Read Zokam Piancilna 35 Bible Online

Piancilna 35 - Zokam bible

Piancilna 35

¹Tua ciangin Pasian in Jacob kiangah, "Bethel ah paito inla tua lai-ah teng in. Tua lai-ah na sanggampa Esau pana na tai lai-a hong kilang Pasian tungah biakna-tau khat dawh in," ci hi.

²Tua ciangin Jacob in a innkuanpihte le amah tawh a omte khempeuh tungah, "Na kep uh gamdang pasiante paikhia unla, no le no kisiansuahin na puansilh uh khek un.

³Tua khit ciangin hong pai un, ka lungkham laitaka hong dawng, ka painasa tenga hong ompih Pasian tungah biakna-tau khat ka dawhna Bethel ah pai to ni," ci hi.

⁴Tua ciangin amaute in a neih uh gamdang pasiante khempeuh le a bilbahte uh Jacob pia uh a, Jacob in Shechem a tehno sing nuai-ah a phum hi.

⁵Tua ciangin amaute dingkhia uh a, kuamah in amaute a delh loh nadingin amaute kima om khuate ah Pasian in lauhuaina a tungsak hi.

⁶Jacob le amah tawh a omkhawm mi khempeuh Canaan gama Luz (tua pen Bethel) tung uh hi.

⁷Tua lai-ah biakna-tau khat dawha, tua mun El Bethel c[175] a ci hi; bang hang hiam cih leh a sanggampa pana a tai lai-in tua lai-ah Pasian mahmah ama tungah kilaak hi.

⁸Tu-in Rebekah cingnu Deborah si a, Bethel a tehno phung nuai-ah kivui hi. Tua ahi ciangin tua mun Allon Bacuth d[176] kiphuak hi.

⁹Paddan Aram e[177] pan Jacob a kileh khit ciangin ama tungah Pasian kilak kik a, thupha pia hi.

¹⁰Pasian in ama kiangah, "Na min Jacob f[178] ahi hi; ahi hangin Jacob na kici nawn kei ding hi; na min Israel g[179] hi ding hi," ci hi. Tua ahi ciangin ama min Israel a phuak hi.

¹¹Tua ciangin Pasian in a kiangah, "Keimah a Thahatpen h[180] Pasian ka hi hi; cipha unla khangin tampi pha un. Nang panin minam khat le minam hon khat piang dinga, na pumpi sung panin kumpite piang ding hi;

¹²Abraham le Isaac ka piaksa leitang, nang zong kong pia-a, nang nunga na suan-le-khakte ka pia hi," ci hi.

¹³Tua ciangin amah a hopihna mun ama kiang pan Pasian a paito hi.

¹⁴Pasian in amah a hopihna munah Jacob in suangkhuam khat phuta, tua tungah dawn theih biakna a buak hi; tua tungah sathau zong buak hi.

¹⁵Jacob in Pasian in amah a hopihna mun min Behtel i[181] phuak hi.

¹⁶Tua ciangin Bethel pan kikhinkhia uh a Ephrath pan a gamla sim a tun laitakun Rachel suak dingin kithawi-a haksa sa mahmah hi.

¹⁷A nausuahna haksa a sak mahmah laitakin naudomnu in ama kiangah, "Tapa dang nei na hi manin lau kei in," ci hi.

¹⁸Amah in si dinga - a husan nunung penin - a tapa’ min Ben-Oni j[182] phuak hi. Ahi hangin a pa in ama min Benjamin k[183] a phuak hi.

¹⁹Tua ciangin Rachel si-a, Ephrath (tuapen, Bethlehem) zuatna lampi-ah kivui hi.

²⁰Jacob in a han tungah khuam khat phut a, tuni dongin tua khuam pen Rachel han ciamtehna ahi hi.

²¹Israel kikhin leuleu a, Migdal Eder galah puanbuk lam hi.

²²Tua kual tengah Israel a ten laitakin Reuben lut-a a pa’ zino Bilhah luppih in, Israel in tua thu a za hi. Jacob in tapa sawm-le-nih nei hi:

²³Leah’ tapate: Jacob ta masa Reuben, Simeon, Levi, Judah, Issachar le Zebulun.

²⁴Rachel’ tapate: Joseph le Benjamin.

²⁵Rachel’ nasemnu Bilhah’ tapate: Dan le Naphtali.

²⁶Leah’ nasemnu Zilpah’ tapate: Gad le Asher. Hihte, Paddan Aram a suak Jacob’ tapate ahi hi.

²⁷Abraham le Isaac tennasa Kiriath Arba (tua pen, Hebron) kiang Mamre a, a pa Isaac omna innah Jacob ciah hi.

²⁸Isaac kum za le sawm giat nungta hi.

²⁹Tua ciangin a hu nunung pen sangin si a, putekin kum tampi pha a, ama mite kiangah a kigawm hi. A tapate Esau le Jacob in amah vui uh hi.