Read Zokam Piancilna 48 Bible Online

Piancilna 48 - Zokam bible

Piancilna 48

¹Tua zawh a sawt loin Joseph kiangah, "Na pa a ci na hi," ci-in kiko hi. Tua ciangin amah in a tapa nihte Manasseh le Ephraim tonpih hi.

²Jacob kiangah, "Na tapa Joseph nang kiang hong tung zo hi," ci-a a kigen ciangin Israel kithakhauhsak kika, lupna tungah a tu hi.

³Jacob in Joseph tungah, "Canaan gam Luz ah a Thahat a[225] Pasian kei tungah hong kilanga, tua lai-ah kei thupha hong pia-in,

⁴‘Nang kong ciphasak dinga, tampi-in kong khangsak ding hi. Mi hon khat kong suaksak dinga, hih leitang nang nunga na suan-le-khakte in a neih tawntung dingun ka pia ding hi," hong ci hi.

⁵Tua ahi ciangin hih lai nang kianga kong pai ma-a Egypt a na neih na tapate gel kei aa in kisim ding hi; Reuben le Simeon kei aa ahi bang tektekin Ephraim le Manasseh kei aa suak ding uh hi.

⁶Nang sung pana amaute nunga suak tate nang aa ahi ding hi; amaute luah ding gam tawh kisai a sanggamte’ min banah kizom ding hi.

⁷Paddan b[226] pana ka ciah kik laitak, Ephrath tun madiakin Canaan gam lamkal-ah ka dah nadingin Rachel a si hi. Tua ciangin Ephrath (tua pen Bethlehem) zuatna lam gei-ah amah ka vui hi," ci hi.

⁸Israel in Joseph’ tapate a muh ciangin, "Hihte kua hiam?" ci-in dong hi.

⁹Joseph in a pa kiangah, "Pasian in hih lai-a kei hong piak tapate ahi hi," ci hi. Tua ciangin Israel in, "Amaute thupha ka piak theih nadingin ka kiangah hong paipih dih in," ci hi.

¹⁰Tu-in a khanghamna hangin Israel mitte manga khua a mu nawn kei hi. Tua ciangin Joseph in a tapate a kiangah nehsak-a, a pa in amaute namin kawi hi.

¹¹Israel in Joseph kiangah, "Na maitang mu kik dingin ka kilamen ngei peuhmah kei hi; ahi zongin tu-in Pasian in na tate zong hong musak hi," ci hi.

¹²Tua ciangin Joseph in amaute Israel khuk tung panin lakhia a, leilam nga-in a kunsuk hi.

¹³Tua ciangin amaute gel la a, Ephraim’ khut taklam Israel ‘khut veilamah, Manasseh’ khut veilam Israel’ khut taklamah kai-in ama kiang a naihsak hi.

¹⁴Ahi hangin Israel in a khut kipaihpehsaka, a ziatlam khut zanin Ephraim a nauzaw ahi hangin a lutungah nga-a, a veilam khut zanin a uzaw ahi hangin Manasseh’ lutungah nga hi.

¹⁵Tua ciangin amah in Joseph thupha pia a, "Ka pa Abraham le Isaac, a mai-a a paina Pasian, tu-ni donga ka nuntak sungteng hong cing Pasian.

¹⁶Siatna khempeuh pana kei hong hu Vansawltak aw, - hih pasalnote thupha pia in; amaute, kei min le ka pate Abraham le Isaac minin kilosak inla, leitungah amaute nakpi-in khangsak in," ci hi.

¹⁷Joseph in, a pa in a khut ziatlam Ephraim’ lutungah a koih lam a muh ciangin a lungkim kei hi; tua ciangin a pa’ khut, Ephraim’ lu panin Manasseh’ lu-ah koih dingin len hi.

¹⁸Joseph in ama kiangah, "Pa aw hi lo hi, hih pen ka ta upa ahi hi; na khut ziatlam ama lutungah nga in," ci hi.

¹⁹Ahi hangin a pa in niala, "Ka thei hi, ka ta aw ka thei hi. Amah zong minam khat suak dinga, amah zong a lian ding hi. Ahi zongin amah sangin a naupa lianzaw dinga, ama suan-le-khakte minam hon khat a suak ding uh hi," ci hi.

²⁰Tua ni-in amah in amaute thupha pia a, "Israel-te thupha a kipiak uh ciangin na c[227] min uh lo uh henla: ‘Ephraim le Manasseh’ bangin Pasian in note hong bawl hen,’ kici uh hen," a ci hi. Tua ahi ciangin Manasseh sangin Ephraim a masak zaw hi.

²¹Tua ciangin Israel in Joseph kiangah, "Kei a si ding ka hi ta hi, ahi hangin nang d[228] tawh Pasian omkhawm dinga na e[229] pate’ gamah nang f[230] hong puak kik ding hi.

²²Tua ciangin nang adingin, na sanggamte aa sangin a thupizaw dingin g[231] ka namsau le ka thaltang tawh Amor mite tung pana ka laksa leitang pangtuak kong pia hi," a ci hi.