Read Zokam Piancilna 29 Bible Online

Piancilna 29 - Zokam bible

Piancilna 29

¹Tua ciangin Jacob in a khualzin ban zoma, nisuahna mite’ gam tung hi.

²Tua lai-ah lo sungah tuikhuk khat mu-a, tua tuikhuk ah tui a kipiak mana a kianga lum tuuhon thum a om hi. Tuinak vang sitna suang a lian hi.

³Tuu honte khempeuh tua lai-ah a kikhop khit ciangin tuu cingte in tuinak hukna suang likkhia-a tuute tui pia uh hi. Tua khit ciangin amaute in a omna ngei tuinak vang ah tua suang koih kik uh hi.

⁴Jacob in tuucingte kiangah, "Sanggamte no koi pan na hi ua?" ci-in dong hi. Amaute in, "Ko Haran pan ka hi uh hi," ci-in dawng uh hi.

⁵Amah in amaute kiangah, "Nahor’ tupa Laban na thei kha uh hia?" ci hi. Amaute in, "Thei mah ung," ci-in dawng uh hi.

⁶Tua ciangin Jacob in amaute kiangah, "Amah a dam hiam?" ci-in a dong hi. Amaute in, "Dam mah, hih lai-ah zong tuute tawh a tanu Rachel hong pai hi," ci uh hi.

⁷Amah in, "En un ni sang lai hi; gankhop hun nai lo hi. Tui pia unla lonona-ah khah kik un," ci hi.

⁸Amaute in, "Tuuhon khempeuh kikhawm kim-a tuinak vanga suang a kilikkhiat mateng ka hih thei kei uh hi. Tua khit ciangin tuute tui ka pia pan ding uh hi," ci-in dawng uh hi.

⁹Amaute a kihoho laitakun a pa’ tuute tawh Rachel a va pai hi; amah tuucingnu ahi hi.

¹⁰Jacob in a nu sanggampa Laban’ tanu Rachel le Laban tuute a muh ciangin pai-in tuinak vanga suang likkhia-a, a pu’ tuute tui pia hi.

¹¹Tua ciangin Jacob in Rachel nama, a kapkhia hi.

¹²Amah in Rachel kiangah amah a pa behte hi a, Rebekah’ tapa ahilam kigen hi. Tua ciangin tuanu tai-a a pa a ko hi.

¹³Laban in a sanggamnu tapa Jacob thu a zak phetin a kimu dingin taipah hi. Amah in kawi-in nama, a innah paipih in tua lai-ah Jacob in hih thute a gen hi.

¹⁴Tua ciangin Laban in ama kiangah, "Nang ka si le sa taktak na hi hi," ci hi. Jacob amah tawh kha khat bit a om khit ciangin

¹⁵Laban in, "Ka beh taktak na hi manin bangmah thalawh loin ka na nong sepsak ding hiam? Na thaman ding bang hiam hong gen dih in," ci hi.

¹⁶Tua laitakin Laban in tanu nih nei hi; a uzaw pen min Leah hi-a, a nauzaw pen min Rachel ahi hi.

¹⁷Leah pen a mit zam a[140] a, ahi hangin Rachel ahileh a duang hoih in ithuai-a, a mel hoih hi.

¹⁸Jacob in Rachel ngai-a, "Na tanu nauzaw Rachel kong thalawhna in kum sagih na na kong sepsak ding hi," ci hi.

¹⁹Laban in, "Midang khat ka piak sangin nang kong piak ding hoihzaw hi. Kei tawh omkhawm in," ci hi.

²⁰Tua ahi ciangin Jacob in kum sagih sung Rachel a thalawh hi. Ahi hangin amah a itna hangin tua pen ni tawmno tawh kibang hi.

²¹Tua khit ciangin Jacob in Laban kiangah, "Ka zi hong pia in. Ka hun cing khin ta hi; amah tawh ka lumkhawm nuam hi," ci hi.

²²Tua ciangin Laban in tua muna om mi khempeuh kikhawmsakin pawi bawl hi.

²³Ahi hangin nitak ciangin a tanu Leah paipih in Jacob pia a, Jacob in amah luppih hi.

²⁴Laban in a nasemnu Zilpah a tanu nasem dingin pia hi.

²⁵Zingsang ciangin Leah na hi mawk hi! Tua ciangin Jacob in Laban kiangah, "Kei hong bangci bawl na hiam? Ke’n Rachel kong thalawh hi; hi lo ka hia? Bang dinga hong khem na hi hiam?" ci hi.

²⁶Laban in, "Hih lai-a ko ngeina-ah a u neih ma-in a nau in pasal nei ngei lo hi.

²⁷Hih ka tanu mopawi nipi khat beisak phot inla, tua ciangin adang kum sagih na sepna thaman in a neuzaw pen zong kong pia ding hi," ci hi.

²⁸Jacob in a cih bangin a hih hi. Leah tawh nipi kal khat mansaka, tua ciangin Laban in a zi dingin a tanu Rachel amah pia hi.

²⁹Laban in a nasemnu Bilhah a tanu Rachel nasem dingin pia hi.

³⁰Rachel tawh zong Jacob lumkhawm a Leah sangin Rachel a itzaw hi. Laban’ na a dang kum sagih sepsak lai hi.

³¹Leah a ki-it loh lam TOPA in a theih ciangin a naubu honsaka, ahi hangin Rachel pen tasel ahi hi.

³²Leah gaii-a tapa khat a nei hi. A min Reuben b[141] phuak hi. Ahang in, "TOPA in ka gimna a mu khin hi. Tu-in ka pasal in hong it ta ding hi," ci hi.

³³Nau paii leuleu a, tapa khat a suah ciangin amah in, "Kei hong ki-it loh lam TOPA in za zo a, hih pen zong hong piak ahi hi," ci hi. Tua ahi ciangin a min Simeon c[142] phuak hi.

³⁴Aman nau paii kik leuleu a, tapa khat a suah kik ciangin, "Tu ngawngaw in amah tawh tapa thum nei ta ka hi manin ka pasal in hong it ta ding hi," ci-a a min Levi d[143] phuak hi.

³⁵Amah in nau paii kik leuleu a, tapa khat a suah kik ciangin, "Tu hunin TOPA ka phat ding hi," ci-a, a min Judah e[144] phuak hi. Tua ciangin a ta neih tawp ta hi.