Read Zokam Piancilna 30 Bible Online

Piancilna 30 - Zokam bible

Piancilna 30

¹Rachel in Jacob tawh ta khat beek a neih loh lam a theih ciangin a sanggamnu a haza hi. Tua ahi ciangin Jacob kiangah, "Ta nong piak kei leh ka si ding hi!" ci hi.

²Jacob a heh suak-a, "Ta hong neisak lo Pasian muna om ka hi hiam?" ci hi.

³Tua ciangin tuanu in, "Hiah ka nasemnu Bilhah a om hi. Kei ading ta a neih theih nading le ama tungtawna ka innkuan a pian theih nadingin amah luppih in," ci hi.

⁴Tua ciangin ama nasem Bilhah a zi khat dingin a pia hi. Jacob in tuanu luppih a,

⁵gaii-in amah tawh tapa khat nei hi.

⁶Tua ciangin Rachel in, "Pasian kei lamah pang hi; ka thumna hong ngai zo a, tapa khat hong pia hi," ci hi. Tua hangin amah in a min Dan f[145] phuak hi.

⁷Rachel’ nasemnu Bilhah in nau paii leuleu a, a tapa nihna a suak hi.

⁸Tua ciangin Rachel in, "Ka sanggamnu tawh nakpi takin ka kinawk uh a, ken ka zo hi," ci hi. Tua ahi ciangin amin Naphtali g[146] phuak hi.

⁹Leah in amah tatawp ahi lam a kitheih ciangin a nasemnu Zilpah Jacob zi dingin pia hi.

¹⁰Leah nasemnu Zilpah in Jacob tawh tapa nei hi.

¹¹Tua ciangin Leah in, "Hampha si’ng!" h[147] ci-in a min Gad i[148] phuak hi.

¹²Leah nasemnu Zilpah in Jacob tawh tapa a nihna a nei hi.

¹³Tua ciangin Leah in, "Ka lungdam lua! Numeite in kei lungdam hong ci ding uh hi," ci hi. Tua ahi ciangin a min Asher a[149] phuak hi.

¹⁴Mangbuh lak hun laitakin gamlakah Reuben a vakkhiat leh zawl-ai kung pawlkhat mu-a, a nu Leah a puak hi. Rachel in Leah kiangah, "Hehpihna-in na tapa’ zawl-ai tawm hong hawm in," ci hi.

¹⁵Ahi hangin amah in tuanu kiangah, "Ka pasal nong suh phazo sa lo na hi hiam? Ka tapa’ zawl-ai zong lak sawm lailai na hi hiam?" ci hi. Rachel in, "Hoih mahmah hi, na tapa’ zawl-ai tangin amah nang kiangah hong lum thei hi," a ci hi.

¹⁶Tua hi a, tua nitakin gamlak panin Jacob a ciah ciangin amah dawn dingin Leah a paikhia hi. Amah in, "Ka tapa’ zawl-ai tawh nang kong nuh sa hi," a ci hi. Tua ciangin amah tuanu tawh tua zan a lum hi.

¹⁷Pasian in Leah thungetna za a, amah gai-in Jacob tawh tapa a ngana a nei hi.

¹⁸Tua ciangin Leah in, "Pasian in ka nasemnu ka pasal tungah ka piak manin kei pahtakman hong pia hi," ci hi. Tua ahi ciangin a min Issachar b[150] phuak hi.

¹⁹Leah in nau paii leuleu a, Jacob tawh tapa a gukna a nei hi.

²⁰Tua ciangin Leah in, "Pasian in letsong manpha kei hong pia hi. Tu-in tapa guktak neita ka hi manin ka pasal in hong pahtawi buang ding hi," ci hi. Tua ahi manin a min Zebulun c[151] a phuak hi.

²¹Tua khit a sawt sim ciangin tanu khat nei-a, a min Dinah phuak hi.

²²Tua ciangin Pasian in Rachel a phawk hi; tuanu thu ngai-a, a sul honsak hi.

²³Amah gai-in tapa khat nei-a, "Pasian in mi hong maimawlsakna teng lakhia zo hi," a ci hi.

