Read Zokam Piancilna 42 Bible Online

Piancilna 42 - Zokam bible

Piancilna 42

¹Jacob in Egypt ah an om cih a zak ciangin a tapate kiangah, "Bang hanga khat le khat ki-en gaga lelmawk na hi uh hiam?" a ci hi.

²A gen zomlai-a, "Egypt ah an om ci-in ka za hi. Puksi lo-a i nuntak nadingin va paisuk unla pawlkhat va lei un," ci hi.

³Tua khit ciangin Egypt a an lei dingin Joseph’ sanggamte sawm kuansuk uh hi.

⁴Ahi hangin Jacob in Joseph sanggampa Benjamin tungah siatna a tun khak ding lau ahi manin a sanggam dangte tawh a kuansak kei hi.

⁵Canaan gamah zong kialpi tung ahi manin Israel’ tapate an lei dingte lakah a pai uh hi.

⁶Tu-in Joseph tua gam ukpa hi a, mi khempeuh tunga an zuakpa ahi hi. Tua hi-a Joseph sanggamte a tun uh ciangin a mai uh leilak ngatin a mai-ah kun uh hi.

⁷Joseph in a sanggamte a muh phetin amaute theipah napi a thei lo kineih a, khauh hopih-in, "Koi pan hong pai na hi uh hiam?" ci-in dong hi. Amaute in, "Canaan gam pan an lei dinga hong pai ka hi uh hi," ci uh hi.

⁸Joseph in a sanggamte a theih hangin amaute in amah a thei kei uh hi.

⁹Tua ciangin Joseph in amaute tawh kisai a mangmat phawka, amaute kiangah, "Note thu kansimte na hi uh hi! Ka gam uh koi lai gina lo hiam cih en dinga hong pai na hi uh hi," ci hi.

¹⁰Amaute in, "Hi lo hi topa aw, na nasemte an lei dinga hong pai ka hi uh hi.

¹¹Kote mi khat’ tapate ka hi uh hi. Na nasemte thutang mi ka hi uh a, thukansim ka hi kei uh hi," ci-in dawng uh hi.

¹²Amaute kiangah, "Hi kei, ka gam uh koi lam gina lo hiam cih a ena hong pai na hi uh hi," ci hi.

¹³Ahi hangin amaute in, "Na nasemte pa khat tapa unau pasal sawm le nih ka pha uh a, Canaan gamah ka teng uh hi. Ka nau tum pen uh ka pa uh tawh oma, khat pen a om nawn kei hi," ci-in dawng uh hi.

¹⁴Joseph in amaute kiangah, "Kong gensa bang tektek in: Note thu kansim na hi uh hi!

¹⁵Tua ahi manin note hih bangin hong kisin ding hi: Na nau tum pen uh hih lai hong tun mateng hih mun na nusiat loh ding uh Pharaoh nuntakna tawh ka kiciam hi.

¹⁶Na sanggampa uh la dingin note khat pai un; na thu gente uh a man hiam, cih theih nadingin adang teng thong sungah hong kikem phot ding hi. Tua banga na hih kei uh leh Pharaoh nuntakna in ka kiciam hi, thu kansim na hi taktak uh hi!" ci hi.

¹⁷Tua ciangin amaute thong sungah ni thum sung a khum hi.

¹⁸A ni thum ni ciangin Joseph in amaute kiangah, "Pasian kihta ka hi manin hih bangin na hih uh leh na nungta ding uh hi.

¹⁹Note a thutang na hi uh leh no unau sungah khat hih thong sungah omsak unla, adang teng pai-in a gilkial na innkuante uh ading an va puak un.

²⁰Ahi hangin na thugente uh lungkim huai-in na sih loh nadingun na nau tum pen uh ka kiangah nong puak pelmawh ding uh hi," ci hi. Amaute in tua bangin hih uh hi.

