Read Zokam Piancilna 39 Bible Online

Piancilna 39 - Zokam bible

Piancilna 39

¹Tu-in Egypt ah Joseph ki paipih suk uh hi. Pharaoh ulianpa Egypt mi inncing mangpa Potiphar in Ishmael-te tung pan amah lei-a, tua lai tun hi.

²TOPA in Joseph ompih a, amah daupai-in a pu Egypt-pa’ innah a om hi.

³TOPA in amah ompih-a, a hihna khempeuh ah TOPA in gualzosak hi cih a pu in mu hi.

⁴Joseph in a pu maipha ngaha, a mi muanpi suak hi. Potiphar in amah a innsung khempeuh uksak-a, a neih khempeuh uk dingin muang hi.

⁵A inn sunga a neih khempeuh uk dingin a koih-a kipan Joseph hangin TOPA in Egypt mipa innsung thupha pia hi. Potiphar neihsa inn sung le lo sunga na khempeuh ah TOPA thupha a tung hi.

⁶Tua ciangin a neihsa na khempeuh Joseph ap khin hi; ama annek simloh lunghimawh lo a, Joseph a uksak hi. Tu-in Joseph thahoihin a mel hoih-a,

⁷tawlkhat khit ciangin a pu’ zi in Joseph zawlmit-in, "Kei hong luppih in!" ci hi.

⁸Ahi hangin amah in nial hi. Ka pu in a inn sunga na khempeuh a uk dingin kei hong koih manin lunghimawhna nei lo-a, a neih khempeuh kei hong ap hi.

⁹Hih inn sungah kei sanga lianzaw a om kei hi. Ka pu in nang lobuang aituama a neih om lo hi. Nang nangawn ama zi na hih hang hi bek hi. Bangci bangin tua bang gitlohna hih in Pasian tungah mawh ding ka hi hiam?" ci hi.

¹⁰Amah in ni khat khit ni khat Joseph a zol hangin amah a luppih gen loh amah tawh kithuah ding nangawn a nial hi.

¹¹Ni khat a tavuan khat sem dingin inn sungah pai-a, tua laitak innsung nasemte khat beek inn sungah a om kei hi.

¹²Tuanu in a puanpi in mana, "Hong pai-in hong luppih in," ci hi. Ahi hangin a puanpi tuanu khutah nusia-in innpua-ah taikhia hi.

¹³Tuanu in a khut sungah a puanpi nusia in innpua-ah tai cih a muh ciangin,

¹⁴a innsung nasemte sama, amaute kiangah, "En un hih Hebrew-pa in hong siattut dingin ei kiangah hong kipuak hi! Amah kei hong luppih dingin inn sungah hong pai-a ahi hangin ka awngkhia hi.

¹⁵Huhna ngenin ka kiko a zak ciangin ka gei-ah a puanpi koihin inn pua-ah taikhia hi," ci hi.

¹⁶A topa innah a ciah mateng tuanu in tua puanpi a kiangah kemcip hi.

¹⁷Tua ciangin: "Tua inn sung nong tut Hebrew sila pa ka kiangah kei hong no dingin hong pai hi.

¹⁸Ahi hangin huhna ngenin ka kiko ciangin ka gei-ah a puanpi nusia in amah inn pua-ah taikhia hi," ci hi.

¹⁹A topa in a zi thugen teng a zak ciangin, "Na sila pa in tua banga hong bawl maw," ci-in heh mahmah hi.

²⁰Joseph’ pu in amah kumpipa’ thongkiate kikhumna thongah a khia hi. Ahi hangin Joseph tua lai-ah thongkia-a a om laitakin

²¹TOPA in amah ompih hi; ama tungah a migitna laka, thong-ukpa mai-ah maipha ngahsak hi.

²²Tua ahi ciangin thongukpa in thong sunga om khempeuh Joseph uksak-a, tua sunga kisem khempeuh ama thuthu ahi hi.

²³Thongukpa in Joseph ukna nuai-a om peuhmah a don vet kei hi. Bang hang hiam cih leh TOPA in Joseph ompiha, a hihna khempeuh a lamzangsak hi.