Read Zokam Piancilna 41 Bible Online

Piancilna 41 - Zokam bible

Piancilna 41

¹Tua khit kum nih bit a bei ciangin Pharaoh in mang khat man hi: Nile gei-ah a din laitakin

²gun sung pan thau kisa-a a mai pingpeng bawngpi sagih pusuakkhia-a, phai lakah a gamta uh hi.

³Tuate nungah a melsia a gawng gemgam bawngpi sagih Nile sung panin paikhia a, gun gei-a a dangte kiangah a ding uh hi.

⁴Tua a melsia a gawng gemgam bawngpite in a thau-a a mai pingpeng bawngpi sagihte nemang uh hi. Tua khit ciangin Pharaoh khanglo hi.

⁵Amah ihmu kik-a mang a nihna man hi: Buh kung khat panin a taksa a hoih buhvui sagih a vui hi.

⁶Tuate nungah nisuahna huih in a thepsak buhvui hawm sagih a vuikhia leuleu hi.

⁷Tua buhvui hawmte in a taksa a dim vui sagihte valhtum uh hi. Tua khit ciangin Pharaoh a khanglo hi; tua pen a mang ahi hi.

⁸A zingsang ciangin a lung nuam lo-a, Egypt gama mipil teng le mitphial sia teng a samsak hi. Pharaoh in amaute kiangah a mang gena, ahi hangin kuamah in a khiatna a gensak thei kei hi.

⁹Tua ciangin haitawi makaipa in Pharaoh kiangah, "Tuni-in ka ginatlohna ka phawk hi.

¹⁰Khatvei Pharaoh a nasemte tungah heh a, amah in kei le a moh-em makaipa, inncing mangpa’ innah hong khum hi.

¹¹Zan khat thu-in mang ka man khawm uh a, khiatna nei tuak hi.

¹²Tua laitakin inncingpa’ nasempa Hebrew khangno khat ko tawh a omkhawm hi. Ama kiangah ka mang uh ka gen uh ciangin, hong khiatsak a, ka mang uh a khiatna hong gen tuak hi.

¹³Ko tunga hong khiatsak bang lianin tung hi: Kei ka nasepna munah hong kikoih kika, a khat pen kikhailum hi," b[200] a ci hi.

¹⁴Tua ciangin Pharaoh in Joseph samsaka, amah thong hawmpi sung pan kipaikhiatpih pah hi. A sam met-a a puansilhte a khek khit ciangin Pharaoh mai-ah pai hi.

¹⁵Pharaoh in Joseph kiangah, "Mang khat ka mana, kuamah in a khia thei kei hi. Ahi hangin mang khat na zak phetin khia thei pah hi, ci-in a kigenna ka za hi," ci hi.

¹⁶Joseph in, "Ken ka hih thei kei hi; ahi hangin Pasian in ama deih bangin Pharaoh hong dawng ding hi," ci-in dawng hi.

¹⁷Tua ciangin Pharaoh in Joseph kiangah, "Ka mangin Nile gei-ah ka din laitakin

¹⁸gun sung panin thau kisa-a a mai pingpeng bawngpi sagih hong pusuakkhia a, phai lakah a gamta uh hi.

¹⁹Tuate nungah a melsia mahmah a gawng geugau a thep dekdak - bawngpi sagih hong paikhia hi. Egypt gam sung khempeuhah tua zah a melsia ka mu ngei nai kei hi.

²⁰A melsia a gawng bawngpite in, hong paikhia masa bawngpi thau sagihte netum uh hi.

²¹Ahi hangin a nek khit nangawn un a nek lam uh kua mah in thei lo a; a nek ma zah mah un a melsia veve uh hi. Tua khit ciangin ka khanglo hi.

²²"Ka mangin buh kung khat panin a taksa a hoih buhvui sagih hong vuikhia zong ka mu hi.

²³Tuate nungah nisuahna huih in a mut keu a hawm, a thep adang vui sagihte hong vuikhia hi.

²⁴Buhvui hawmte in a taksa vui sagihte valhtum uh hi. Mitphial siate kiangah ka gen hangin hong gensiang thei khat beek a om kei uh hi," a ci hi.

²⁵Tua ciangin Joseph in Pharaoh kiangah, "Pharaoh mangte khat hi-a, a kibang ahi hi. Pasian in a hih dingte Pharaoh tungah hong laakkhol ahi hi.

²⁶Bawngpi hoih sagihte kum sagih hi a, buhvui hoih sagihte kum sagih ahi hi; tua pen mang kibang hi a, khat ahi hi.

²⁷Tuate khit cianga hong paikhia a gawng a melsia bawngpi sagihte kum sagih hi a, nisuahna huih in a mut keu a man nei lo buhvui sagihte tawh a kibang ahi hi: Amaute kum sagih sung kialpi ahi hi.

²⁸"Pharaoh tunga ka gensa bang tektek ahi hi: Pasian in a hih dingte Pharaoh tungah hong lak zo hi.

²⁹Egypt gambupah kum sagih sung kihau mahmah ding hi,

³⁰ahi hangin tuate kum sagih sung kialpi in nungzuih ding hi. Tua ciangin Egypt a hauhnasa khempeuh kimangngilh dinga kialpi in leitang a siasak dikdek ding hi.

