Read Zokam Piancilna 31 Bible Online

Piancilna 31 - Zokam bible

Piancilna 31

¹Laban’ tapate in, "Jacob in i pa neihsa na khempeuh la khina, i pa tawh kisai a hauhna khempeuh ngah khin hi," a cih cih uh Jacob in za hi.

²Tua banah Laban lungsim puak ama tungah nidang a bat loh lam Jacob in thei hi.

³Tua ciangin TOPA in Jacob tungah, "Na pate le na behte’ leitangah ciah kik in; nang tawh ka omkhawm ding hi," ci hi.

⁴Tua ciangin Jacob in Rachel le Leah, a tuuhonte omna gamsung panin hong paikhiat nadingun thu khak hi.

⁵Amaute kiangah, "Na pa lungsim puak kei tungah nidang a bat loh lam ka mu hi; ahi hangin ka pa’ Pasian kei tawh omkhawm hi.

⁶Ka tha neih khempeuhin note pa’ na ka sep lam na thei uh hi;

⁷tua hi ta leh na pa in hong khembawlin ka thaman sawmvei kheng zo hi. Bangbang ahi zongin amah in kei hong siatsak ding Pasian in a phal kei hi.

⁸Amah in ‘A sihkap teng nang thaman hi ding hi,’ ci leh tuuno suakte khempeuh a sihkap hi,’ ‘A dunggial peuhmah nang thaman hi ding hi,’ ci leh tuuno suakte khempeuh a dunggial ahi hi.

⁹Tua ci-in Pasian in na pa gankhawi lakhia in kei tungah hong pia hi.

¹⁰"Ganhing a huk hun laitakin mang khat ka man-a ka mangin ka khuadak leh tuuhonte tawh kikhawl keeltalte, a dunggial, a sihkap le a pawl ahi hi.

¹¹Ka mangin Pasian vansawltak in ka kiangah, ‘Jacob’ hong ci a, ‘Hiah ka om hi,’ ci-in ka dawng hi.

¹²Tua ciangin amah in, ‘En dih in, tuuhonte tawh a kikhawl keeltal khempeuh a dunggial, a sihkap ahikeh a pawl ahi hi; ahang in, Laban in nang tunga hong bawlna khempeuh ka mu zo hi.

¹³Keimah in khuam sathau na buahna le kei tunga na kiciamna Bethel Pasian ka hi hi. Tu-in hih gam nusia pah inla na suahna leitangah ciah kik in,’ hong ci hi," ci hi.

¹⁴Tua ciangin Rachel le Leah in, "I pa’ neihsa i luah ding gou nei lai i hi hiam?

¹⁵Amah in eite gamdang mi in hong ngaihsun hi lo ahi hiam? Eite hong zuak bek tham loin ei adinga hong piaksate nangawn zangmang khin hi.

¹⁶Pasian in a lakkhiat i pa’ hauhna khempeuh ei le i tate aa suak hi. Tua ahi ciangin Pasian in nang tunga hong hilh bangbangin hih in," ci-in dawng uh hi.

¹⁷Tua ciangin Jacob in a zite le a tate kala-oh tungah tuangsak a,

¹⁸Canaan gam-a a pa Isaac kiangah, Paddan Aram-a a[154] a lamsa na khempeuh pua-in ama ganhing khempeuh masuanin pai hi.

¹⁹Laban a tuumul met dinga a pai ciangin Rachel in a pa’ innsung pasiante a na gu hi.

²⁰Tua banah Jacob in Aram mi Laban khem a, ama kiangah gen loin taisim a sawm hi.

²¹Tua ciangin a neih khempeuh tawh tai-a, Gunpi b[155] kantan in Gilead gam mualtung lam manawh hi.

²²A ni thum ni-in Jacob tai lam Laban tungah kiko hi.

²³Amah in a behte tonpih in ni sagih sung Jacob delh uh a, Gilead gam mual tungah pha uh hi.

²⁴Tua ciangin zanin Aram mi Laban mangah Pasian pai-a ama kiangah, "Kidawm in, Jacob tungah a sia ahi a, a pha ahi zongin bangmah gen kei in," ci hi.

²⁵Laban in a phakin Jacob in Gilead gam mualtungah a puanbuk lam a, Laban le a behte in zong tua lai-ah giahphual sat uh hi.

²⁶Tua ciangin Laban in Jacob kiangah, "Na hih bang ahi hiam? Kei hong khemin gal sunga mat bangin ka tanute na puakhia zo hi.

²⁷Bang dinga kei hong khemin taikhia sim na hi hiam? Harb le tambourine tawh la sa in lungnuam in kong khak theih nadingin bang hanga hong gen lo na hi hiam?

²⁸Ka tute hong namsak loin, ka tanute mangpha nangawn nong khaksak kei hi. Na haitat mahmah hi.

²⁹Nang kong thuaksakna khop vang ka nei hi; ahi hangin zan zanin na pa’ Pasian in ka mang sungah, ‘Kidawm in, Jacob tungah a sia a hi zongin a pha ahi zongin bangmah gen kei in,’ hong ci hi.

³⁰Tu-in na pa’ innah ciah nuam lua na hi manin a paikhia na hi hi. Ahi hangin bang dinga ka pasiante gu na hi hiam?" ci hi.