²¹Amaute khat le khat kiho uh a, "I sanggampa hanga hong kidantat ahi hi. A nuntakna ading hong thum ngutngut lai-in a lungdonzia mu napi a thu i ngai kei hi. Tua hangin hih lungdonna ei tungah hong tung hi," kici uh hi.

²²Reuben in, "Naupang’ tungah mawhna bawl loh ding hong gen lo ka hi hiam? Kong gen hang na ngaih nop loh pi uh! Tu-in ama sisan man i piak pelmawh kul ding hi," ci-in dawng hi.

²³Joseph in kamphen zang ahi manin amah in a thugen uh a thei lo ding a sa uh hi.

²⁴Amaute kiang pan amah kihemkhia-in a kap hi; ahi zongin kileh kika, amaute a hopih kik hi. Amaute lak pan Simeon kaikhia a, amau muhin a hen hi.

²⁵Joseph in a ippite uah antang guansaka, amau ippi sung ciatah a nguntang ciat uh a koihsak ding uh le a lam-an ding uh a piak dingun thu a pia hi. Hih banga a kihihsak khit ciangin,

²⁶a laate uh a ante uh suan uh a, paikhia uh hi.

²⁷A giah nading mun a tun uh ciangin amaute khatin a laa an pia dingin a ippi a phel leh a ippi gongah a nguntang mu hi.

²⁸A sanggamte kiangah, "Ka nguntang hong kileh kik hi, hih lai-ah ka ippi sungah om hi," ci hi. Amaute lungkia-in khat le khat ki-en in ling uh a, "Pasian in ei tungah bang hong hih tazen hiam?" kici uh hi.

²⁹Canaan gama a pa Jacob kiang a tun uh ciangin amau tunga thupiangte khempeuh amah gen uh hi. Amaute in,

³⁰"Tua gamte’ topa, tua mipa ko tungah hong khauhpau mahmah a, tua gam thu a kansimin hong ngawh hi.

³¹Ahi zongin ko ama tungah, ‘Kote mi thutang ka hi uh hi; thu kansim ka hi kei uh hi.

³²Pa khat suan, sanggam pasal sawm le nih ka pha uh hi. Khat pa om nawn lo-a, a tum pen tu-in Canaan ah ka pa uh tawh om hi,’ ka ci uh hi.

³³"Tua ciangin gam mite topa, tua mipa in ko kiangah, ‘Mi thuman na hi uh leh na hi loh uh ka theih nading hih bang ahi hi: Na sanggamte uh khat hih lai-ah kei tawh nusia unla, a gilkial na innkuante uh ading an pua-in pai un.

³⁴Ahi hangin na nautum pen uh kei kiangah hong puak un; tua ciangin note thu kansim hi loin a thuman na hilam uh ka thei ding hi. Tua ciangin na sanggampa uh kong pia kik dinga, gam sungah sumbawlin a[207] na vak thei ding uh hi,’ hong ci hi," ci uh hi.

³⁵A ipte uh a butkhit uh ciangin a nguntang ipte uh na om ciat mawk hi! A pa uh leh amaute in sum-ip a muh uh ciangin lauthawng uh hi.

³⁶A pa uh Jacob in amaute kiangah, "Ka tate tawh nong kikhensak khin uh hi. Joseph om nawn lo a, Simeon zong om nawn lo hi; tu-in Benjamin paikhiatpih na sawm lai uh hi. Na khempeuh kei langpang suak khin hi," a ci hi.

³⁷Tua ciangin Reuben in a pa kiangah, "Amah na kiang kong tut kik kei leh ka tate gel na that thei hi, ka khut sungah muangtakin amah hong ap in, kong puak kik ding hi," ci hi.

³⁸Ahi hangin Jacob in, "Ka tapa tua lai-ah nang tawh a paisuk kei ding hi. A sanggampa si zo a, amah bek om lai hi. Na khualzinna uhah amah in bang lo khat tuak kha zenzen leh ka lukang dahna tawh hanah b[208] na tun kha ding uh hi," ci hi.