Read Zokam Piancilna 37 Bible Online

Piancilna 37 - Zokam bible

Piancilna 37

¹Canaan gam, a pa omnasa leitangah Jacob teng hi.

²Hih in Jacob khangsutna ahi hi: Kum sawm le sagih a pha pan pasalno Joseph in a pa’ zi Zilpah’ tapa le Bilhah’ tapate, a sanggamte tawh tuuhon a cing uh hi; amah in a pa tungah amaute a sia in gen hi.

³Israel in a tapa dangte sangin Joseph itzaw hi, bang hang hiam cih leh a tek nunga a neih hi a; ama ading a kizem puantualpi c[191] khat a khuisak hi.

⁴A pa un amaute khatpeuh sangin amah itzaw cih a muh uh ciangin a sanggamte in amah mudah uh a, kamkhumin a hopih kei uh hi.

⁵Joseph in mang khat mana, a sanggamte kiangah a gen ciangin amaute in amah mudah semsem uh hi.

⁶Amah in amaute kiangah, "Ka mang na ngai dih un:

⁷i vekin lo sung khatah buhtu i lomhen hi. Tua ciangin thakhatin kei aa thoto a tangtakin a kitung hi. Tua laitakin no buhlomte kei aa kimkot-ah kikhawm uh a, kei buhlom lamah a kun uh hi," ci hi.

⁸A sanggamte in ama kiangah, "Ko tungah hong uk sawm na hi hiam? Nang, kote hong uk takpi ding na hi hiam?" ci uh hi. Amaute in a mang hang le a gensate hangin amah mudah zaw semsem uh hi.

⁹Tua ciangin mang dang khat manin, a sanggamte kiangah gen a, "Ngai dih un, mang dang khat ka man hi, tu-a penin ni, kha le aksi sawm le khatte kei lamah kun uh hi," ci hi.

¹⁰A sanggamte kianga a gen bangin a pa kiangah a gen ciangin a pa in tai a, "Hih na mangmat bang ahi hiam? Na nu le kei le na sanggamte hong pai-in na mai-ah hong kun ding ka hi uh hiam?" ci hi.

¹¹A sanggamte in amah haza uh a, ahi hangin a pa in tua thu a lungsim ah ciamteh hi.

¹²Tu-in a pa uh tuuhonte cing dingin a sanggamte Shechem gei-ah kuan khin uh hi.

¹³Israel in Joseph kiangah, "Na theihsa bangin na sanggamte in Shechem gei-ah tuuhonte cing uh hi. Hong pai dih in amaute kiangah kong sawl ding hi," ci hi. Amah in, "Hoih mahmah hi," ci-in dawng hi.

¹⁴Tua ciangin amah in, "Pai in; na sanggamte le tuuhonte a dam uh hiam va en inla, thu hong zasak in," ci hi. Tua ciangin Hebron kuam panin amah a sawlkhia hi. Shechem ah Joseph a tun ciangin,

¹⁵amah gamlakah a pai kawikawi mi khatin mu a, "Bang zong na hi hiam?" ci-in a dong hi.

¹⁶Amah in, "Ka sanggamte zong ka hi hi, a tuuhonte uh koi lai-ah cing uh hiam, nong gen thei diam?" ci-in dong hi.

¹⁷Mipa in, "Amaute hih lai pan kikhinkhia zo uh hi. Amaute in, ‘Dothan ah pai ni,’ a cih uh ka za hi," ci-in dawng hi. Tua ahi ciangin Joseph in a sanggamte nung zui-a, Dothan kiangah amaute mu hi.

¹⁸Ahi hangin amaute in a gamlapi panin na mu uh a, amau kiang a tun ma-in a mah thah a na sawm khol uh hi.

¹⁹Amaute in, "Mang manpa hih lai-ah hong pai hi.

²⁰Tu-in hong pai un thatin hih tuidumte sung khatah pai-in, ‘Gamsa gilo khat in amah nawmvalh hi,’ ci ni. Tua ciangin a mangte bang hong ci hiam en dih ni," kici uh hi.

²¹Reuben in hih thu a zak ciangin amaute khut panin amah a suahtak zawh nading a hanciam hi. Amah in, "A nuntakna laksak liang kei ni,

²²a sisan them zong luangsak kei un. Hih sehnel-gam tuidum sungah lawn un. Ahi hangin ama tungah khut khat zong nga kei un," a ci hi. Reuben in amah suahtak-a a pa kianga a ciahpih theih nadingin hih banga a cih ahi hi.

²³A sanggamte kiangah Joseph a tun ciangin hoihtaka kizem a puantualpi bansau suahkhiatsak uh a,

²⁴kai in tuidum sungah a khia uh hi. Tuidum a hawm hi a, a sungah tui a om kei hi.

²⁵Amaute an ne dingin a tut laitakun a khuadak uh leh Gilead pana pai Ishmael khualzinte a mu uh hi. A kala-ohte un singnamtui, lingsi le paknamtui kha pua hi a, Egypt a puaksuk dinga pai uh ahi hi.

²⁶Judah in a sanggamte kiangah, "I sanggampa that-a, a sisan i phualsel hangin bang lemlawh ding i hi hiam?

²⁷Hong pai un, Ishmael-te zuakin ama tungah i khut nga dah ni; tua banah amah i sanggampa ei si ei sa mah ahi hi," ci hi. A sanggamte a thukim uh hi.

²⁸Tua ciangin Midian sumbukte in va nawk uh a, a sanggamte in tuidum sung panin Joseph kaikhia in, Ishmael-te tungah ngun shekel d[192] sawm nih in zuak uh a amaute in Egypt ah paipih uh hi.

²⁹Tuidum ah Reuben a va pai kik leh tua lai-ah Joseph a om loh lam mu-a, a puante balkek hi.

³⁰A sanggamte kiangah pai kika, "Naupangpa tua lai-ah a om nawn kei hi. Koi lam nga ding ka hi hiam?" ci hi.

³¹Tua ciangin Joseph puantualpi la-in, keel khat ngawng-at uh a, a sisan lakah puantualpi diah uh hi.

³²Amaute in a kizem a puantualpi a pa kiangah puak uh a, "Hih ka mu uh hi. Na tapa puantualpi hi hiam, hi lo hiam vel dih in," ci uh hi.

³³Amah in theipah a, "Ka tapa puantualpi himah ei! Ganhing gilote in amah valhtum khin hi. Joseph kibalnen khin taktak hi," ci hi.

³⁴Tua ciangin Jacob in a puansilh lai balkek-a, ippi puan silhin a tapa hangin ni tampi a thum hi.

³⁵A tanu a tapate khempeuh amah hehnem dingin va pai uh a, ahi hangin a hehnem ding uh nial hi. "Hi lo hi, ka thum kawmkawmin han a[193] lam zuanin ka tapa kiang ka pai ding hi," a ci hi. Tua bangin a tapa hangin a pa a kap hi.

³⁶Midian-te b[194] in, tua hun laitaka Egypt a Pharaoh uliante laka khat, inncing mangpa Potiphar tungah Joseph zuak uh hi.