³¹A nungzuih kialpi nasia lua mahmah ahi manin tua ma-a hauhnasa kiphawkkha lo ding hi.

³²Pharaoh tunga nam nih a hong kipia mangmatna Pasian in kiptaka a khentatsa thu hi a, Pasian in a tangtungsak pah ding hi.

³³"Tu-in Pharaoh in thu ngaihsun siam mipil khat zong inla, Egypt gam uksak in.

³⁴Pharaoh in mangpite seh inla, a kihauh kum sagih sungin Egypt leitanga piang khempeuh sehnga suah sehkhat lasak in.

³⁵Hih hong tung ding kum hoih sunga an khempeuh amah khawmsak inla nek dingin Pharaoh thuneihna nuai khuapi sungah kholsak in.

³⁶Egypt tunga hong tung ding kum sagih kialpi hanga gam sung a siat loh nadingin kum sagih kialpi sunga zat dingin hih ante kikoihkhol ding hi," ci hi.

³⁷Pharaoh le a uliante khempeuh in hih ngimna hoih sa uh hi.

³⁸Tua ciangin Pharaoh in amaute kiangah, "Hih mipa lo a sungah Pasian’ kha c[201] omna midang i mu zo diam?" ci-in dong hi.

³⁹Tua ciangin Pharaoh in Joseph kiangah, "Pasian in hihte khempeuh nang hong theihsak nungsang, nang zah a mipil a kician khat beek a om kei hi.

⁴⁰Ka kumpi inn na uk dinga ka mite khempeuh in na thu hong mang ding uh hi. Nang sangin kumpi tokhom thu-ah a lianzaw ka hi bek ding hi," a ci hi.

⁴¹Tua ciangin Pharaoh in Joseph kiangah, "Egypt gam bup uk dingin nang kong koih zo hi," ci hi.

⁴²Tua ciangin Pharaoh in a min gelhna zungbuh a khutme pan suahkhia-a, Joseph khutme-ah a bunsak hi. Saihadial puan hoih tawh amah zemin a ngawngah kham khainiang oksak hi.

⁴³Amah in ama nuai-a pa a[202] in sakolleng tungah tuangsak a, a mai-ah mite in, "Lam na awn un," b[203] ci-in a awng uh hi. Tua bangin Egypt leitang bup ukin amah a koih hi.

⁴⁴Tua ciangin Pharaoh in Joseph kiangah, "Kei Pharaoh ka hi hi, ahi hangin nang thu loin Egypt gam khempeuhah kuamah in khut ahikeh khe a liik kei ding hi," ci hi.

⁴⁵Pharaoh in Joseph min Zaphenath-Paneah phuaka, On c[204] a siampi Potiphera’ tanu Asenath a zi dingin a pia hi. Tua ciangin Egypt gam khempeuh ah Joseph a zin hi.

⁴⁶Egypt kumpipa Pharaoh nasem-a a lutin Joseph kum sawm thum pha hi. Pharaoh omna panin zinkhia a, Egypt gam khempeuh a phasuak hi.

⁴⁷A kihauh kum sagih hun sungin leitang in tampitak a gahkhia hi.

⁴⁸Egypt gama a kihauh tua kum sagih sunga an piangte khempeuh Joseph in khawma, khuapite sungah a khol hi. Khuapi khempeuh ah a kima an piangte a khol ciat hi.

⁴⁹Joseph in buhhum tampitak, tuipi gei-a sehnel bangin a khol hi; tam lua mahmah ahi manin a ciamteh nawn vet kei hi; bang hang hiam cih leh kiteh zo nawn lo hi.

⁵⁰Kialpi kumte tun ma-in Joseph in On-a siampi Potiphera’ tanu Asenath tawh tapa nih a nei hi.

⁵¹Joseph in a tapa masa min Manasseh d[205] phuaka, "Pasian in ka lungkhamna khempeuh le, ka pa’ innkuanpih khempeuh hong mangngilhsak hang ahi hi," ci hi.

⁵²A tapa nihna min Ephraim e[206] phuaka, "Ka thuakna gamah Pasian in hong ciphasak hang ahi hi," ci hi.

⁵³Egypt a, kihauh kum sagih beita-a,

⁵⁴Joseph gensa bang tektek in kum sagih kialpi ding kipan ta hi. Gamdang khempeuh ah zong kialpi tunga ahi hangin Egypt gam bupah an a om hi.

⁵⁵Egypt gam khempeuh ah kialpi a tun pat laitakin mite in Pharaoh kiangah an ngen uh hi. Tua ciangin Pharaoh in Egypt mite khempeuh tungah, "Joseph kiangah pai unla hong gen bangbangin sem un," ci hi.

⁵⁶Gambup ah kialpi a tun kim ciangin, Egypt gam khempeuhah kialpi nasia lua ahi manin Joseph in a buh salte hongin Egypt mite tungah a zuak hi.

⁵⁷Joseph kianga an lei dingin gam khempeuh Egypt ah pai uh hi; bang hang hiam cih leh leitung khempeuhah kialpi nasia mahmah hi.