Read Zokam Piancilna 27 Bible Online

Piancilna 27 - Zokam bible

Piancilna 27

¹Isaac a tek ciangin a mit gina lo-a khua a mu nawn kei hi. Amah in a tapa upa pen Esau sama, a kiangah, "Ka tapa aw," ci hi. Amah in, "Hiah ka om hi," ci-in dawng hi.

²Isaac in, "Putek khat ka hita hi, ka sih ni ding ka thei kei hi.

³Tua ahi ciangin tu-in na hiamte - na thaltang le na thal la inla, gam sungah kuankhia-in kei ading gamsa va beng in.

⁴Ka sih ma-a ka thupha nang kong piak theih nadingin ka duh anlim kei adingin hong huan inla ka nek dingin hong lui in," ci hi.

⁵Isaac in a tapa Esau a hopih laitakin Rebekah in ngai gige hi. Esau in a pa a puak ding sa beng a, gam a kuan ciangin,

⁶Rebekah in a tapa Jacob kiangah,

⁷"En in, na pa in na sanggampa Esau kiangah, ‘Ka sih ma-in TOPA’ mai-ah ka thupha nang kong piak theih nadingin gamsa pawlkhat hong puakin a lim mahmah in ka nek dingin hong huan in,’ a cih ka za hi.

⁸Tu-in, ka ta aw, limtakin na ngai inla kong gen bangin hih in:

⁹Ganhon lakah va pai inla keelno dawng nih va teel in. Na pa ading ama duh bang tektekin ka huan ding hi.

¹⁰Tua ciangin na pa in a sih ma-a ama thupha nang hong piak nadingin na pa nek dingin va puak in," ci hi.

¹¹Jacob in a nu Rebekah kiangah, "Ahi hangin ka sanggampa Esau a mulpha hi a, kei cinel mi ka hi hi.

¹²Ka pa in hong lawng kha leh bangci ding hiam? Amah ka khemna hong kilang dinga, kei tungah thupha hong piak sangsikin hong hamsiat ek kha ding hi," ci hi.

¹³A nu in ama kiangah, "Ka ta aw, tua hamsia kei tung tu ta hen. Ka gen bangin hih peuh in; pai inla tuate va la meng in," ci hi.

¹⁴Tua ciangin amah pai-a tuate manin a nu puaka, a nu in a pa duh bangin an lim pawlkhat huan hi.

¹⁵Tua ciangin Rebekah in a tapa upazaw Esau in a inn sunga a neih a puan hoih pente la in a tapa nauzaw pen Jacob a silhsak hi.

¹⁶Amah in a khutte le a cinelna mun a ngawng teng zong keelvunte in a tuam hi.

¹⁷Tua ciangin a tapa Jacob tungah ama bawlsa anlimte le anlum pia hi.

¹⁸Amah a pa kiangah pai-a, "Pa aw," a ci hi. Amah in, "Hawi, ka tapa aw, kua na hi?" ci-in a dawng hi.

¹⁹Jacob in a pa kiangah, "Na ta masa Esau ka hi hi; nong sawl bangin ka hih zo hi. Na thupha kei nong piak theih nadingin nong hehpihna-in tuto in gamsa ne in," ci hi.

²⁰Isaac in a tapa kiangah, "Ka ta aw, koi-ah bang va ci mat pak na hiam?" ci-in a dong hi. Amah in, "TOPA na Pasian in kei hong lawhcingsak hi," ci-in dawng hi.

²¹Tua ciangin Isaac in Jacob kiangah, "Ka ta aw, ka tapa Esau na hileh na hi loh kong theih nadinga kong lawn theih nadingin ka kiangah hong neh in," ci hi.

²²Jacob in Isaac kiang neh a, amah in lawngin, "A aw Jacob’ aw hi a, ahi hangin a khut lah Esau khut ahi hi," a ci hi.

²³A khutte Esau aa bangin a mul pha ahi manin amah a theikhia zo kei hi; tua ahi ciangin amah thupha pia hi.

²⁴Amah in, "Ka tapa Esau na hi takpi hiam?" ci-in a dong hi. Amah in, "Hi mah ing," ci-in a dawng hi.

²⁵Tua ciangin, "Ka tapa aw, ka thuphate kong piak theih nadingin na gamsa matte ka nek dingin hong pia in," ci hi. Jacob in amah pia-a, a ne hi; lenggahzu zong pia-a, dawn hi.

