Read Zokam Piancilna 46 Bible Online

Piancilna 46 - Zokam bible

Piancilna 46

¹Tua ciangin a neihsa khempeuh tawh Israel kuankhia-a Beersheba a tun ciangin a pa Isaac’ Pasian tungah biakpiaknate pia hi.

²Israel in zanin mang mu a Pasian in, "Jacob, Jacob," ci hi. Amah in, "Hiah ka om hi," ci-in dawng hi.

³Amah in, "Keimah Pasian, na pa’ Pasian ka hi hi; Egypt ah na paisuk ding lau kei in, ahang in, tua lai-ah nang minam lian khat kong suaksak ding hi.

⁴Egypt ah nang kong tonpih suk dinga, kong ciahpih kik pelmawh ding hi. Joseph khut in na mit a khupsak ding hi," ci hi.

⁵Tua ciangin Jacob in Beersheba nusia a, Israel’ tapate in a pa uh Jacob le a zi a tate uh Pharaoh in ama tuan nadinga a khak lengte tungah a tuangsak uh hi.

⁶Amaute in a ganhonte uh zong hawl uh a, Canaan-a, a neihsate uh le a suan-le-khakte khempeuh uh tawh Egypt ah a pai uh hi.

⁷Amah in ama suan-le-khakte - a tapate, a tupate le a tanute le a tunute khempeuh Egypt ah tonpih hi.

⁸Hihte, Egypt a pai Israel mite (Jacob le a suan-le-khakte) ahi hi. Jacob ta upa pen Reuben.

⁹Reuben’ tapate: Hanoch, Pallu, Hezron, le Carmi.

¹⁰Simeon’ tapate: Jemuel, Jarmin, Ohad, Jakin, Zohar le Canaan numei’ tapa Shaul

¹¹Levi’ tapate: Gershon, Kohath le Merari.

¹²Judah’ tapate: Er, Onan, Shelah, Perez le Zerah (ahi hangin Er le Onan Canaan leitangah si zo hi.) Perez’ tapate: Hezron le Hamul.

¹³Issachar’ tapate: Tola, Puah, a[213] Jashub b[214] le Shimron.

¹⁴Zebulun’ tapate: Sered, Elon le Jahleel.

¹⁵Hihte, Paddan Aram c[215] a Leah in Jacob tawh a neih tapate banah ama tanu Dinah ahi hi. Hih ama tanu le tapate a vekin sawm thum le thum ahi hi.

¹⁶Gad’ tapate: Zephon d[216] Haggi, Shuni, Ezbon, Eri, Arodi le Areli.

¹⁷Asher’ tapate: Imnah, Ishvah, Ishvi le Beriah Amau sanggamnu Serah ahi hi. Beriah’ tapate: Heber le Malkiel.

¹⁸Hihte, Laban in a tanu Leah tunga a piak, Zilpah in Jacob tawh a neih tate hi a - a vekin sawm le guk ahi hi.

¹⁹Jacob’ zi Rachel’ tapate: Joseph le Benjamin.

²⁰Egypt ah Joseph in On e[217] a siampi Potiphera’ tanu Asenath tawh Manasseh le Ephraim nei hi.

²¹Benjamin’ tapate: Bela, Beker, Ashbel, Gera, Naaman, Ehi, Rosh, Muppim, Huppim le Ard.

²²Hihte, Jacob pana suak Rachel tapate hi a - a vekin sawm le li ahi hi.

²³Dan’ tapa: Hushim:

²⁴Naphtali tapate: Jahziel, Guni, Jezer le Shillem.

²⁵Hihte, Laban in a tanu Rachel tunga a piak Bilhah in Jacob tawh a neih tapate hi a - a vekin sagih ahi hi.

²⁶Egypt a Jacob tawh a paite khempeuh - a tapate’ zite kisim lo - ama suan-le-khak bekbek - mi sawm guk le guk ahi hi.

²⁷Egypt a suak Joseph’ tapa f[218] gel tawh, Egypt a pai Jacob innkuan peuhmah a vekin sawm sagih g[219] ahi hi.

²⁸Tu-in Jacob in Goshen lam a lak dingin Joseph kiangah Judah a mapaisak hi. Amaute Goshen kual a tun uh ciangin,

²⁹Joseph in a sakolleng kithawisak-a, a pa Israel dawn dingin Goshen ah pai hi. Ama mai a muh phetin Joseph in a pa h[220] pumkawi-a sawtveipi kap hi.

³⁰Israel in Joseph kiangah, "Tu-in nang a nungta lai na hilam kei mahmah in hong mu khin ka hi manin ka si zongin phamawh ka sa kei hi," ci hi.

³¹Tua ciangin Joseph in a sanggamte le a pa’ innkuanpihte tungah, "Pharaoh kiangah va pai-in, ‘Canaan gama teng ka sanggamte le ka pa’ innkuanpihte ka kiang hong tung zo hi.

³²Tua mite tuu cingte ahi uh hi; amaute in gan cing uh a, a tuuhonte, a bawnghonte, a neih khempeuh uh hong hawl uh hi,’ ka va ci ding hi.

³³Pharaoh in hong sap-a, ‘Bang sem na hi uh hiam?’ ci-a hong dot ciangin,

³⁴‘Na nasemte in ka pa uh sep bang tektekin ka neu tungua kipan gan ka cing uh hi,’ ci-in na dawng ding uh hi. Tua hileh note Goshen ah hong kitengsak ding hi; ahang in, Egypt-te in tuucing peuhmah a kih uh hi," ci hi.