Read Zokam Piancilna 38 Bible Online

Piancilna 38 - Zokam bible

Piancilna 38

¹Tua hun laitakin, Judah in a sanggamte nusia-a, Adullam-te Hirah min nei khat tawh a om khawm hi.

²Tua lai-ah Judah in Canaan mipa Shua’ tanu a mu hi. Amah in tuanu tenpiha, luppih hi.

³Amah gai-in tapa khat nei-a, a min Er ki phuak hi.

⁴Amah in nau paii leuleu a, tapa khat nei in a min Onan phuak hi.

⁵Tapa dang khat neih beh lai-a, a min Shelah phuak hi. Tuanu in amah a suahna mun Kezib ahi hi.

⁶Judah in a ta upa pen Er zi neisaka, tuanu min Tamar ahi hi.

⁷Ahi hangin Judah ta upa pen Er, TOPA muhna ah gilo a, TOPA in that hi.

⁸Tua ciangin Judah in Onan kiangah, "Na sanggampa’ zi luppih inla, tuanu tungah pasal sanggampa khat tavuan tangtun in," ci hi.

⁹Ahi hangin Onan in ama khang kizopna hi lo ding cih thei-a, a sanggampa’ zi a lupih ciangin a sanggampa’ khang a kizop loh nadingin a luppih simin a bawtui lei lakah a buasak hi.

¹⁰TOPA muhna-ah, ama gamtatna hoih lo hi; tua lai-a amah zong a that hi.

¹¹Tua ciangin Judah in a monu Tamar kiangah, "Ka tapa Shelah a khankhit mateng meigongin na pa’ innah va om phot in," ci hi. Ahang in, "A sanggamte bangin amah zong si kha ding hi," ci-in amah in a ngaihsun hi. Tua ahi ciangin a pa’ inn-a om dingin Tamar ciah hi.

¹²Tua zawh sawtveipi ciangin Judah’ zi Shua’ tanu a si hi. Judah a dahna teng a kap ciangin ama tuumul mette omna Timnah ah paito a, a lawmpa Adullam mi Hirah in amah zui hi.

¹³Tamar kiangah, "Na tekpa a tuumul met dingin Timnah ah hong pai hi," ci-a a kigen ciangin a meigong puan teng suahkhia-a,

¹⁴a lutun khu-in kizema, Timnah zuatna lampi gei Enaim lutna-ah a na tu hi. Ahang in, Shelah khankhin ta a, amah tawh lah a kitengsak nai loh lam amah in mu hi.

¹⁵Judah in amah a muh ciangin tuanu in a mai khuh ahi manin numei kizuak hi, ci-in a ngaihsun hi.

¹⁶Amah a monu ahilam thei lo a, lamgei ama kiangah va pai-in, "Hong pai in, kei tawh lumkhawm ni," a ci hi. Tuanu in, "Tua ahileh nang tawh lumkhawm leng bang nong pia ding hiam?" ci-in dong hi.

¹⁷"Ka ganhon lak pan keelno khat kong khak ding hi," ci hi. Tuanu in, "Nong khak mateng kiciamna khat nong pia ding hiam?" ci-in dong hi.

¹⁸Amah in, "Bang kiciamna kong pia ding hiam?" a ci hi. "Na seal le a awhna khau le na khuta na ciangkhut," ci-in dawng hi. Tua ciangin amah in tuate pia-in amah luppih-a, tuanu a gai hi.

¹⁹A paisan khit ciangin tuanu in a lukhuhna lakhia-a, a meigong puan a silh kik hi.

²⁰A sawt loin Judah in a lawm Adullam mipa numeinu tunga a kiciamna keelno pia dingin a paisak hi, ahi hangin tuanu a mu zo kei hi.

²¹Tua lai-a teng mite donga, "Lampi gei Enaiam a biakbukno a numei kizuaknu koi-ah om hiam?" ci-in a dong hi. "Hih lai-ah biakbukno a kizuak kuamah a om ngei kei hi," ci uh hi.

²²Tua ciangin Judah kiangah ciah kika, "Tuanu ka mu zo kei hi, tua banah tua lai-a tengte in, ‘Hih lai-ah biakbukno a numei kizuak om ngei zenzen lo hi, ci uh hi," ci hi.

²³Tua ciangin Judah in, "Amah hih keelno khak inga, nang amah na va muh zawh loh nungsang; hong kinuihsan kha incin a kepsa teng tang mai hen," ci hi.

²⁴Tua zawh kha thum bang ciangin Judah kiangah, "Na monu Tamar kizuakin khial-a, tu-in gaii hi," ci-in kigen hi. Judah in, "Kaikhia unla hallum un," ci hi.

²⁵Amah in a kikaihkhiat ciangin a tekpa kiangah kam vaikhaka, "Kei hihte neipa tawh a gaii ka hi hi," a ci hi. Tua banah, "En in, hih seal awhna khau le ciangkhutte kua aa cih na thei hiam?" cih beh lai hi.

²⁶Judah in tuate thei a, "Ka ta Shelah tawh ka kitensak loh nungsangin kei sangin amah thuman zaw hi," ci hi. Tua ciangin tuanu a luppih nawn kei hi.

²⁷A suah hun a tun ciangin a naubu sungah pasal nih a peng hi.

²⁸A suah ciangin amaute khat a khut a dawk masa hi. Tua ciangin naudomnu in khausan khatin a khutdawh ah khih-a, "Hih hong suak masa pen ahi hi," ci hi.

²⁹Ahi hangin a khut dawk tum kik a, a sanggampa paikhia-in, tuanu in, "Hih pen nangma phutkhapzia ahi hi!" a ci hi. Tua ciangin ama min Perez c[195] ki phuak hi.

³⁰Tua ciangin a khutdawh-a khausan kikhih a sanggampa suakkhia-a, a min Zerah d[196] ki phuak hi.