³¹Jacob in Laban kiangah, "Kei tung pan na tanu thatang hat thu in hong sut kik dingin hong ngaihsun ka hi manin ka lau hi.

³²Ahi hangin na pasiante na muhna penpen kihing khawi kei hen. I behte muh in nang mahmah in na neihsa kei aa lakah a om hiam zong in, a om leh la in," ci hi. Tua laitakin Rachel in pasiante a guk lam Jacob in a thei kei hi.

³³Tua ciangin Jacob puanbuk sung, le Leah puanbuk sung le nasem numei gel puanbuk sungah Laban pai-a ahi hangin bangmah a mu kei hi. Leah puanbuk sung pan a paikhiat khit ciangin Rachel puanbuk sungah lut hi.

³⁴Rachel in a innsung pasiante la-in a kala-oh tutphah kawmah koiha amah a tungah tu hi. Laban in buk sunga na khempeuh lak zonga, ahi hangin bangmah a mu kei hi.

³⁵Rachel in a pa kiangah, "Heh kei in topa aw, nang omin ka ding thei kei hi; ka nin neih hun in hong pha hi," a ci hi. Tua ciangin zong a, ahi hangin innsung pasiante a mu zo kei hi.

³⁶Jacob heh a, Laban ngawhbawl in, "Ka mawhna bang hiam?" ci-in Laban dong a, "Sabet banga kei nong bet nadingin ka mawhna bang ahi hiam?

³⁷Tu-in ka van sung khempeuh na zong khin hi, na inn sung tawh kisai bang mu na hi hiam? Nang beh le kei behte mai-ah hong luikhia dih in, ei gel kikalah amau thu khensak ni.

³⁸"Tu-in nang tawh ka om zawh kum sawmnih pha zo hi. Na tuute na keelte kipua mangngilh lo tham loin na tuuhonte lakah tutalte ka ne nai kei hi.

³⁹Na ganhingte gamsate nekbang kong puak kei hi; tua supnate ken ka thuak hi. Tua ciangin sun ahikeh zana kigute peuhmah kei nong lohsak hi.

⁴⁰Ka omdan hih ahi hi: Sunin nisa in hong kanga, zanin a vot in hong tawp hi; ka ihmu thei kei hi.

⁴¹Na inn sunga ka om kum sawm nih sung hih bang ka hi hi. Na tanu nihte kum sawm le li sung hong thalawh in, na tuuhonte kum guk sung kong thalawh a, ka thaman sawmvei na khel hi.

⁴²Ka pa’ Pasian, Abraham’ Pasian, Isaac Kihtakpa kei tawh om lo hileh kei khut guaka hong ciahsak ding na hi hi. Ahi hangin Pasian in ka haksatna le haksapi a na ka sepnate mu-in zan zanin nang hong tai ahi hi," ci hi.

⁴³Laban in Jacob kiangah, "Numei teng ka tanu, naupang teng ka naupang, tuuhon teng kei tuuhon. Na muh khempeuh kei aa ahi hi. Tuni-in hih ka tanute ahikeh amau sunga piang naupangte tungah bang hih thei lai ding ka hi hiam?

⁴⁴Tu-in hong pai in, nang le ken thukhun khat i bawl ding a, ei kikalah teci i hisak ding hi," ci-in dawng hi.

⁴⁵Tua ahi ciangin Jacob in suangtum khat suangphuh in a phut hi.

⁴⁶Ama mipihte kiangah, "Suang pawlkhat hong khawm un," ci hi. Tua ciangin amaute in suang khawmin a lomin ciang uh a, tua suangvum kiangah an ne uh hi.

⁴⁷Tua pen Laban in Jegar Sahadutha a[156] ci a, Jacob in Galeed b[157] a ci hi.

⁴⁸Laban in, "Tu ni-in nang le kei kikalah hih suangvum teci ahi hi," a ci hi. Galeed a kicihna tua hang ahi hi.

⁴⁹Mizpah c[158] zong kici hi; bang hang hiam cih leh amah in, "Nang le kei khat le khat i kigamlat ciangin TOPA in nang le kei kikal hong cing tuak hen.

⁵⁰Ka tanute na bawlsia zongin, ka tanute banah zi dang na lak leh eite tawh kuamah a om kei zongin, nang le kei kikalah i teci Pasian ahilam ciamteh in," ci hi.

⁵¹Laban in Jacob kiangah, "Nang le kei kikal-a ka phuhsa hih lai-ah suangvum om a, hih lai-ah suangphuh om hi.

⁵²Nang hong siasak dingin hih suangcian khengin nang lamah kei kong pai kei ding a, hih suangvum le suangphuh khengin kei lam pangah nang nong pai loh nading, hih suangvum teci khat hi a, hih suangphuh teci khat ahi hi.

⁵³Abraham’ Pasian, Nahor’ Pasian, amaute’ pate’ Pasian in eite thu hong khen ta hen," zong ci hi. Tua ciangin Jacob zong a pa Isaac Kihtakpa minin a kiciam hi.

⁵⁴Amah in gamsung mualtungah biakpiakna khat pia-a, an ne dingin a behte sam hi. A nek khit uh ciangin amaute tua lai-ah tam uh hi.

⁵⁵A zingciang zingtungin Laban in a tute le a tanute nama, thupha a pia hi. Tua ciangin nusia-in innah ciah hi.