Read Zokam Piancilna 45 Bible Online

Piancilna 45 - Zokam bible

Piancilna 45

¹Tua ciangin Joseph amah tawh a om khawmte muhna-ah ki-ip zo nawn lo a, "Ka kiangah kuamah omsak kei un!" ci-in awng hi. Joseph a sanggamte tungah a kipulak ciangin a kiangah kuamah dang a om kei hi.

²Amah nak kah lua a, tua Egypt mite in za uh a, Pharaoh inn sunga omte in a thu za uh hi.

³Joseph in a sanggamte kiangah, "Kei Joseph ka hi hi! Ka pa a nungta lai hiam?" a ci hi. Ahi hangin amaute a mai-ah laulua uh ahi manin a sanggamte in a dawng thei kei uh hi.

⁴Tua ciangin Joseph in a sanggamte kiangah, "Ka kiangah hong neh un," a ci hi. Amaute in a neh khit uh ciangin, "Na sanggampa uh Joseph, Egypt a na zuakpa uh ka hi hi!

⁵Tu-in hih lai-a nong zuakna uh hangin lungzing loin kihehsak tuan kei un, bang hang hiam cih leh nuntakna hu dinga note mai-a Pasian hong sawl ka hi hi.

⁶Ahang in tu-in gam sungah kum nih kialpi tung zo hi. Mailam kum nga sung lo khawhna an lakna a om kei ding hi.

⁷Ahi hangin Pasian in note mai-ah leitunga a baanglaite ading le na nuntakna uh a lamdangtak-a hu b[211] dingin kei hong sawl ahi hi.

⁸"Tua ahitak ciangin hih lai-ah hong puak no hi loin Pasian ahi hi. Amah in Pharaoh’ pa hong hisak a, ama innkuante’ topa le Egypt gam khempeuh ukpa in hong koih hi.

⁹Tu-in ka pa kiangah manlangin ciah unla ama kiangah, ‘Na tapa Joseph in: Pasian in Egypt khempeuh topa hong suaksak hi. Ka kiangah hong paisuk un; ziakai kei un.

¹⁰Goshen kualah na teng ding uh a, nang, na tate le na tute, na tuuhonte, na bawnghonte - na neih khempeuh uh tawh kei nong naih ding uh hi.

¹¹Tua lai-ah nang kong vak ding hi. Bang hang hiam cih leh kialpi tun ding kum nga in sam lai hi. Tua hi kei leh nang le na innkuanpihte le na neihsate in gentheihna a thuak ding hi,’ ci hi.

¹²"Note kianga thugen kei mahmah ka hina note le ka sanggampa Benjamin mahmah in zong a mu hi.

¹³Egypt a kei thupina teng le na muhsa khempeuh uh ka pa’ kiangah na gen un. Manlangin hih lai-ah ka pa hong paipih pah un," ci hi.

¹⁴Tua ciangin a sanggampa Benjamin pumkawi-in kap-a, Benjamin in zong kawi-in kap hi.

¹⁵Amah in a sanggamte namin a kah hi. Tua khit ciangin a sanggamte amah tawh kiho uh hi.

¹⁶Joseph’ sanggamte hong tung uh cih Pharaoh’ inn sungah a kizak ciangin Pharaoh le a ulian khempeuh a lungdam uh hi.

¹⁷Pharaoh in Joseph kiangah, "Na sanggamte kiangah, ‘Hih bangin hih un: Na ganhingte uh van suan unla Canaan ah ciah kikin

¹⁸na pa le na innkuanpihte kei kiangah hong paipih kik un. Egypt a leitang hoihna pen mun kong pia dinga, leitang hoihna na nopsakpih ding uh hi,’ ci in.

¹⁹"Amaute na hilh nading hih bang ahi hi, ‘Hih bangin hih un: Na zite, na tate tuan nading Egypt pan leng pawlkhat keng unla, na pa va la-in hong pai un.

²⁰Na neihsate uh ngaihsutin nei kei un, bang hang hiam cih leh Egypt a na hoih pente no aa hi ding hi,’ ci in," ci hi.

²¹Tua ciangin Israel’ tapate in tua mah bangin ahih uh hi. Joseph in Pharaoh thupiaksa bangin amaute lengte pia a, lampi-a a nek ding uh an zong a guan hi.

²²Amaute puanthak pia ciat-a, ahi hangin Benjamin ngun shekel c[212] za thum le puan khek nga a pia hi.

²³Tua ciangin a pa tungah: Egypt gama na hoih pente laa sawm puak khop, laapi sawm puak khop an le anlum le a lam-an ding a khak hi.

²⁴Tua ciangin a sanggamte paikhiasak a, a dinkhiat uh ciangin amaute kiangah, "Lampi-ah kitawng kei un!" ci hi.

²⁵Tua ciangin Egypt panin paikhia to uh a, Canaan gama a pa uh kiang tung uh hi.

²⁶Amaute in ama kiangah, "Joseph nungta lai hi! Amah Egypt ukpa na hi takpi hi," ci-in gen uh hi. Jacob lungsi dedu a, amaute thugen a um kei hi.

²⁷Ahi hangin Joseph in amau tunga a gente ama tungah a gen uh ciang le Joseph in amah puak kik nadinga a khak lengte a muh ciangin a pa uh Jacob lungsim a khanglo hi.

²⁸Tua ciangin Israel in, "Ka taksang ta hi! Ka tapa Joseph nungta lai hi. Ka sih ma-in pai-in amah ka va en ding hi," ci hi.