Read Zokam Piancilna 43 Bible Online

Piancilna 43 - Zokam bible

Piancilna 43

¹Tu-in gamsungah kialpi nasia lai mahmah hi.

²Egypt pana a lei uh ante a gaih khit uh ciangin a pa un amaute kiangah, "Kuan kik unla an tawm va lei beh lai un," ci hi.

³Ahi hangin Judah in ama kiangah, "Tua mipa in, ‘Na sanggampa uh ka kiangah nong tut kei uh leh ka mai na mu kei ding uh hi,’ ci-in limtakin hong vauhilh hi.

⁴Ka sanggampa uh nong tonpihsak ding leh na an ding lei dingin ka paisuk ding uh hi.

⁵Amah nong tonpihsak kei ding leh ka paisuk kei ding uh hi; bang hang hiam cih leh tua mipa in, ‘Na sanggampa uh kei kiang nong tut kei uh leh ka mai na mu kei ding uh hi,’ hong ci hi," ci hi.

⁶Isarael in, "Bang hanga mipa kianga, ‘Sanggam dang khat ka nei lai uh hi,’ va ci-a kei hong lungkhamsak se na hi uh hiam?" ci-in dong hi.

⁷Amaute in, "Tua mipa in ko mahmah le i innkuan thu hong limdot mahmah hi. Amah in, ‘Na pa uh a nungta lai hiam? Sanggam dang na nei uh hiam?’ ci-in ko hong dong hi. A dotnate a dawng lel ka hi uh hi. ‘Na sanggampa uh hong paipih un,’ hong cih ding bangci in ma theih ding ka hi uh hiam?" ci-in dawng uh hi.

⁸Tua ciangin Judah in a pa Israel kiangah, "Naupang hong tonpihsak inla nang le ko le i tate puksi lo-a, a nuntak nadingin va pai pak nung.

⁹Amah bangmah a cih loh nadingin ka nuntakna kong kham hi; a tunga tavuan khempeuh nong suan thei hi. Na kiang hong tun kik lo a, na mai-a kong omsak kik kei peuhmah leh ka nuntak sung tawntung tua mawhna ken ka khu ding hi.

¹⁰Hici bangin ziakai lo hi lehang pai-in nihvei kong tung kik khin ding uh hi," ci hi.

¹¹Tua ciangin a pa uh Israel in amaute kiangah, "A tua ci lo thei lo ahileh hi ci hih un! I gama piang a limci penpente - lingsi tawm, khuaizu tawm, singnamtui le paknamtui kha pawlkhat, pistachio le almond gahte na ip sunguah guang unla, tua mipa letsongin puak un.

¹²Na ippi gongua nong puak kik uh nguntang na loh nadingun a zah nih keng un. A kihih khial hikha ding hi.

¹³Na sanggampa uh zong tonpih unla, mipa kiangah pai mengmeng un.

¹⁴Amah in na sanggampa uh leh Benjamin hong tonpihsak nadingin Thahatpen c[209] Pasian in mipa mai-ah a lainatna hong pia ta hen. Kei ka hileh ka tate ka taan leh taan hi mai ve," ci hi.

¹⁵Tua ciangin amaute in letsong le nguntang a zah nih kengin Benjamin zong tonpih uh hi. Egypt ah paisuk mengmeng uh a, amau mahmah Joseph khutah kipia uh hi.

¹⁶Joseph in amaute tawh Benjamin a muh ciangin ama innsung ukpa kiangah, "Hih mite ka innah paipih inla, gan khat go in nitak an na huan in; an ka ne khawm ding uh hi," ci hi.

¹⁷Tuapa in Joseph gen bangin tua mite Joseph’ innah paipih hi.

¹⁸Tua mite a innah a kipaipih ciangin a patau uh hi. Amaute in, "Hih muna hong kipaipihna, i pai masak-a i ip sunga nguntang a kikoih pen hang hi ding hi. Amah in eite hong mawhzonin hong nuainetin a sila dingin hong manin i laate hong laksak nuam hi ding hi," ci-in ngaihsun uh hi.

¹⁹Tua ahi ciangin amaute Joseph innsung ukpa kiangah pai-in inn kongkhakah a hopih uh hi.

²⁰Amaute in, "Pu aw, hong hehpih in. A masa in hih lai-ah an lei dingin kong pai uh hi.

²¹Ahi hangin zana ka giah nading mun uh ka tun uh ciangin ka van ciat uh ka hong uh a, kong piak uh ngunte a gik zah lian ciat ka van gong uah na om kim hi. Tua ahi ciangin kong puak kik uh hi.

²²Ka an lei nading uh zong ngun ka puak thuah uh hi. Ka van sunguah ka ngun uh kua in koih hiam ka thei kei uh hi," ci uh hi.

²³Amah in, "Pha hi lau kei un. Na pa uh Pasian le note’ Pasian in na gou uh na van sunguah hong koihsak ahi hi; na nguntang uh ka ngah hi," ci hi. Tua ciangin amaute kiangah Simeon a paikhiatpih hi.

²⁴Tua innsung ukpa in tua mite Joseph inn sungah paipiha, a khe sil nading uh tui lui-in a laate uh gan-an a pia hi.

²⁵Sun-a Joseph a tun cianga, a piak ding uh letsongte a baihsa-in a koih uh hi, Bang hang hiam cih leh amaute in tua lai-ah an ne ding cih a zakhol zo uh hi.

²⁶Innah Joseph a ciah ciangin inn sunga a tawi uh letsongte amah pia uh a, a mai lei lakah a kun uh hi.

²⁷Amah in amaute omzia donga, tua ciangin nong gen uh na pa tek uh bang ci? A dam lai hiam?" ci-in dong hi.

²⁸Amaute in, "Ko na nasemte’ pa nungta lai-in dam lai hi," ci-in a dawng uh hi. Zahtakna bawlin a kunsuk uh hi.

²⁹A ettel leh ama nu’ tapa Benjamin mu a, "Hih pa a thu nong gen uh na nautum pen uh hiam?" ci-in donga, "Ka tapa aw, Pasian in nang hong hehpih hen," ci hi.

³⁰A sanggampa a muh ciangin ki-ip zo lo-a, a kah nading mun khatah Joseph a paikhia pak hi. Ama inndei tuamah pai-in tua lai-ah kap hi.

³¹A mai a phiat khit ciangin paikhia-a, ki-ip tentanin, "An lui un," ci hi.

³²Amaute in amah guak a tuamin lui-in unaute a tuamin a lui uh hi. Ama an nekpih Egypt mite in amau guakin a ne uh hi; bang hang hiam cih leh Egypt mite in Hebrew-te tawh an a nekhawm thei kei uh hi, tua pen Egypt mite adingin a kihhuai ahi hi.

³³Tua ciangin ama mai-ah tua mite a kum uh tawh kizui-in a upa pen pan a nautum pen dongin a tusak uh hi; tua ciangin amaute in lamdang sa uh a khat le khat a ki-en uh hi.

³⁴Joseph sabuai panin amaute an a kilui ciangin amau tanh ciat sangin Benjamin aa a zah nga-in a tamzaw hi. Tua ciangin amaute in amah tawh dawnin nuamtakin pawi a bawlkhawm uh hi.