Read Zokam Piancilna 32 Bible Online

Piancilna 32 - Zokam bible

Piancilna 32

¹Jacob in zong a paina ban zoma, Pasian’ vansawltakte in amah a dawn uh hi.

²Jacob in amaute a muh ciangin, "Hih Pasian’ giahphual ahi hi!" a ci hi. Tua ahi ciangin tua mun Mahanaim d[159] min phuak hi.

³Jacob in Edom gam Seir leitanga om a sanggampa Esau kiangah kamtai sawlkhol hi.

⁴Amah in amaute hilh a: "Ka topa Esau tungah hih teng va gen un, ‘Na nasempa Jacob in, Laban tawh ka teng khawma, tu dong tua lai-ah ka om hi.

⁵Bawnghon le laate, tuu le keelte, nasem numei le nasem pasalte ka nei hi. Tu-in na mai-ah angvanna ka ngah nadingin hih thu ka topa ka khak hi,’ va ci un," ci hi.

⁶Kamtaite Jacob kiangah a kileh uh ciangin amaute in, "Na sanggampa Esau kiangah ka pai uh hi; tu-in amah nang hong dawn dingin hong kuana pasal za li hong tonpih hi," a ci uh hi.

⁷Jacob lau mahmah in lungkhama, a tonpih mite, tuuhonte, ganhonte le kala-ohte khen nih e[160] suah hi.

⁸Ama in, "Esau hong pai-a, pawlkhat f[161] a sim leh a omlai pawl g[162] suakta thei ding," ci-in ngaihsun hi.

⁹Tua ciangin Jacob in thu ngen a, ka pa Abraham’ Pasian, ka pa Isaac’ Pasian, ‘Na gam le na behte kiangah ciah kik in, kong lamzangsak ding hi,’ hong ci TOPA aw,

¹⁰na nasempa nong lahsa na migitna le na muanhuainate khempeuh tawh ka kilawm kei hi. Jordan ka kan lai-in ciangkhut bek ka neih hangin tu-in pawl nih ka pha ta hi.

¹¹Kong thum hi, ka sanggampa Esau khut panin hong hon in, ahang in, amah hong pai-in kei le naupangte le a nute hong sim khak ding ka lau hi.

¹²Nang kong lamzangsak pelmawh dinga, na suan-le-khakte a kisim thei lo zah in tuipi sehnel ka bangsak ding hi,’ nong ci khin hi," ci hi.

¹³Tua zan tua lai-ah giaka, ama kianga om a neihsate lakah a sanggampa Esau a piak ding:

¹⁴keel anu zanih le apa sawmnih,

¹⁵kala-oh pi a no nei sawm thum, bawngpi sawmli le bawngtal sawmkhat, le laa anu sawmnih le apa sawm telkhia hi.

¹⁶A nasemte a namnamin hon kepsak a, a nasemte kiangah, "Na mapai unla, ganhonte hon khat le hon khat na kihalsak un," ci hi.

¹⁷Amah in a masa pa tungah: "Ka sanggampa Esau tawh na kituah uh a, ‘Note kua aa hi a, koi-ah pai sawma, hih na mai-ua gante khempeuh kua aa hiam?’ ci-a hong dot ciangin,

¹⁸‘Na nasempa Jacob aa ahi hi. Ka topa Esau adinga hong khak hi-a, amah ko nungah hong pai hi,’ ci un," ci-in hilh hi.

¹⁹A nihna, a thumna le ganhon zuite khempeuh tungah: "Esau tawh na kituah uh ciangin a kibangin gen ciat un.

²⁰Tua ciangin, ‘Na nasempa Jacob nungah hong pai hi,’ ci khial kei un," ci hi. Bang hang hiam cih leh amah in, "Ka makhak letsongte in ama lungsim daisak ding hi; tua khita amah ka muh ciangin amah in kei hong sang thei kha ding hi," ci-in ngaihsun hi.

²¹Tua ciangin Jacob letsongte ama mai-ah mapai a, ahi hangin amah giahphualah tua zan a giak lai hi.

²²Tua zanin Jacob tho-a, a zite gel, a nasem numeite nih le a tapa sawm le khatte tonpih in Jabbok ngahmun ngapin kantan uh hi.

²³Amaute luigal a kahsak khit ciangin a neihsa khempeuh a gal ah tung khin hi.

²⁴Tua ciangin Jacob kia bek oma, mi khat in amah khuavak dong buan hi.

²⁵Tua mipa in Jacob a zawh loh lam a theih ciangin a khelguh lawnsaka, mipa tawh a kibuanna in a khelguh a kilawi hi.

²⁶Tua ciangin mipa in, "Khua vak ta hi, hong khah in," ci hi. Ahi hangin Jacob in, "Thupha nong piak kei leh kong khah kei ding hi," ci-in dawng hi.

²⁷Mipa in, "Na min bang hiam?" ci hi. Amah in, "Jacob," ci hi.

²⁸Tua ciangin mipa in, "Na min Jacob hi nawn loin Israel h[163] hi ding hi; bang hang hiam cih leh Pasian le mite tawh na kilai a na zo khin hi," ci hi.

²⁹Jacob in, "Nong hehpihna-in na min hong gen in," ci hi. Ahi hangin, "Bang hangin ka min hong dong na hi hiam?" ci-in dawng hi. Tua ciangin tua lai-ah amah thupha pia hi.

³⁰Tua ahi ciangin Jacob in, "Pasian tawh ka kimaituah hangin hong kihingkhawi hi," a cihna in tua mun Peniel a[164] a phuak hi.

³¹A khelpi hangin baisa-in pai a, Peniel b[165] a kantan laitakin ni a suak hi.

³²Tua ahi manin tuni dong Israel mite in khelguh tunga belh thaguipi a ne kei uh hi; bang hang hiam cih leh Jacob’ khelguh kianga thaguipi lawnsak hi.