Read Zokam Piancilna 40 Bible Online

Piancilna 40 - Zokam bible

Piancilna 40

¹Tua zawh a sawt loin Egypt kumpipa’ hai-tawipa le moh-empa in a pu uh Egypt kumpipa hehsak uh hi.

²Hai-tawi makaipa le moh em makaipa, ama ulian nihte tungah Pharaoh heh a,

³Joseph kikhumna inn thong inn sung, inncing mangpa innah a khum hi.

⁴Inncing mangpa in amaute Joseph khutah ap-a, amaute a kem hi. Amau kikhumna thong sungah tawlkhat a om khit uh ciangin

⁵tua mi nihte - thong kia-a om Egypt kumpipa haitawipa le moh-empa in zan khat thu-in mang man tuak uh a, a mangun khiatna nei tuak hi.

⁶A zingciang zingsang, Joseph amau kiangah a pai ciangin amaute lungkhinga om a mu hi.

⁷Tua ciangin a pu’ inn sunga amah tawh a kikhum khawm Pharaoh uliante kiangah, "Bang hanga tu ni-in dahmai na hi uh hiam?" ci-in dong hi.

⁸Amaute in, "Ka nih un mang ka man tuak uh a, ahi hangin a khia thei khat beek a om kei hi," ci-in a dawng uh hi. Tua ciangin Joseph in amaute kiangah, "Mang khiatna Pasian aa hi lo ahi hiam?" Na mang uh hong gen un," ci hi.

⁹Tua ciangin haitawi makaipa in Joseph kiangah a mang gen hi. Amah in, "Ka mangin ka mai-ah lenggui khat ka mu-a,

¹⁰tua lenggui in hiang thum a nei hi. A sel khit phetin pakpaha, a bawkte lenggah min hipah hi.

¹¹Pharaoh’ hai ka khutah omin, lenggahte ka la a, Pharaoh’ hai sungah sukin a khut sungah a hai ka pia hi," ci hi.

¹²Joseph in ama kiangah, "A khiatna hih ahi hi. A hiang thumte ni thum ahi hi.

¹³Ni thum sungin Pharaoh in na lu phong dinga, na nasepnasa munah hong koih kikin, ama haitawi na hi lai bang tektek in Pharaoh’ hai a khut sungah na pia ding hi.

¹⁴Ahi zongin nang tungah na khempeuh hong hoih ciangin hong phawk inla na migitna hong lak in; Pharaoh tungah kei hong pulak inla hih thong sung pan hong lakhia in.

¹⁵Bang hang hiam cih leh Hebrew-te gam panin kei thatanghat thu-a hong kipuakhia hi a, hih lai nangawnah thong hawmpi sungah koih nadingin bangmah ka sem kei hi," ci hi.

¹⁶Joseph in mang khiatna a lawphuai a gen ciangin moh-em makaipa in a kiangah, "Kei zong mang khat ka man hi: Ka lutungah anlum a[197] lawh thum om hi.

¹⁷Lawh a tungnung penah Pharaoh aa ding emsa namkim oma, ahi hangin tuate ka lutunga lawh sung pan vasate in ne uh hi," ci hi.

¹⁸Joseph in, "A khiatna hih ahi hi. Lawh thumte nithum ahi hi.

¹⁹Nithum sungin Pharaoh in na lu hong phong dinga, singkung b[198] khatah hong khai ding hi. Tua ciangin vasate in na sa ne mang ding uh hi," ci hi.

²⁰Tu-in a nithum ni Pharaoh suahni ahi hi. A ulian khempeuh tawh pawi bawl hi. Amah in haitawi makaipa le moh-em makaipa a uliante mai-ah lakhia a:

²¹haitawi makaipa pen Pharaoh khutah hai a piak theih nadingin a nasepna a semsak kik hi,

²²ahi hangin Joseph in mang khiatna a gen bang tektekin moh-em makaipa a khailum a[199] hi.

²³Ahi zongin haitawi makaipa in Joseph a phawk nawn kei hi; amah a mangngilh hi.