuk dang khat to uh a kuamah in a tawng nawn kei hi. Amah in, "Tu-in TOPA in mun hong pia khin hi, hih gamah i pung ding hi," a cihna in Rehoboth d[128] phuak hi.

²³Tua lai panin Beersheba ah amah paito hi.

²⁴Tua zanin ama kiangah TOPA kilanga, "Kei in na pa Abraham’ Pasian ka hi hi. Lau kei in nang tawh ka om khawm hi; ka nasempa Abraham hangin nang thupha kong pia dinga, na suan-le-khakte ka pungsak ding hi," ci hi.

²⁵Isaac in tua lai-ah biakna-tau khat dawha TOPA kiangah thu a ngen hi. Tua lai-ah a puanbuk lama, a nasemte in tuikhuk khat to uh hi.

²⁶Tua hun laitakin Gerar panin Abimelech, ama thudotpa Ahuzzath le a galkap mangpa Phicol tawh ama kiangah va pai uh hi.

²⁷Isaac in amaute kiangah, "Note in kei hong hua-in hong hawlkhia napi bang hanga kei kiangah hong hawh na hi uh hiam?" ci-in dong hi.

²⁸Amaute in, "Kote in, nang tawh TOPA a om lam teltakin ka mu uh hi; tua ahi manin kote in, ‘’Eite kikal - nang le ko kikalah thukima kiciamna khat i neih ding kisam hi,’ ka ci uh hi.

²⁹Kote in no hong khoihkha het loin limtakin hong bawla, lungnuamtakin kong paikhiatsak bang tektek un, ka natna ding uh bangmah nong hih loh nadingin nang tawh thukimna i bawl ding hi. Tu-in TOPA in nang thupha hong pia zo hi," ci-in dawng hi.

³⁰Tua ciangin Isaac in amau ading pawi khat bawla, amaute in a ne a dawn uh hi.

³¹A zingciang zingtungin tua mite tomlo in a kiciam thuk uh hi. Tua ciangin Isaac in amaute khakhia-a, amaute in amah lungnuamtakin a nusia uh hi.

³²Tua ni-in Isaac nasemte pai-in amau tawhsa tuikhuk thu amah a ko uh hi. Amaute in, "Tui ka mu ta uh hi," ci uh hi.

³³Amah in a min Shibah e[129] phuaka, tuni dong tua khuapi min Beersheba f[130] hi lai hi.

³⁴Esau kum sawmli a phak ciangin Hit mi Beeri’ tanu Judith tawh kitenga, Hit mi Elon tanu Basemath tawh zong a kiteng hi.

³⁵Amaute Isaac le Rebekah lungkhamna nak ahi uh hi.