Read Zokam Piancilna 3 Bible Online

Piancilna 3 - Zokam bible

Piancilna 3

¹TOPA Pasian bawlsa gamsa khempeuh sangin gulpi khem a siam zaw hi. Amah in numei kiangah, "Pasian in, ‘Huan sunga sing khatpeuh pan na ne kei un,’ hong ci takpi hiam?" a ci hi.

²Numei in gulpi kiangah, "Huan sunga singte panin a gah ka ne thei ding uh hi;

³ahi hangin Pasian in bel, ‘Huan laizanga sing panin a gah na ne kei ding uh a, zong na lawng peuhmah kei ding uh hi; na hih uh leh na si ding uh hi,’ hong ci mah hi,’ a ci hi.

⁴Gulpi in numei kiangah, "Na si peuhmah kei ding uh hi,

⁵ahang in tua na nek uh ciangin na mit uh kihong dinga, Pasian tawh kibangin sia le pha na theih ding uh Pasian in thei hi," a ci hi.

⁶Numei in tua singgah a muh ciangin nek dingin limci sa-a, a mit la keei a, pilna zong ngah nuam ahi manin tawmkhat la-in a ne hi. Amah tawh a omkhawm a pasal zong tawmkhat pia-a, a pasal in a ne hi.

⁷Tua ciangin a nih un a mit uh kihonga, guaktang ahina uh a kithei tel uh hi; tua ciangin theiteh khuituah uh a amau le amau kituamna-in bawl uh hi.

⁸Tua ciangin mipa le a zi in, tua ni khuadaih hunin huan sunga TOPA Pasian paina huging za uh a, TOPA Pasian muhna pan huan sunga sing lakah bu uh hi.

⁹Ahi hangin TOPA Pasian in mipa sam a, "Koi-ah om na hiam?" ci hi.

¹⁰Amah in, "Huan sungah na gin ka za-a, guaktang a om ka hi manin lau-in ka bu hi," ci-in dawng hi.

¹¹Tuateh amah in, "Note guaktang na hilam uh kuan hong gen hiam? Nek loh dinga thu kong piak singkung pan ne na hi uh hiam?" ci hi.

¹²Mipa in, "Kei tawh om dinga na koih numei - amah in singkung pana singgah tawm hong pia-a ka ne hi,’ a ci hi.

¹³Tua ciangin TOPA Pasian in numei kiangah, "Bang ahia na hih?" a ci hi. Numei in, "Gulpi in hong khema ka ne hi," a ci hi.

¹⁴Tua ciangin TOPA Pasian in gulpi kiangah, "Hi ci gamtat khin na hi manin, "Innsate khempeuh le gamsate khempeuh sangin nang hong kihamsiat zaw hi!" Na gilpi-in na tal dinga na nuntak laiteng leivui na ne ding hi.

¹⁵Nang le numei kikal le nang suan le khak a[14] le ama suan-le-khakte kikalah kihuatna ka omsak ding hi; amah in na lutang suzan b[15] dinga, nang ama khetul na tu ding hi," ci hi.

¹⁶Amah in numei kiangah, "Nau na suah natnate ka khangsak mahmah ding hi; na sa mahmah in nau na suak ding hi. Na lunggulhna na pasal aa hi dinga, amah in nang hong uk ding hi," a ci hi.

¹⁷Amah in Adam tungah, "Na zi thu mangin, ‘Singkung pan ne peuhmah kei in,’ ci-a kong thupiak ne na hi manin, "Nang hangin leitang kihamsiat hi; na nuntak sung khempeuh gimpi-in na semin na kivak ding hi.

¹⁸Nang adingin leitung in lingkungte le kiakte posak dinga lo sunga kungte na ne ding hi.

¹⁹Leivui pana nang hong kila ahi nungsang lei-a na ciah kik mateng na tala khua-ul suahna tawh an na ne ding hi; leivui na hi manin leivui-ah na ciah kik ding hi," ci hi.

²⁰Adam c[16] in a zi min Eve d[17] phuak hi, bang hang hiam cih leh amah a nungtate khempeuh nu a suak ding hi.

²¹TOPA Pasian in Adam le a zi ading savun puan bawlsakin silhsak hi.

²²Tua ciangin TOPA Pasian in, "Tu-in mipa in a sia le a pha thei a, eite khat mah tawh kibang ta hi. Amah in a khut tawh zamin nuntakna singkung pan lo-in ne-a, a nuntak tawntung khak ding kiphal peuhmah lo hi," ci hi.

²³Tua ciangin TOPA Pasian in amah a kilaknasa lei-tangah na sem dingin Eden Huan pan amah hawlkhia hi.

²⁴Mipa a hawlkhiat khit ciangin Eden Huan nisuahna lam panga e[18] nuntakna singkung zuatna lampi cingsaka, cherub-te le nung le mai-a kilek den meikuang namsau a pangsak hi.