²⁶Tua ciangin a pa Isaac in ama kiangah, "Ka tapa aw, hiah hong pai inla hong nam in," ci hi.

²⁷Tua ciangin amah a kiangah pai-in a nam hi. Isaac in a puan gim a dikkhak ciangin amah thupha pia a, "Ah, ka tapa gimnam pen, TOPA thupha piaksa gamlak gimnam tawh kibang hi.

²⁸Ka Pasian in vantung daitui le lei’ hauhnate - buh le lenggahzu thak a dimin hong pia ta hen.

²⁹Minamte in na na sem henla, nang tungah mite kun ta hen. Na sanggamte tungah topa hi inla, na nu’ tapate na mai-ah kun uh hen. Nang hong hamsiatte kihamsiat henla, nang thupha hong piate thupha kipia hen," ci hi.

³⁰Isaac in amah thupha a piak man khina, a pa omna a nusiat khit phetin a sanggampa Esau sabetna pan a tung hi.

³¹Amah in zong an lim pawlkhat huana, a pa kiangah puak hi. Tua ciangin ama kiangah, ‘Pa aw, na thupha nong piak theih nadingin tuto in ka gamsa ne in," ci hi.

³²A pa Isaac in, "Nang kua na hiam?" ci-in dong hi. Amah in, "Nangma tapa, na ta masa Esau ka hi hi," ci-in dawng hi.

³³Isaac in ling kalkal kawmin, "Tua ahileh gamsa benga kei hong puak kua hi mawk hiam? Nong tun madiakin ka ne khina, amah thupha ka pia khin hi - amah in thupha a ngah takpi ding hi," ci hi.

³⁴Esau in a pa thugente a zak ciangin nakpi-in awngkhia beba a, "Pa aw, kei thupha hong pia in - kei zong," ci hi.

³⁵Ahi hangin amah in, "Na sanggampa in hong khemin na thupha a la khin zo hi," ci hi.

³⁶Esau in, "A min Jacob a[131] a kiphuah a man ngel veleh; amah’n tu-a tawh nih vei hong khem ta hi. Ka tapa upa za la zo a, tu-in ka thupha la khin zel hi!" a ci hi. Tua ciangin, "Kei ading thupha adang sit lai lo na hi hiam?" ci-in dong hi.

³⁷Isaac in Esau kiangah, "Amah na topa dingin ka bawl khina, a behte khempeuh ama nasem a suak dingin ka bawla, buh le lenggahzu tawh kidiah dingin ka bawl khin zo hi. Tua ahi ciangin nang ading bang hih thei nawn ding ka hi hiam, ka tapa aw," ci hi.

³⁸Esau in a pa kiangah, "Pa aw, thupha khat bek nei na hi hiam? Pa aw, kei zong thupha hong pia in!," a ci hi. Tua khit ciangin Esau nakpi in kap hi.

³⁹A pa Isaac in, "Na tenna, leitang hoihna pualam, tunga van daitui pualam hi ding hi.

⁴⁰Namsau-in na nungta dinga, na sanggampa’ na na sem ding hi. Ahi hangin na kitomtom dinga na ngawng pana ama hakkol na lawnkhia ding hi," ci-in a dawng hi.

⁴¹A pa in Jacob thupha a piakna hangin Esau in amah langbawla, a hua hi. Amah le amah, "Ka pa hanga thum nading ni nai ta hi; tua khit ciangin ka sanggampa Jacob ka that ding hi," ci hi.

⁴²A tapa uzaw pen Esau in tua bang a cih Rebekah tunga a kigen ciangin a tapa nauzaw Jacob vaikhaka, ama kiangah, "Na sanggampa Esau nang thah ding ngaihsutna tawh amah le amah kihehnem hi.

⁴³Ka ta aw, tu-in kong gen bangin hih in: Haran a ka sanggampa Laban kiangah manlang in taipah in.

⁴⁴Na sanggampa hehluatna a kap mateng amah tawh tawmvei sung va om in.

⁴⁵Na sanggampa nang tungah heh nawn lo a, amah na bawlnate a mangngilh ciangin tua pana nong ciah nading kam kong vaikhak ding hi. Note gel ni khatthu-in hong taan khawm ding ka hi hiam?" ci hi.

⁴⁶Tua ciangin Rebekah in Isaac kiangah, "Hih Hit numeite tawh nuntak ka cimtak hi. Jacob in hih gam numeite lak panin a zi dingin hih bang numei mah a lak leh, ka nuntakna in man a nei kei ding hi," ci hi.