²⁴A min Joseph d[152] phuak-a, "TOPA in tapa dang hong piak beh ta hen," ci hi.

²⁵Rachel in Joseph a neih khit ciangin Jacob in Laban kiangah, "Ka gam leitangah ka ciah kik theih nadingin kei hong sawl ta in.

²⁶Nang tunga kong thalawhsa ka zite ka tate hong pia inla ka ciah ta ding hi. Na na bangzah in sem ka hiam, cih na thei hi," ci hi.

²⁷Ahi hangin Laban in ama kiangah, "Nong angvan zawh leh nong hehpihna in om lai un. Nang hangin TOPA in thupha hong piakna ka mukhin e[153] hi," a ci hi.

²⁸Amah in, "Na thamante hong gen inla kong pia ding hi," cih beh lai hi.

²⁹Jacob in ama kiangah, "Nang ading ka sepsa le na gankhawite ka cin sunga a khanna na thei zo hi.

³⁰Kong tun ma-a tawmkha na neihte tampitak pha a, ka hihna peuhpeuh ah TOPA in nang thupha hong pia hi. Ahi hangin cik ciangin ka inn sunga ding sem ding ka hi hiam?" ci hi.

³¹Amah in, "Nang bang hong pia ding ka hi hiam?" ci-in dong hi. Jacob in, "Bangmah hong pia kei in, ahi zongin kei adingin hih na khat na hih leh na tuuhonte vaanin ka cing ding hi:

³²Tuni-in na tuuhon khempeuh lakah vak kawikawi in tuu a sihkapte ahikeh a gialte, tuuno vomte le keel a sihkap ahikeh a gialte a honte pan ka khenkhia ding hi. Tuate ka thaman hi ding hi.

³³Mai lamah kei nong piak thamante na et peuhpeuh ciangin ka thumanna in teci hong pang ding hi. Kei neihsa keel lakah a sihkap ahikeh a gial ahi zongin tuuno a vom lo a kimuh leh a kigu in kingaihsun ding hi," ci-in dawng hi.

³⁴Laban in, "Ka thu kim hi, na gensa bangin hisak in," ci hi.

³⁵Tua ni mah in keel a pate a dunggial le a sihkapte khempeuh le keel a nu a sihkap le a gialte khempeuh (a dangte khempeuh a kang ahi hi.) le tuuno vomte khempeuh khenkhia-a, a tapate cingsak hi.

³⁶Tua ciangin amah le Jacob kikal ni thum paina-ah cing a, Jacob in a om lai Laban gan honte cing hi.

³⁷Jacob in hiangpa, almond le poplar kungte pan a hiang thakte sat-a, a hawngte gitin hawkkhia a, a sunga a kangte a dawksak hi.

³⁸Tua ciangin ganhonte tuidawn a, a pai cianga thakhat-a a muh pah theih nading munah tua singhiang gialte, tui piakna kuangzawn omna khempeuhah a koih hi. Tuuhonte in nisa thuaka, tui dawn dingin a pai ciangin,

³⁹tua singhiangte mai-ah a kilu uh hi. No a neih uh ciangin a dunggial tawh, a sihkap tawh a gial tawh ahi hi.

⁴⁰Jacob in tuunote khenkhia-a, ahi hangin a om laite Laban aa sunga a dunggialte le a vomte lam a ngasak hi. Tua bangin amah in ama aate Laban gante lakah koih loin a tuamin khen hi.

⁴¹A nu a hat zawte a huk a om peuhpeuh ciangin a kianga a kiluk theih nadingun Jacob in a ganhingte mai kuangzawn sungah singhiangte koih hi.

⁴²Ahi hangin a ganhingte a ginat kei leh tua lai-ah a koih kei hi. Tua ahi ciangin a gina lote Laban aa hi a, a hatzawte Jacob aa ahi hi.

⁴³Hih bangin mipa daupai pha mahmah a, tuuhon tampi, nasem numei, nasem pasal, kala-oh le laa-te nei hi.